ຂ່າວ

ການຝຶກອົບຮົມເພື່ອສົ່ງເສີມຄວາມສະເໝີພາບດ້ານບົດບາດຍິງ-ຊາຍ

IMG_2542

ໃນວັນທີ 23-24 ກຸມພາ 2019 ນີ້ ຢູ່ທີ່ຫ້ອງປະຊຸມວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ມີການຝຶກອົບຮົມເພື່ອສົ່ງເສີມຄວາມສະເໝີພາບດ້ານບົດບາດຍິງ-ຊາຍ ໃຫ້ແກ່ນັກສຶກສາພາຍໃນວິທະຍາໄລ. ໂດຍການເປັນປະທານຂອງ ທ່ານ ປທ. ທອງສະມຸດ ພູມມະສອນ ອຳນວຍການວິທະຍາໄລ, ມີວິທະຍາກອນຈາກໜ່ວຍງານສົ່ງເສີມຄວາມກ້າວໜ້າຂອງແມ່ຍິງປະຈໍາວິທະຍາໄລ ພ້ອມດ້ວຍນັກສໍາມະນາກອນຈາກນັກສຶກສາພາຍໃນວິທະຍາໄລເຂົ້າຮ່ວມ.

IMG_2558

ໃນພິທີດັ່ງກ່າວ ທ່ານ ປທ. ທອງສະມຸດ ພູມມະສອນ ໄດ້ມີຄໍາເຫັນ ແລະ ກ່າວເປີດພິທີ, ຈາກນັ້ນທາງວິທະຍາກອນກໍໄດ້ດໍາເນີນການຝຶກອົບຮົມ, ຊຶ່ງຫົວຂໍ້ທີ່ຝຶກອົບຮົມໃນຄັ້ງນີ້ກໍມີ: ຄວາມໝາຍຄວາມສໍາຄັນຂອງບົດບາດຍິງ-ຊາຍ, ຜົນກະທົບດ້ານລົບຂອງການບໍ່ສະເໝີພາບດ້ານບົດບາດຍິງ-ຊາຍ ຢູ່ໃນການພັດທະນາເສດຖະກິດສັງຄົມ, ການສື່ມສານບົດບາດຍິງ-ຊາຍ ແລະ ການສ້າງຫຼັກການປະຕິບັດເພື່ອສົ່ງເສີມຄວາມສະເໝີພາບບົດບາດຍິງ-ຊາຍຂອງວິທະຍາໄລ. ຊຶ່ງການຝຶກອົບຮົມໃນຄັ້ງນີ້ກໍເພື່ອໃຫ້ນັກສໍາມະນາກອນກໍຄືນັກສຶກສາມີຄວາມເຂົ້າໃຈເຖິງຄວາມໝາຍຄວາມສໍາຄັນຂອງບົດບາດຍິງ-ຊາຍ ແລະ ສາມາດຮູ້ເຖິງນິຕິກໍາສໍາຄັນຂອງລັດ ຫຼື ສາກົນ, ອົງການທີ່ສົ່ງເສີມພັດທະນາເລື່ອງບົດບາດຍິງ-ຊາຍໃນ ສປປ ລາວ.

**********************

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື, ວິທະຍາໄລກະສິກຳ ແລະ ປ່າໄມ້ ພາກເໜືອ

ພິທີເລື່ອນສະມາຊິກພັກສຳຮອງຂຶ້ນເປັນສະມາຊິກສົມບູນ ຂອງໜ່ວຍພັກຄະນະວິຊາປ່າໄມ້

ໃນວັນທີ 15 ກຸມພາ 2019 ທີ່ຜ່ານມານີ້ ຢູ່ທີ່ຫ້ອງປະຊຸມຄະນະວິຊາປ່າໄມ້ (ວິທະຍາເຂດ ຊຽງເງິນ) ໄດ້ມີ ພິທີເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນ ຂອງໜ່ວຍພັກຄະນະວິຊາປ່າໄມ້ ທີ່ຂຶ້ນກັບຄະນະພັກຮາກຖານ ວິທະຍາໄລກະສິກຳ ແລະ ປ່າໄມ້ ພາກເໜືອ. ໂດຍພາຍໃຕ້ການເປັນປະທານຂອງ ສະຫາຍ ເຢເຮີ ເລຍເລັຍເຊີ ຄະນະພັກຮາກຖານ ວິທະຍາໄລກະສິກຳ ແລະ ປ່າໄມ້ ພາກເໜືອ ມີເລຂາ, ຮອງເລຂາໜ່ວຍພັກ, ສະມາຊິກພັກພາຍໃນໜ່ວຍ ຕະຫຼອດຮອດແຂກຖືກເຊີນຈາກໜ່ວຍພັກອ້ອມຂ້າງເຂົ້າຮ່ວມ.

