ຂ່າວ

ນັບຖອຍຫຼັງ 49ວັນ

ນັບຖອຍຫຼັງ 49ວັນ
ການກະກຽມງານສະເຫຼີມສະຫຼອງວັນສ້າງຕັ້ງ ວິທະຍາໄລກະສິກຳ ແລະ ປ່າໄມ້ ພາກເຫນືອ
ຄົບຮອບ 30 ປີ
ວັນທີຈັດງານ 28 ພະຈິກ ຫາ ວັນທີ 2 ທັນວາ 2019

123

ພິທີເປີດຊຸດຝຶກອົບຮົມເຕັກນິກການລ້ຽງ ແລະ ຜະລິດລູກ ລູກປາ ແລະ ລູກກົບ

ໃນວັນທີ 9 ກັນຍາ 2019 ທີ່ຫ້ອງປະຊຸມ ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ມີພິທີເປີດຊຸດຝຶກອົບຮົມ ເຕັກນິກການລ້ຽງ ແລະ ຜະລິດລູກກົບ ລູກປາ ໃຫ້ແກ່ໄວໜຸ່ມແຂວງຊຽງຂວາງ ຂຶ້ນ, ພາຍໃຕ້ການເປັນປະທານຂອງ ທ່ານ ທອງສະມຸດ ພູມມະສອນ ອໍານວຍການວິທະຍາໄລ, ມີ ທ່ານ ໄຊຄໍາ ສຸກສະນິດ ຫົວໜ້າຄະນະວິຊາປະມົງ,​ມີບັນຄູ-ອາຈານ ຄະນະວິຊາປະມົງ ພ້ອມດ້ວຍສໍາມະນາກອນ ທັງໝົດ 8 ທ່ານ, ຍິງ 2 ທ່ານ. ທ່ານ ທອງສະມຸດ ພູມມະສອນ ໄດ້ມີຄໍາເຫັນ ແລະ ກ່າວເປີດພິທີ, ຫຼັງຈາກນັ້ນກໍໄດ້ດໍາເນີນການຝຶກອົບຮົມ, ຊຶ່ງຫົວຂໍ້ທີ່ມາຝຶກໃນຄັ້ງນີ້ກ່ຽວກັບການປະສົມພັນປາ ແລະ ປະສົມພັນກົບ, ຊຶ່ງໃນຫຼັກສູດດັ່ງກ່າວຈະໄດ້ຮຽນທັງທິດສະດີ ແລະ ພາກປະຕິບັດຕົວຈິງ, ໂດຍໃຊ້ເວລາຝຶກທັງໝົດ 28 ມື້ ຊຶ່ງເລິ່ມແຕ່ 9 ກັນຍາ ຫາ 5 ຕຸລາ 2019 ຈຶ່ງສໍາເລັດ. ໃນການຝຶກອົບຮົມໃນຄັ້ງນີ້ ໄດ້ຮັບທຶນສະໜັບສະໜູນ ຈາກໂຄງການ ບໍລິການ-ສົ່ງເສີມກະສິກໍາຮອບດ້ານ (LURAS).

**************

ພາບ: ສີສະຫວາດ ພັນທຸວົງ ແລະ ທີມງານ ຄະນະວິຊາປະມົງ

ຂ່າວ: ສີສະຫວາດ ພັນທຸວົງ

ກຸ່ມວຽກໂຄສະນາ-ປະຊາສໍາພັນ, ຫ້ອງການພົວພັນ ແລະ ການຮ່ວມມື

ກອງປະຊຸມວິຊາການຄູ້ມຄອງບໍລິຫານຊັບພະຍາກອນທຳມະຊາດທີ່ດີ ແລະ ການປັບໂຕເຂົ້າກັບການປ່ຽນແປງສະພາບດິນຟ້າອາກາດ