ໃນພິທີ ສະຫາຍ ນິກອນ ສຸດທິວົງ ຮອງເລຂາໜ່ວຍພັກຄະນະວິຊາປ່າໄມ້ ໄດ້ຂຶ້ນຜ່ານມະຕິຕົກລົງຂອງຄະນະປະຈຳພັກແຂວງ ວ່າດ້ວຍການເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນ ຊຶ່ງໄດ້ຕົກລົງເລື່ອນສະມາຊິກພັກສຳຮອງ ຈຳນວນ 3 ສະຫາຍ ຢ່າງເປັນທາງການ, ຫຼັງຈາກນັ້ນ ສະຫາຍ ບຸນກ້ຽງ ສຸລິຍະສັກ ເລຂາໜ່ວຍພັກຄະນະວິຊາປ່າໄມ້ ແລະ ສະຫາຍ ພູທອນ ຈັນທະວົງສາ ຮອງເລຂາໜ່ວຍພັກຄະນະວິຊາປູກຝັງ ໄດ້ໃຫ້ກຽດຂຶ້ນຈັບມື ແລະ ມອບມະຕິຕົກລົງໃຫ້ແກ່ບັນດາສະຫາຍສະມາຊິກພັກສົມບູນໃໝ່ ທີ່ໄດ້ຮັບການສຶກສາອົບຮົມຈາກໜ່ວຍພັກ, ຊຶ່ງໄດ້ຜ່ານການທົດສອບໃນວຽກງານຕົວຈິງ ແລະ ຜ່ານການຕິດຕາມຂອງບັນດາສະມາຊິກພັກສົມບູນ ເຫັນໄດ້ວ່າຖືກຕ້ອງຕາມມາດຖານເງື່ອນໄຂ ຂອງການເປັນສະມາຊິກພັກ ຈຶ່ງໄດ້ມີການເລື່ອນຈາກສະມາຊິກພັກສຳຮອງ ຂຶ້ນເປັນສະມາຊິກພັກສົມບູນ.

ເພື່ອເຮັດໃຫ້ພິທີມີຄວາມໝາຍຄວາມສຳຄັນ ສະຫາຍ ເຢເຮີ ເລຍເລັຍເຊີ ຄະນະພັກຮາກຖານ ວິທະຍາໄລ ໄດ້ໃຫ້ກຽດໂອ້ລົມຕໍ່ພິທີ ຊຶ່ງສະຫາຍໄດ້ ຍ້ອງຍໍຊົມເຊີຍ ທີ່ 3 ສະຫາຍເນັ້ນໜັກໃຫ້ບັນດາສະມາຊິກພັກທີ່ໄດ້ຮັບການເລື່ອນຂຶ້ນເປັນສະມາຊິກພັກສົມບູນ ໃຫ້ສືບຕໍ່ປະຕິບັດໜ້າທີ່ວຽກງານທີ່ໄດ້ມອບໝາຍໃຫ້ປະສົບຜົນສຳເລັດ, ປະຕິບັດກົດລະບຽບຂອງພັກຢ່າງເຂັ້ມງວດ, ຕັ້ງໜ້າຝຶກຝົນຫຼ່ໍຫຼອມຕົນເອງ, ຍົກລະດັບຄວາມຮູ້ຄວາມສາມາດ, ນຳເອົາແນວທາງນະໂຍບາຍຂອງພັກ-ລັດໄປຈັດຕັ້ງປະຕິບັດເປັນແບບຢ່າງທີ່ດີໃຫ້ມະຫາຊົນ ໃຫ້ສົມກັບທີ່ເປັນສະມາຊິກພັກທີ່ກ້າວໜ້າ ພ້ອມກັນຈັດຕັ້ງປະຕິບັດມະຕິຕ່າງໆຂອງຂັ້ນເທິງ ໃຫ້ປະກົດຜົນເປັນຈິງ.

 

—————————–

ພາບ-ຂ່າວໂດຍ: ພຸດທະຟົງ ເຮີ

address2

ກອງປະຊຸມວຽກງານປະກັນຄຸນນະພາບພາຍໃນ ວິທະຍາໄລ (QA)

IMG_2237

ໃນວັນທີ 12 ກຸມພາ 2019 ນີ້ ຢູ່ທີ່ຫ້ອງປະຊຸມວິທະຍາໄລ ໄດ້ມີກອງປະຊຸມ ວຽກງານປະກັນຄຸນນະພາບພາຍໃນໂດຍເປັນປະທານຂອງທ່ານ ສົມສີ ຄຳມະນີວົງ ຮອງອຳນວຍການວິທະຍາໄລ, ມີ ທ່ານ ທອງດີ ເນົາວັນເພັງ ຮອງອຳນວຍການໂຮງຮຽນເຕັກນິກ-ວິຊາຊີບແບບປະສົມ ແຂວງໄຊຍະບູລີ, ມີບັນດາພະນັກງານ-ຄູອາຈານທີ່ກ່ຽວຂ້ອງເຂົ້າຮ່ວມ, ໃນພິທີ ທ່ານ ສົມສີ ຄໍາມະນີວົງ ໄດ້ມີຄໍາເຫັນ ແລະ ເປີດກອງປະຊຸມ ຈາກນັ້ນກໍໄດ້ດໍາເນີນຕາມວາລະຂອງກອງປະຊຸມ, ກອງປະຊຸມດັ່ງກ່າວໄດ້ດໍາເນີນເປັນເວລາ 3 ວັນຈຶ່ງສໍາເລັດ.

—————————-

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື, ວິທະຍາໄລກະສິກຳ ແລະ ປ່າໄມ້ ພາກເໜືອ

ພິທີ ໂຄສະນາເຜີຍແຜ່ກົດລະບຽບການສັນຈອນ ແລະ ກົດໝາຍວ່າດ້ວຍ ການຈະລາຈອນທາງບົກ ທີວິທະຍາໄລ ກະສິກຳ ແລະ ປ່າໄມ້ ພາກເໜືອ

IMG_2154

ເພື່ອຫຼຸດຜ່ອນການເກີດອຸບັດຕິເຫດ ແລະ ເຮັດໃຫ້ການສັນຈອນຕາມທ້ອງຖະໜົນຫຼວງ ມີຄວາມເປັນລະບຽບ ຮຽບຮ້ອຍ. ດັ່ງນັ້ນ, ໃນຕອນບ່າຍຂອງ ວັນທີ 5 ກຸມພາ 2019 ນີ້ ຢູ່ທີ່ສະໂມສອນ ວິທະຍາໄລກະສິກຳ ແລະ ປ່າໄມ້ ພາກເໜືອ ເຈົ້າໜ້າທີ່ຕຳຫຼວດພະແນກຈາລະຈອນ ກອງບັນຊາການ ປກສ ແຂວງ ຫຼວງພະບາງ ຮ່ວມກັບ ຄະນະຊາວໜຸ່ມແຂວງ ຫຼວງພະບາງ ແລະ ພະແນກ ໂຍທາທິການ ແລະ ຂົນສົ່ງແຂວງຫຼວງພະບາງ ແລະ ບໍລິສັດ ອີທີເອວ ຈໍາກັດ ສາຂາຫຼວງພະບາງ ໄດ້ມາລົງໂຄສະນາເຜີຍແຜ່ກົດລະບຽບການສັນຈອນ ແລະ ກົດໝາຍວ່າດ້ວຍ ການຈະລາຈອນທາງບົກ. ໂດຍການເປັນປະທານຮ່ວມຂອງ ທ່ານ ນາງ ແສງມະນີ ເພັດສະວົງ ຮອງເລຂາຄະນະບໍລິຫານງານຊາວໜຸ່ມແຂວງຫຼວງພະບາງ, ທ່ານ ທອງສະມຸດ ພູມມະສອນ ອຳນວຍການ ວິທະຍາໄລກະສິກຳ ແລະ ປ່າໄມ້ ພາກເໜືອ, ທ່ານ ພອນສັກ ຈັນທະວົງ ຮອງຫົວໜ້າ ພະນັກງານຄຸ້ມຄອງການຈັດຕັ້ງຊາວໜຸ່ມ ສູນກາງຊາວໜຸ່ມ ປະຊາຊົນ ປະຕິຫວັດລາວ, ມີ ພະນັກງານ,ຄູ-ອາຈານ ແລະ ນັກສຶກສາພາຍໃນວິທະຍາໄລ ເຂົ້າຮ່ວມຮັບຟັງຢ່າງພ້ອມພຽງ.

IMG_2022IMG_2066

ໃນພິທີດັ່ງກ່າວ ທ່ານ ນາງ ແສງມະນີ ເພັດສະວົງ ໄດ້ກ່າວເປີດພິທີຢ່າງເປັນທາງການ, ຈາກນັ້ນ ທ່ານ ຮອ. ທອງຈັນ ພົມສະຫວັດ ຫົວໜ້າຫ້ອງການ ພະແນກຕໍາຫຼວດຈະລາຈອນ ປກສ ແຂວງ ຫຼວງພະບາງ ໄດ້ຂຶ້ນບັນຍາຍບັນດາເອກະສານກົດໝາຍວ່າດ້ວຍການຈະລາຈອນທາງບົກ ໂດຍຫຍໍ້, ສະຖິຕິພາບຜົນເສຍຫາຍຈາກການເກີດອຸບັດຕິເຫດ ແລະ ທິດທາງແກ້ໄຂການຂັບຂັບຂີ່ປອດໄພ ເຊິ່ງທ່ານໄດ້ຍົກໃຫ້ເຫັນເຖິງບັນດາສາເຫດທີ່ພາໃຫ້ເກີດອຸບັດຕິເຫດ ທີ່ເກີດຂຶ້ນຍ້ອນຜູ້ຂັບຂີ່ ບໍ່ປະຕິບັດຕາມກົດລະບຽບການສັນຈອນ ເຊິ່ງມັນໄດ້ສົ່ງຜົນເສຍຫາຍອັນໃຫຍ່ຫຼວງ ເປັນຕົ້ນແມ່ນ: ເສຍຊັບສິນ, ເສຍສຸຂະພາບ, ເສຍເວລາ ແລະ ຮ້າຍແຮງໄປກວ່ານັ້ນ ກໍແມ່ນເຖິງຂັ້ນເສຍຊີວິດໄດ້.

IMG_2069IMG_2118IMG_2062

ຈາກນັ້ນ ທ່ານ ພອນແກ້ວ ຮອງຂະແໜງຂົນສົ່ງ ພະແນກໂຍທາ ແລະ ຂົນສົ່ງ ແຂວງຫຼວງພະບາງ ໄດ້ຂຶ້ນບັນຍາຍກ່ຽວກັບ ສາລະບານເດີນລົດ, ໝວດປ້າຍຕ່າງໆ ເພື່ອໃຫ້ ພະນັກງານ.ຄູອາຈານ ແລະ ນັກສຶກສາ ໄດ້ຮັບຮູ້, ເຂົ້າໃຈ ແລະ ໝູນໃຊ້ໃນຊີວິດປະຈຳວັນ ກໍຄືການນຳໃຊ້ລົດ -ໃຊ້ຖະໜົນ ໃຫ້ມີຄວາມຄວາມປອດໄພ, ປາສະຈາກການເກີດອຸບັດຕິເຫດ.