ໃນວັນທີ 29-31 ສິງຫາ 2019 ນີ້ຢູ່ທີ່່ຫ້ອງປະຊຸມຂອງວິທະຍາໄລກະສິກໍາ ແລະ ປ່າໄມ້ ພາກເໜືອ ໄດ້ມີກອງປະຊຸມວິຊາການຄູ້ມຄອງບໍລິຫານຊັບພະຍາກອນທຳມະຊາດທີ່ດີ ແລະ ການປັບໂຕເຂົ້າກັບການປ່ຽນແປງສະພາບດິນຟ້າອາກາດ ຂຶ້ນ. ໂດຍການເປັນປະທານຮ່ວມຂອງ ທ່ານ ສົມເພັດ ເພັງຈັນ ຄະນະປະຈໍາພັກ ແຂວງ ຫຼວງພະບາງ, ທ່ານ ປອ. ອຸໄທ ສຸກຂີ ຮອງອຳນວຍການວິທະຍາໄລກະສິກຳ ແລະ ປ່າໄມ້ ພາກເໜືອ, ມີທ່ານ ສີອານຸວົງ ສະຫວັດວົງ ຮອງອະທິການບໍດີ ມະຫາວິທະຍາໄລສຸພານຸວົງ, ມີທ່ານ ອ໋ອດ ດວງພະຈັນ ອໍານວຍການສະມາຄົມຊຸມຊົນສີຂຽວ, ມີຕາງໜ້າຈາກກົມປ່າໄມ້ກະຊວງກະສິກຳ ແລະ ປ່າໄມ້, ຈາກອົງການແມ່ນໍ້ຂອງສາກົນປະຈໍາລາວ, ຈາກພະແນກພະລັງງານ-ບໍ່ແຮ່ ແຂວງຫຼວງພະບາງ, ຈາກພະແນກວິທະຍາສາເຕັກໂນໂລຊີແຂວງຫຼວງພະບາງ ແລະ ແຂກຖືກເຊີນຈາກບັນດາເມືອງອ້ອມຂ້າງແຂວງຫຼວງພະບາງ ພ້ອມດ້ວຍນັກສຶກສາທີ່ກ່ຽວຂ້ອງເຂົ້າຮ່ວມ. ພິທີ ທ່ານ ສົມພັດ ເພັງຈັນ ຄະນະປະຈໍາພັກ ແຂວງ ຫຼວງພະບາງ ໄດ້ກ່າວເປີດກອງປະຊຸມວ່າ ຈຸດປະສົງ ຂອງກອງປະຊຸມທາງວິຊາການໃນຄັ້ງນີ້ ເພື່ອເປັນເວທີ່ສົນທະນາ, ແລກປ່ຽນຄຳຄິດຄຳເຫັນ ຈາກນັກຄົ້ນຄວ້າທາງວິທະຍາສາດ, ນັກພັດທະນາ, ນັກວິຊາການ ລວມໄປເຖິງຜູ້ກຳນົດບັນດາແນວທາງນະໂຍບາຍ ແລະ ຮ່າງລະບຽບກົດໝາຍຕ່າງໆ ເພື່ອນຳໄປສູ່ການປັບປຸງແກ້ໄຂປະກົດການຫຍໍ້ທໍ້ຕ່າງໆໃນສັງຄົມ ໃຫ້ຫຼຸດໜ້ອຍຖອຍລົງເທື່ອລະກ້າວ ພ້ອງທັງກ້າວໄປສູ່ການຄຸ້ມຄອງຊັບພະຍາກອນທຳມະຊາດແບບຍືນຍົງ, ໂປ່ງໃສ, ມີຄວາມເປັນທຳຕໍ່ປະຊາຊົນບັນດາເຜົ່າຢ່າງແທ້ຈິງ. ໃນກອງປະຊຸມ ໄດ້ມີການນໍາສະເໜີບົດລາຍງານຕ່າງໆ ປະກອບມີ 8 ຫົວຂໍ້ ຊຶ່ງໃນນີ້ກ່ຽວກັບລະບຽບກົດໝາຍ, ການອານຸລັກ ປ່າໄມ້ຕ່າງໆໃນລາວ, ສະພາບການປ່ຽນແປງຂອງດິນຟ້າອາກາດໃນປັດຈຸບັນ ແລະ ການສ້າງລາຍໄດ້ຈາກທໍາມະຊາດໂດຍຕິດພັນກັບຊີວິດການເປັນຢູ່ຂອງປະຊາຊົນ. ໃນກອງປະຊຸມດັ່ງກ່າວໄດ້ມີການແລກປ່ຽນຄໍາຄິດເຫັນຈາກຜູ້ທີສົນໃຈ ກັບ ຜູ້ທີ່ນໍາສະເໜີຢ່າງກົງໄປກົງມາ. ຊຶ່ງກອງປະຊຸມດັ່ງກ່າວດໍາເນີນເປັນເວລາ 3 ວັນຈຶ່ງສໍາເລັດ.