ນອກນັ້ນຍັງໄດ້ຈັດກິດຈະກໍາຖາມ-ຕອບ ໃຫ້ກັບນັກສຶກສາ ເພື່ອຕອບຄໍາຖາມເອົາຂອງລາງວັນ ຈາກບໍລິສັດ ອີທີແອວ ຈໍາກັດ ສາຂາແຂວງ ຫຼວງພະບາງ ເຊິ່ງປະກອບມີ: ໝວກກັນກະທົບ, ປຶ້ມຂຽນ, ຊິມກາດ ແລະ ບັດເຕີມເງິນໂທລະສັບ,  ພ້ອມນັ້ນຍົງໄດ້ຊົມວີດີໂອ ກ່ຽວກັບການເກີດອຸບັດຕິເຫດ ເພື່ອເປັນອຸທາຫອນ ເຕືອນສະຕິໃຫ້ນັກຂັບຂີ່ມີຄວາມລະມັດລະວັງ ແລະ ຕ້ອງໃສ່ໝວກກັນກະທົບທຸກຄັ້ງໃນເວລາຂີ່ພາຫະນະ ໃນຕອນທ້າຍ ຍັງໄດ້ຮັບຟັງການໂອ້ລົມຂອງ ຄະນະປະທານ ຕື່ມອີກ ເຊິ່ງທ່ານກໍໄດ້ຮຽກຮ້ອງໃຫ້ນັກສຶກສາ ຈົ່ງໄດ້ເອົາໃຈໃສ່ປະຕິບັດກົດລະບຽບການສັນຈອນ ແລະ ກົດໝາຍວ່າດ້ວຍການຈາລະຈອນທາງບົກ ທີ່ໄດ້ຮັບຟັງຈາກເຈົ້າໜ້າທີ່ຕຳຫຼວດຈະລາຈອນ ໄດ້ບັນຍາຍມາໃນເບື້ອງຕົ້ນ ແລ້ວນຳໄປໃຊ້ໃນຊີວິດປະຈຳວັນ ເພື່ອເຮັດໃຫ້ການສັນຈອນຕາມທ້ອງຖະໜົນຫຼວງ ມີຄວາມເປັນລະບຽບຮຽບຮ້ອຍ ແລະ ເພື່ອເຮັດໃຫ້ບັນຫາການເກີດອຸບັດຕິເຫດ ໃຫ້ຫຼຸດໜ້ອຍຖອຍລົງເທື່ອລະກ້າວ.

IMG_2062

————————

ພາບ-ຂ່າວໂດຍ: ສີສະຫວາດ ພັນທຸວົງ

ກຸ່ມວຽກ ໂຄສະນາ ແລະ ປະຊາສໍາພັນ, ຫ້ອງການພົວພັນ ແລະ ການຮ່ວມມື

address2

ພິທີ ເປີດສູນສຸຂະພາບສັດປີກ

ພິທີເປີດສູນເປີດ ສູນສຸຂະພາບສັດປີກ ຈັດຂຶ້ນໃນຕອນ ແລງຂອງ ວັນທີ 23 ມັງກອນ 2019 ທີ່ ຫ້ອງທົດລອງ ຂອງຄະນະວິຊາລ້ຽງສັດ. ໂດຍມີທ່ານ ປອ. ສີທອງ ພິພັກຂະວົງ ຮອງຫົວໜ້າກົມລ້ຽງສັດ ແລະ ການປະມົງ, ກະຊວງ ກະສິກໍາ ແລະ ປ່າໄມ້, ທ່ານ ປອ. ຈິນຕະນາ ຈັນທະວີສຸກ ຕາງໜ້າໂຄງການ ອົງການອາຫານ ແລະ ການກະສິກໍາ (FAO) ແລະ ທ່ານ ປທ. ທອງສະມຸດ ພູມມະສອນ ອໍານວຍການ ວິທະຍາໄລກະສິກຳ ແລະ ປ່າໄມ້ ພາກເໜືອ, ມີຕາງໜ້າພະແນກ ສາທາລະນະສຸກ ແຂວງຫຼວງພະບາງ, ພະແນກກະສິກຳ ແລະ ປ່າໄມ້ ແຂວງ ຫຼວງພະບາງ, ຕາງໜ້າ ຫ້ອງການກະສິກຳ ແລະ ປ່າໄມ້ ເມືອງປາກອູ, ນະຄອນ ຫຼວງພະບາງ, ຕາງໜ້າຈາກກົມລ້ຽງສັດ (ປະເທດໄທ) ພ້ອມທັງ 3 ບ້ານເປົ້າໝາຍຂອງໂຄງການ, ພະນັກງານຄູອາຈານທີ່ກ່ຽວຂ້ອງເຂົ້າຮ່ວມ. ພິທີ ທ່ານ ຄໍາຜຸຍ ພອນໄຊ ຫົວໜ້າໂຄງການ ໂຄງການບໍລິຫານຄວາມສ່ຽງ ແລະ ຕ່ອງໂສ້ຕະຫຼາດໃນການຜະລິດສັດປີກ ໄດ້ຂຶ້ນລາຍງານກ່ຽວກັບສູນວ່າ: ເປັນແຫຼ່ງສະໜອງຄວາມຮູ້ທາງດ້ານເຕັກນິກວິຊາການ ທັງພາກທິດສະດີ ແລະ ພາກປະຕິບັດ ແກ່ນັກສຶກສາ ພາຍໃນວິທະຍາໄລ ແລະ ນັກຝຶກອົບຮົມ ພ້ອມທັງໃຫ້ຄໍາແນະນໍາແກ່ຊາວກະສິກອນຜູ້ທີ່ລ້ຽງສັດປີກ ໃນການຈັດຕັ້ງປະຕິບັດທີ່ດີໃນການລ້ຽງສັດປີກທີ່ຖືກຕ້ອງ ແລະ ມາດຕະການດ້ານຄວາມປອດໄພທາງຊີວະພາບ ເພື່ອເຮັດໜ້າທີ່ໃນການສະໜັບສະໜູນ ແລະ ຕອບສະໜອງການບໍລິການທາງດ້ານເຕັກນິກວິຊາການ ໃຫ້ແກ່ຊາວກະສິກອນຜູ້ລ້ຽງສັດປີກ ໃນ 3 ບ້ານເປົ້າໝາຍ, ສະນັ້ນ ອົງການອາຫານ ແລະ ການກະສິກໍາ ຂອງສະຫະປະຊາຊາດ ຈຶ່ງໄດ້ໃຫ້ການສະໜັບສະໜູນ ໃນການສ້າງຕັ້ງສູນສຸຂະພາບສັດປີກຂຶ້ນ ທີ່ວິທະຍາໄລກະສິກໍາ ແລະ ປ່າໄມ້ ພາກເໜືອ ພາຍໃຕ້ ໂຄງການບໍລິຫານຄວາມສ່ຽງ ແລະ ຕ໋ອງໂສ້ຕະຫຼາດ ໃນການຜະລິດສັດປີກ. ເປົ້າໝາຍຫຼັກ ກໍແມ່ນເພື່ອ ໃຫ້ການບໍລິການ ແລະ ການສະໜັບສະໜູນທາງວິຊາການ ດ້ານການຈັດການສຸຂະພາບສັດປີກ ສໍາລັບການຮຽນການສອນພາຍໃນວິທະຍາໄລ ແລະ ຊາວກະສິກອນຜູ້ຜະລິດສັດປີກ, ຈັດການຝຶກອົບຮົມໃຫ້ຊາວກະສິກອນ ແລະ ຜູ້ຜະລິດສັດປີກ ກ່ຽວກັບການປະຕິບັດທີ່ດີໃນການລ້ຽງສັດປີກ ໂດຍການພັດທະນາຫຼັກສູດ ແລະ ເຄື່ອງມືໃນການຝຶກອົບຮົມ ສ້າງຄວາມເຂັ້ມແຂງໃຫ້ແກ່ທ້ອງຖິ່ນ ໃຫ້ມີຄວາມສາມາດໃນການບໍລິຫານຈັດການທີ່ດີ ຕໍ່ຄວາມສ່ຽງໃນການຜະລິດສັດປີກ ແລະ ຕ່ອງໂສ້ຕະຫຼາດ ເພື່ອຕອບສະໜອງສັດປີກ ແລະ ຜະລິດຕະພັນສັດປີກທີ່ປອດໄພ ແລະ ມີຄຸນນະພາບ ເຂົ້າສູ່ຕະຫຼາດທຸກລະດັບເທື່ອລະກ້າວພາຍໃນ ແຂວງຫຼວງພະບາງ ແລະ ຕ່າງແຂວງໃນອະນາຄົດ. ພິທີກໍໄດ້ມີການຮ່ວມກັນຕັດແຖບຜ້າ ເພື່ອເປັນການເປີດສູນຢ່າງເປັນທາງການ.

===========

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື

ກອງປະຊຸມ ຜ່ານຮ່າງມາດຕະຖານ ລໍາລັບການລ້ຽງສັດປີກທີ່ດີ ແລະ ການຂ້າຄົວສັດປີກທີ່ເນັ້ນຄວາມປອດໄພ

ວັນທີ 23 ມັງກອນ 2019 ທີ່ ຫ້ອງປະຊຸມ ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ຈັດກອງປະຊຸມຜ່ານຮ່າງມາດຕະຖານ ລໍາລັບການລ້ຽງສັດປີກທີ່ດີ ແລະ ການຂ້າຄົວສັດປີກທີ່ເນັ້ນຄວາມປອດໄພຂຶ້ນ, ໂດຍເປັນປະທານຮ່ວມຂອງ ທ່ານ  ປອ. ສີທອງ ພິພັກຂະວົງ ຮອງຫົວໜ້າກົມລ້ຽງສັດ ແລະ ການປະມົງ, ກະຊວງ ກະສິກໍາ ແລະ ປ່າໄມ້, ທ່ານ ປອ. ຈິນຕະນາ ຈັນທະວີສຸກ ຕາງໜ້າໂຄງການ ອົງການອາຫານ ແລະ ການກະສິກໍາ (FAO) ແລະ ທ່ານ ປທ. ທອງສະມຸດ ພູມມະສອນ ອໍານວຍການ ວິທະຍາໄລກະສິກຳ ແລະ ປ່າໄມ້ ພາກເໜືອ, ມີຕາງໜ້າພະແນກ ສາທາລະນະສຸກ ແຂວງຫຼວງພະບາງ, ພະແນກກະສິກຳ ແລະ ປ່າໄມ້ ແຂວງຫຼວງພະບາງ, ຕາງໜ້າ ຫ້ອງການກະສິກຳ ແລະ ປ່າໄມ້ ເມືອງປາກອູ, ນະຄອນ ຫຼວງພະບາງ, ຕາງໜ້າຈາກກົມລ້ຽງສັດ (ປະເທດໄທ) ພ້ອມທັງ 3 ບ້ານເປົ້າໝາຍຂອງໂຄງການ, ພະນັກງານຄູອາຈານທີ່ກ່ຽວຂ້ອງເຂົ້າຮ່ວມ. ໃນພິທີ ດັ່ງກ່າວ ທ່ານ ປອ. ສີທອງ ພິພັກຂະວົງ ໄດ້ຍ້ອງຍໍຊົມເຊີຍ ທີ່ທາງວິທະຍາໄລ ໄດ້ມີຄວາມພະຍາຍາມໃນການຮ່າງມາດຖານຂອງໂຄງການດັ່ງກ່າວ ທ່ານເນັ້ນໃຫ້ຄວາມສໍາຄັນຕໍ່ໂຄງການດັ່ງກ່າວ ເພາະວ່າອົງການ ອາຫານ ແລະ ການກະສິກຳ ຖືວ່າເປັນອົງການທີ່ເປັນແບບຢ່າງໃນການລ້ຽງສັດໃນ ສປປ ລາວ. ຊຶ່ງໂຄງການດັ່ງກ່າວ ເປັນໂຄງການໜຶ່ງທີ່ສ້າງຄວາເຂັ້ມແຂງໃຫ້ແກ່ທ້ອງຖິ່ນ ໃຫ້ມີຄວາມສາມາດໃນການຈັດການທີ່ດີຕໍ່ການບໍລິຫານຄວາມສ່ຽງໃນການຜະລິດສັດປີກ ແລະ ຕ໋ອງໂສຕະຫຼາດຂອງສັດປີກທີ່ເນັ້ນ 3 ບ້ານເປົ້າໝາຍ ຂອງແຂວງຫຼວງພະບາງ ຄື: ບ້ານ ວຽງສະຫວັນ ນະຄອນ ຫຼວງພະບາງ, ບ້ານ ຊ່າງໄຫ ແລະ ບ້ານຫາດຂາມ ເມືອງປາກອູ ແຂວງຫຼວງພະບາງ,  ຈະເນັ້ນໃສ່ມາດຕະຖານການຈັດຕັ້ງການປະຕິບັດທີ່ດີໃນການລ້ຽງ ແລະ ການຈັດການສຸຂະພາບຝູງສັດປີກ. ຄຽງຄູ່ກັນນັ້ນ, ຟາມສັດປີກ ຂອງວິທະຍາໄລ ກໍຈະໄດ້ຮັບການປັບປຸງໃຫ້ດີຂື້ນ ເພື່ອເປັນຟາມຕົວແບບ, ເປັນບ່ອນຮຽນຮູ້ເຕັກນິກຕ່າງໆ ໃນການຜະລິດສັດປີກ ທີ່ມີຄຸນນະພາບ ໂດຍມີເປົ້າໝາຍນັບແຕ່ການຜະລິດແນວພັນໄກ່ພື້ນເມືອງຊື່ງເອີ້ນວ່າ “ໄກ່ພື້ນເມືອງຫຼວງພະບາງ ຫຼື ໄກ່ລາດຫຼວງພະບາງ”, ການສົ່ງເສີມການລ້ຽງ, ການສ້າງແຜນທຸລະກິດດ້ານການຕະຫຼາດສັດປີກ.