************

ພາບ-ຂ່າວ: ສີສະຫວາດ ພັນທຸວົງ

 

ການແຂ່ງຂັນກິລາບານເຕະມິດຕະພາບກັບ ພະແນກກະສິກຳ ແລະ ປ່າໄມ້ ແຂວງຫຼວງພະບາງ

ໃນວັນທີ 24 ສິງຫາ 2019 ໄດ້ມີການແຂ່ງຂັນກິລາບານເຕະມິດຕະພາບ ລະຫວ່າງ ທີມຄູ-ອາຈານ ວິທະຍາໄລກະສິກຳ ແລະ ປ່າໄມ້ ພາກເໜືອ ພົບກັບ ທີມພະແນກກະສິກຳ ແລະ ປ່າໄມ້ ແຂວງຫຼວງພະບາງ,  ໃນການແຂ່ງຂັນກິລາບານເຕະໃນຄັ້ງນີ້ກໍເພື່ອສ້າງຄວາມສາມັກຄີລະຫວ່າງ ວກປໜ ກັບພະແນກກະສິກຳ ແລະ ປ່າໄມ້ແຂວງຫຼວງພະບາງ ພ້ອມທັງເປັນການສ້າງມິດໄມຕີອັນດີງາມໃຫ້ມີຄວາມແໜ້ນແຟ້ນຂຶ້ນກວ່າເກົ່າ.

 

ພາບ-ຂ່າວ: ສີສະຫວາດ ພັນທຸວົງ

 

ຮັບນັກສຶກສາໃໝ່ ສົກປີ 2019-2020

ເປີດຮັບນັກສຶກສາໃໝ່່ ສົກປີ 2019-2020

ຫຼັກສູດຊັ້ນສູງ ກະສິກຳ ແລະ ປ່າໄມ້ ເຂດເນີນສູງ

#ວິທະຍາໄລຂອງພວກເຮົາມີ_5_ສາຂາວິຊາຮຽນຄື:

  1. ສາຂາວິຊາ ລ້ຽງສັດ
  2.  ສາຂາວິຊາ ປູກຝັງ
  3.  ສາຂາວິຊາ ທຸລະກິດກະສິກຳ
  4.  ສາຂາວິຊາ ປ່າໄມ້
  5. ສາຂາວິຊາ ປະມົງ

#ໄລຍະເວລາ: ເລີ່ມຮັບສະໝັກ:26/ 08 / 2019 ເຖິງ 26 / 09 / 2019

  • ສະຖານທີ່ບ່ອນຂໍເອົາໃບສະໝັກ ແລະ ຮັບໃບສະໝັກ: ທີ່ ວິທະຍາໄລກະສິກຳ ແລະ ປ່າໄມ້ ພາກເໜືອ. ຫ້ອງການພັດທະນາວິຊາການ. ເສັ້ນທາງເລກທີ 13 ເໜືອ, ຫຼັກກິໂລແມັດທີ 20, ບ້ານ ວຽງສະຫວັນ, ນະຄອນ ຫຼວງພະບາງ, ແຂວງ ຫຼວງພະບາງ.