=============

ພາບຂ່າວ- ສີສະຫວາດ ພັນທຸວົງ,

ຫ້ອງການພົວພັນ ແລະ ການຮ່ວມມື

 

ກອງປະຊຸມປຶກສາຫາລືການຈັດຕັ້ງປະຕິບັດ ກິດຈະກຳ ຂອງໂຄງການ SURAFCO ປະຈໍາປີ 2019

img_9823

ໃນວັນທີ 22 ມັັງກອນ 2019 ທີ່ຫ້ອງປະຊຸມ ວິທະຍາໄລ ກະສິກໍາ ແລະ ປ່າໄມ້ ພາກເໜືອ ໄດ້ມີກອງປະຊຸມປຶກສາຫາລືການຈັດຕັ້ງປະຕິບັດ ກິດຈະກຳ ຂອງໂຄງການປັບປຸງ ວິທະຍາໄລ ກະສິກໍາ ແລະ ປ່າໄມ້ ພາກເໜືອ (SURAFCO) ປະຈໍາປີ 2019.

img_9837

ໂດຍການເປັນປະທານຂອງ ທ່ານ ເພັດສະໝອນ ຖານະສັກ ຮອງກົມຈັດຕັ້ງ ແລະ ພະນັກງານ ກະຊວງກະສິກຳ ແລະ ປ່າໄມ້. ມີຄະນະອຳນວຍການ, ທີມງານໂຄງການ SURAFCO, ມີຫົວໜ້າ ແລະ ຮອງຫົວໜ້າ ຫ້ອງການ, ຫົວໜ້າ ແລະ ຮອງຫົວໜ້າ ຄະນະວິຊາ ພ້ອມດ້ວຍພະນັກງານ, ຄູ-ອາຈານ ຜູ້ທີຮັບຜິດຊອບກິດຈະກຳຕ່າງໆພາຍໃນວິທະຍາໄລເຂົ້າຮ່ວມ. 

img_9850

ໃນພິທີດັ່ງກ່າວ ທ່ານ ເພັດສະໝອນ ຖານະສັກ ໄດ້ມີຄໍາເຫັນ ພ້ອມທັງກ່າວເປີດພິທີ, ຫຼັງຈາກນັ້ນກໍໄດ້ມີການນໍາສະເໜີ ວຽກທີ່ຍັງຄົງຄ້າງ, ບັນຫາ, ຂໍ້ຫຍຸ້ງຍາກ, ສິ່ງທ້າທາຍ, ຂໍ້ສະເໜີ ແລະ ຜ່ານແຜນຂອງໂຄງການ SURAFCO ປະຈໍາປີ 2019 ພ້ອມທັງສົນທະນາຖາມ-ຕອບ ຢ່າງກົງໄປກົງມາ. ກອງປະຊຸມດັ່ງກ່າວດໍາເນີນເປັນເວລາ 1 ວັນຈຶ່ງສໍາເລັດ.

******************

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື

address2

ວິທະຍາໄລ ກະສິກຳ ແລະ ປ່າໄມ້ ພາກເໜືອ ປາຖະກະຖາ ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ

ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ຈັດພິທີປາຖະກະຖາ ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ (20 ມັງກອນ 1949 – 20 ມັງກອນ 2019) ຂຶ້ນ ໃນວັນທີ 16 ມັງກອນ 2019, ປາຖະກະຖາໂດຍ ທ່ານ ພົນຈັດຕະວາ ຄໍາຫຼ້າ ວົງວິໄລ ກໍາມະການພັກແຂງ ຫົວໜ້າການທະຫານ ກອງບັນຊາການທະຫານ ແຂວງຫຼວງພະບາງ, ມີຄະນະອຳນວຍການວິທະຍາໄລ, ພະນັກງານ, ຄູ-ອາຈານ ພ້ອມດ້ວຍນັກສຶກສາໝົດທຸກຄົນເຂົ້າຮ່ວມ. ໃນພິທີ ທ່ານ ພົນຈັດຕະວາ ຄໍາຫຼ້າ ວົງວິໄລ ໄດ້ຂຶ້ນປາຖະກະຖາ ທ່ານໄດ້ຍົກໃຫ້ເຫັນ 3 ບັນຫາທີ່ສຳຄັນເປັນຕົ້ນແມ່ນ ປະຫວັດແຫ່ງການກຳເນີດ, ເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ, ທາດແທ້ ແລະ ມູນເຊື້ອອັນສະຫງ່າອົງອາດ ຂອງກອງທັບປະຊາຊົນລາວ, ເສີມຂະຫຍາຍມູນເຊື້ອກອງທັບປະຊາຊົນລາວ ເຂົ້າໃນການປົກປັັກຮັກສາ ແລະ ສ້າງສາພັດທະນາປະເທດຊາດ. ກອງທັບປະຊາຊົນລາວໄດ້ສ້າງຕັ້ງຂຶ້ນ ໃນວັນທີ 20 ມັງກອນ 1949 ຢູ່ເຂດລາວຮຸ່ງ-ພຽງສາ ເມືອງຊຽງຄໍ້ ແຂວງຫົວພັນ ຊຶ່ງ ແມ່ນປະທານ ໄກສອນ ພົມວິຫານ ເປັນຜູ້ປະກາດສ້າງຕັ້ງ ແລະ ຊີ້ນຳ-ນໍາພາໂດຍກົງ, ນັບແຕ່ມື້ສ້າງຕັ້ງຂຶ້ນກອງທັບ ໄດ້ຮັບພາລະອັນໜັກໜ່ວງ ໃນການຕໍ່ສູ້ຕ້ານການຮຸກຮານ ຂອງ ຈັກກະພັດທັງເກົ່າ ແລະໃໝ່ທີ່ ມີອາວຸດ, ພາຫະນະສົງຄາມ ແລະກຳລັງພົນເໜືອກວ່າ, ແຕ່ກອງທັບປະຊາຊົນລາວ ໄດ້ຕໍ່ສູ້ຢ່າງອົງອາດ ກ້າຫານ, ຍອມເສຍສະຫຼະເລືອດ ເນື້ອເພື່ອປະເທດຊາດ ແລະເພື່ອປະຊາຊົນ ສາມາດຍາດໄດ້ໄຊ ຊະນະເປັນກ້າວໆ ແລະປົດປ່ອຍປະເທດຊາດ ໄດ້ຢ່າງສົມບູນ ພ້ອມທັງສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງສະຫງ່າຜ່າເຜີຍ ໃນວັນທີ 2 ທັນວາ ປີ 1975, ນັບແຕ່ນັ້ນມາ ກອງທັບປະຊາຊົນລາວ ໄດ້ເຮັດໜ້າທີ່ເປັນກຳລັງຫຼັກແຫຼ່ງ ໃນການປົກປັກຮັກສາປະເທດຊາດ ໃຫ້ມີຄວາມສະຫງົບ-ປອດໄພ ແລະ ມີຄວາມເປັນລະບຽບຮຽບຮ້ອຍທາງສັງຄົມ, ສ້າງເງື່ອນໄຂໃຫ້ປະເທດຊາດ ມີການພັດທະນາຢ່າງຮອບດ້ານ, ນັບທັງຊິວີດການເປັນຢູ່ ຂອງປະຊາຊົນນັບມື້ນັບດີຂຶ້ນເປັນກ້າວໆ. ການປາຖະກະຖາຄັ້ງນີ້ ເປັນການສຶກສາອົບຮົມໃຫ້ ພະນັກງານ, ຄູອາຈານ ແລະ ນັກສຶກສາພາຍໃນວິທະຍາໄລ ໄດ້ຮັບຮູ້ ເຂົ້າໃຈ ແລະ ກໍາແໜ້ນເຖິງມູນເຊື້ອ, ການເຕີບໃຫຍ່ຂະຫຍາຍຕົວຂອງວັນສ້າງຕັ້ງກອງທັບປະຊາຊົນລາວ ໃຫ້ກວ້າງຂວາງ-ເລິກເຊິ່ງ, ເພື່ອພ້ອມກັນປຸກລະດົມ ແລະ ເສີມຂະຫຍາຍມູນເຊື້ອ, ທາດແທ້ປະຕິວັດຂອງກອງທັບ ໃນການຕໍ່ສູ້ກູ້ຊາດ ເຂົ້າໃນການຈັດຕັ້ງປະຕິບັດມະຕິຂອງພັກ ແລະເພີ່ມທະວີການ ຄຸ້ມຄອງລັດ, ຄຸ້ມຄອງສັງຄົມ ດ້ວຍລະບຽບ-ກົດໝາຍ, ເຊີດຊູນໍ້າໃຈເພິ່ງ ຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ກ້າວໄປສູ່ ການນຳພາຕົນເອງ, ຄອບຄົວ ແລະ ປະເທດຊາດຫຼຸດພົ້ນອອກຈາກ ສະຖານະພາບດ້ອຍພັດທະນາເທື່ອລະກ້າວ.