👉#ສອບຖາມໄດ້ທີ່:

📞 #ໂທ: 071 219 036 ; 📠 #ແຟັກສ໌: 071 219 034

📱#ມືຖື 020 5537 7750

ການແຂ່ງຂັນກິລາບານເຕະມິດຕະພາບ

IMG_9730

ວັນທີ 14 ສິງຫາ 2019 ໄດ້ມີ ການແຂ່ງຂັນກິລາບານເຕະມິດຕະພາບລະຫວ່າງ ທີມພະນັກງານຄູ-ອາຈານ ວິທະຍາໄລກະສິກຳ ແລະ ປ່າໄມ້ ພາກເໜືອ ພົບກັບ #ນັກສຶກສາ_ລະບົບອະນຸປະລິນຍາ ຮຸ່ນທີ VI #ໂຮງຮຽນການເມືອງ_ການປົກຄອງ_ແຂວງຫຼວງພະບາງ, ຢູທີ່ ເດີ່ນເຕະບານ ວອນທະບີງ, ຊຶ່ງການແຂ່ງຂັນຂັນໃນຄັ້ງນີ້ກໍເພື່ອ ຜູກແໜ້ນຄວາມສາມັກຄີຂອງສອງສະຖາບັນ, ທັງເປັນການສ້າງເຄືອຂ່າຍໃນວຽກງານກິລາ ແລະ ທັງເປັນການຮັກສາສຸຂະພາບຕື່ມອີກ.

———————-

ພາບ-ຂ່າວ: ສີສະຫວາດ ພັນທຸວົງ

 

ສະຫະພັນກຳມະບານ ວິທະຍາໄລກະສິກຳ ແລະ ປ່າໄມ້ ພາກເໜືອ ປະກອບທຶນຊ່ວຍເຫຼືອ ຜູ້ປະສົບໄພນໍ້າຖ້ວມ ທີ່ເມືອງນານ

ວັນທີ 14 ສິງຫາ 2019 ນີ້ ຢູ່ທີ່ຫ້ອງການ ສະຫະພັນກໍາມະບານ ແຂວງຫຼວງພະບາງ, ສະຫະພັນກຳມະບານ ວິທະຍາໄລກະສິກຳ ແລະ ປ່າໄມ້ ພາກເໜືອ ປະກອບທຶນຊ່ວຍເຫຼືອຜູ້ປະສົບໄພນໍ້າຖ້ວມ ທີ່ເມືອງນານ, ໂດຍການມອບຂອງ ທ່ານ ໄຊຄໍາ ສຸກສະນິດ ປະທານ ສະຫະພັນກຳມະບານ ວິທະຍາໄລກະສິກຳ ແລະ ປ່າໄມ້ ພາກເໜືອ ແລະ ຮັບໂດຍ ທ່ານ ສົມເພັດ ວັນນະກອນ ຮອງປະທານຄະນະບໍລິຫານງານ ສະຫະພັນກໍາມະບານ ແຂວງຫຼວງພະບາງ, ທຶນທີ່ມອບໃນຄັງນີ້ມີເງິນສົດຈໍານວນ 700.000 ກີບ. ເພື່ອສົມທົບທຶນທຶນຊ່ວຍເຫຼືອຜູ້ປະສົບໄພນໍ້າຖ້ວມ ທີ່ ເມືອງນານ, ແຂວງຫຼວງພະບາງ.

IMG_9716

*************

ພາບ-ຂ່າວ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື

ວິທະຍາໄລກະສິກຳ ແລະ ປ່າໄມ້ ພາກເໜືອ ມອບເງິນ ແລະ ວັດຖຸປັດໃຈຊ່ວຍເຫຼືອຜູ້ປະສົບໄພນໍ້າຖ້ວມ ທີ່ ເມືອງນານ, ແຂວງຫຼວງພະບາງ

ວັນທີ 8 ສິງຫາ 2019, ຄະນະອໍານວຍການ ວິທະຍາໄລກະສິກຳ ແລະ ປ່າໄມ້ ພາກເໜືອ ພ້ອມດ້ວຍພະນັກງານທີ່ກ່ຽວຂ້ອງ ໄດ້ລົງມອບເງິນ ແລະ ວັດຖຸປັດໃຈຊ່ວຍເຫຼືອຜູ້ປະສົບໄພນໍ້າຖ້ວມ ທີ່ ເມືອງນານ, ແຂວງຫຼວງພະບາງ. ຊຶ່ງພິທີມອບ-ຮັບໄດ້ຈັດຂຶ້ນທີ່ ຫ້ອງວ່າການປົກຄອງ ເມືອງນານ,​ໃຫ້ກຽດມອບໂດຍ ທ່ານ ທອງສະມຸດ ພູມມະສອນ ອໍານວຍການວິທະຍາໄລກະສິກຳ ແລະ ປ່າໄມ້ ພາກເໜືອ ແລະ ໃຫ້ກຽດຮັບໂດຍ ທ່ານ ສີວອນ ວົງຄໍາຈັນ ກໍາມະການພັກແຂວງ ເລຂາພັກເມືອງ ເຈົ້າເມືອງໆນານ. ຊຶ່ງການມອບໃນຄັ້ງນີ້ປະກອບມີ ເງິນສົດຈໍານວນ 4.000.000 ກີບ ແລະ ວັດຖຸປັດໄຈ ມູນຄ່າ 500.000 ກີບ, ລວມມູນຄ່າທັງໝົດ 4.500.000 ກີບ. ຊຶ່ງການລະດົມທຶນໃນຄັ້ງນີ້ ເກີດຂຶ້ນໂດຍການຮ່ວມແຮງຮ່ວມໃຈກັນຂອງພະນັກງານ, ຄູ-ອາຈານ ແລະ ນັກສຶກສາພາຍໃນວິທະຍາໄລ ເພື່ອຊ່ວຍເຫຼືອ ແລະ ອົບອຸ່ນຈິດໃຈຂອງພໍ່ແມ່ປະຊາຊົນທີ່ຖືກຜົນກະທົບຈາກໄພພິບັດໃນຄັ້ງນີ້ໃຫ້ນັບມື້ນັບດີຂຶ້ນ.

*****************

ພາບ-ຂ່າວໂດຍ: ສີສະຫວາດ ພັນທຸວົງ

ສະຫະພັນກຳມະບານ ວິທະຍາໄລກະສິກຳ ແລະ ປ່າໄມ້ ພາກເໜືອ ຮັບສະມາຊິກກຳມະບານໃໝ່

ໃນວັນທີ 2 ສິງຫາ 2019 ນີ້ ຢູ່ທີ່ສະໂມສອນຂອງວິທະຍາໄລກະສິກຳ ແລະ ປ່າໄມ້ ພາກເໜືອ ສະຫະພັນກຳມະບານວິທະຍາໄລກະສິກຳ ແລະ ປ່າໄມ້ ພາກເໜືອ ໄດຈັດພິທີຮັບສະມາຊິກກຳມະບານໃໝ່ຂຶ້ນ. ໂດຍການເປັນປະທານຮ່ວມຂອງ ສະຫາຍ ສົມສີ ຄໍາມະນີວົງ ຄະນະພັກຮາກຖານ, ຮອງອໍານວຍການວິທະຍາໄລ ແລະ ສະຫາຍ ໄຊຄໍາ ສຸກສະນິດ ປະທານສະຫະພັນກໍາມະບານວິທະຍາໄລ, ມີສະມາຊິກກໍາມະບານທີ່ເປັນພະນັກງານ, ຄູ-ອາຈານ ພ້ອມດ້ວຍມະຫາຊົນກ້າວໜ້າເຂົ້າຮ່ວມຢ່າງພ້ອມພຽງ. ພິທີດັ່ງກ່າວ ສະຫາຍ ຈັນທອນ ສີພັນໄຊ ຕາງໜ້ານັກສຶກສາທີ່ເປັນມະຫາຊົນກ້າວໜ້າຂຶ້ນອ່ານໃບຄໍາຮ້ອງຂໍເຂົ້າເປັນສະມາຊິກກໍາມະບານ, ຈາກນັ້ນ ສະຫາຍ ວິລະພົບ ພູທອນ ຮອງປະທານສະຫະພັນກໍາມະບານວິທະຍາໄລຂຶ້ນຜ່ານມະຕິຕົກລົງ ວ່າດ້ວຍການອະນຸມັດຮັບເອົາມະຫາຊົນກ້າວໜ້າເຂົ້າເປັນສະມາຊິກກຳມະບານໃໝ່. ຊຶ່ງມະຫາຊົນກ້າວໜ້າເຂົ້າເປັນສະມາຊິກກໍາມະບານໃນຄັ້ງນີມີທັງໝົດ 215 ສະຫາຍ, ຍິງ 115 ສະຫາຍ. ຈາກນັ້ນ ສະຫາຍ ໄຊຄໍາ ສຸກສະນິດ ປະທານຫະຫະພັນກຳມະບານວິທະຍາໄລ ໄດ້ຂຶ້ນຈັບມີຮັບເອົາສະມາຊິກໃໝ່ ພ້ອມທັງມອບບັດໃຫ້ແກ່ສະມາຊິກກຳມະບານໃໝ່. ໂອກາດດັ່ງກ່າວ ສະຫາຍ ສົມສີ ຄໍາມະນີວົງ ຄະນະພັກຮາກຖານ, ຮອງອໍານວຍການວິທະຍາໄລໄດ້ມີຄໍາເຫັນໂອ້ລົມ ສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ນັກສຶກສາໄດ້ບຸກໜ້າ ບືນຕົວຜ່ານຜ່າຄວາມຫຍຸ້ງຍາກ ແລະ ສ້າງຜົນງານຕ່າງໆ ຈຶ່ງໄດ້ກາຍເປັນມະຫາຊົນກ້າວໜ້າ ກ້າວເຂົ້າເປັນສະມາຊິກກຳມະບານໃນຄັ້ງນີ້ ແລະ ພ້ອມທັງຊົມເຊີຍຜົນງານທີ່ທາງສະຫະພັນກໍາມະບານວິທະຍາໄລຍາດມາໄດ້ໃນໄລຍະຜ່ານມາ ໃນການການສຶກສາອົບຮົມທາງດ້ານການເມືອງແນວຄິດໃຫ້ສະມາຊິກກໍາມະບານ, ເຊື່ອມຊຶມ 5 ເປັນເຈົ້າຂອງກຳມະບານ ແລະ ໃຫ້ທຸກສະຫາຍເຂົ້າຮ່ວມຂະບວນການຕ່າງໆຂອງວຽກງານກໍາມະບານ, ກອງທຶນຊ່ວຍເຫຼືອຊຶ່ງກັນ ແລະ ກັນ. ສະຫາຍຍັງໄດ້ອະທິບາຍຄວາມໝາຍ, ຄວາມສຳຄັນຂອງ ກາໝາຍກຳມະບານລາວ, ໃນຕອນທ້າຍ ສະຫາຍໄດ້ເນັ້ນໜັກໃຫ້ສະມາຊິກກໍາມະບານທຸກສະຫາຍ ໂດຍສະເພາະສະມາຊິກໃໝ່ ໃຫ້ເອົາໃຈໃສ່ຝຶກຝົນຫຼໍ່ຫຼອມຕົນເອງໃຫ້ມີຄວາມຮູ້ ຄວາມສາມາດ, ມີສິນທໍາປະຕິວັດ, ມີຄວາມໂປ່ງໃສ ເພື່ອເປັນແບບຢ່າງທີ່ຂອງອົງການຈັດຕັ້ງມະຫາຊົນ.

ວີດີໂອຂ່າວ

************

ພາບ-ຂ່າວ: ສີສະຫວາດ ພັນທຸວົງ

ກຸ່ມວຽກໂຄສະນາປະຊາສໍາພັນ, ຫ້ອງການພົວພັນ ແລະ ການຮ່ວມມືaddress2