 

*******************************

ພາບ-ຂ່າວໂດຍ:  ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື

 

ວິທະຍາໄລ ກະສິກຳ ແລະ ປ່າໄມ້ ພາກເໜືອ ສະເຫຼີມສະຫຼອງບຸນປົດປີຂອງເຜົ່າກຶມມຸ ແລະ ບຸນກິນຈຽງຂອງເຜົ່າມົ້ງ ປະຈໍາປີ 2019

ວັນທີ 10 ມັງກອນ 2019 ວິທະຍາໄລກະສິກໍາ ແລະ ປ່າໄມ້ ພາກເໜືອ ໄດ້ຈັດພິທີສະເຫຼີມສະຫຼອງບຸນປົດປີຂອງເຜົ່າກຶມມຸ ແລະ ບຸນກິນຈຽງ ຂອງເຜົ່າມົ້ງ ຂຶ້ນ ຢູ່ທີ່ສະໂມສອນຂອງວິທະຍາໄລ ໂດຍເປັນກຽດເຂົ້າຮ່ວມຂອງທ່ານ ປທ. ທອງສະມຸດ ພູມມະສອນ ອໍານວຍການວິທະຍາໄລ, ມີຮອງອຳນວຍການ, ອາດິດອຳນວນການ, ຕາງໜ້າໂຄງການ ເຊີຣາບໂກ, ນາຍບ້ານອ້ອມຂ້າງວິທະຍາໄລ ພ້ອມດ້ວຍພະນັກງານ, ຄູ-ອາຈານ ແລະ ນັກສຶກສາບັນດາເຜົ່າ ພາຍໃນວິທະຍາໄລເຂົ້າຮ່ວມ. ໃນພິທີດັ່ງກ່າວ ໄດ້ມີການເລົ່າປະຫວັດຄວາມເປັນມາຂອງທັງສອງເຜົ່າ, ຊຶ່ງຕາງໜ້າໃຫ້ແກ່ເຜົ່າມົ້ງແມ່ນ ທ່ານ ເຢເຮີ ເລຍເລັຍເຊີ ແລະ ຕາງໜ້າເຜົ່າກຶມມຸ ໂດຍແມ່ນ ທ່ານ ນາງ ເຂັມເພັດ ມະນີຈິດ ຊຶ່ງທັງສອງເຜົ່ານັ້ນໄດ້ຍົກໃຫ້ເຫັນ ເຖິງຄວາມກະຕັນຍູຮູ້ ບຸນຄຸນຕໍ່ ບັນພະບຸລຸດທີ່ລ່ວງລັບ ຂອງວົງສາຄະນະຍາດຕົນ ຊຶ່ງເຈົ້າກົກເຈົ້າເລົ່າໄດ້ນຳພາຈັດງານບຸນດັ່ງທີ່ຍິ່ງໃຫຍ່ນີ້ຂຶ້ນມາແຕ່ດົນນານ ແລະ ມີຄວາມໝາຍຄວາມສຳຄັນທີ່ສ່ອງແສງເຖິງວັດທະນະທຳ, ຮິດຄອງປະເພນີ ອັນດີງາມຂອງຊົນເຜົ່າໃນລາວ. ໃນໂອກາດທີ່ມີຄວາມໝາຍຄວາມສໍາຄັນ ທ່ານ ປທ. ທອງສະມຸດ ພູມມະສອນ ໄດ້ມີຄໍາເຫັນຕໍ່ພິທີດັ່ງກ່າວ ທ່ານໄດ້ຍ້ອງຍໍຊົມເຊີຍທັງສອງເຜົ່າກໍຄື ເຜົ່າມົ້ງ ແລະ ເຜົ່າກຶມມຸ ທີ່ໄດ້ມີຄວາມສາມັກຄີໃນການຈັດງານບຸນດັ່ງກ່າວຂຶ້ນ ທ່ານໄດ້ຮຽກຮ້ອງໃຫ້ ບັນດາເຜົ່າຈົ່ງພ້ອມກັນເຊີດຊູມູນເຊື້ອອັນດີງາມ ຂອງຊາດກໍຄືຂອງແຕ່ລະເຜົ່າ, ເຊີດຊູເອກະລັກຂອງເຜົ່າ, ເສີມຂະຫຍາຍ ແລະ ປົກປັກຮັກສາຮີດຄອງປະເພນີອັນດີງາມ, ເພີ່ມທະວີຄວາມສາມັກຄີປອງດອງ ແລະ ພ້ອມກັນຈັດຕັ້ງປະຕິບັດແນວທາງນະໂຍບາຍຂອງພັກໃຫ້ປະກົດຜົນເປັນຈິງ ເວົ້າລວມ, ເວົ້າສະເພາະກໍຄືພັດທະນາວິທະຍາໄລໃຫ້ກ້າວຂຶ້ນຢ່າງບໍ່ຢຸດຢັ້ງ. ຫຼັງຈາກນັ້ນທັງສອງເຜົ່າກໍໄດ້ທໍາພິທີທາງສາສະໜາ, ການສູ່ຂວັນ, ພາຍໃນງານຍັງມີ ການສະແດງສິລະປະວັນນະຄະດີ ເປັນຕົ້ນແມ່ນການຟ້ອນ, ທີເປັນເອກະລັກຂອງໃຜລາວ, ນອກນັ້ນຍັງມີ ການຍິງໜ້າເກັກຂອງເຜົ່າມົ້ງ ແລະ ການສະແດງມວຍລາຍລາວ ຂອງເຜົ່າກຶມມຸອີກດ້ວຍ. ໃນງານດັ່ງກ່າວດໍາເນີນໄປຢ່າງມ່ວນຊື່ນ.

ຮູບພາບບັນຍາກາດເພີ່ມເຕີມ

———————————————

ພາບ-ຂ່າວ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື