#ໜ່ວຍຊາວໜຸ່ມຄະນະວິຊາປ່າໄມ້_ປະກາດ_4_ບຸກຂອງຊາວໜຸ່ມປະຊາຊົນ_ປະຕິວັດລາວ

ວັນທີ 21 ສິງຫາ 2020 ນີ້ ໜ່ວຍຊາວໜຸ່ມຄະນະວິຊາປ່າໄມ້ ໄດ້ຈັດພິທີປະກາດ 4 ບຸກຂອງຕົນຂຶ້ນ ທີ່ຫ້ອງປະຊຸມຄະນະວິຊາປ່າໄມ້, ວິທະຍາໄລກະສິກຳ ແລະ ປ່າໄມ້ ພາກເໜືອ (ວິທະຍາເຂດຊຽງເງິນ) ໂດຍການເປັນກຽດເຂົ້າຮ່ວມຂອງ ສະຫາຍ ນາງ ແສງມະນີ ເພັດສະວົງ ຮອງເລຂາຄະນະບໍລິຫານງານຊາວໜຸ່ມ ແຂວງຫຼວງພະບາງ, ສະຫາຍ ນິກອນ ສຸດທິວົງ ເລຂາໜ່ວຍພັກ ຄະນະວິຊາປ່າໄມ້, ຄະນະໜ່ວຍຊາວໜຸ່ມ ຄະນະວິຊາປ່າໄມ້, ແຂກຖືກເຊີນ ພ້ອມດ້ວຍ ສະມາຊິກພາຍໃນໜ່ວຍເຂົ້າຮ່ວມທັງໝົດ 29 ສະຫາຍ, ຍິງ 9 ສະຫາຍ.

ໃນພິທີ ສະຫາຍ ຈິດປະເສີດ ພົມມະຈັນ ຮອງເລຂາໜ່ວຍຊາວໜຸ່ມຄະນະວິຊາປ່າໄມ້ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດເນື້ອໃນ ຂໍ້ແຂ່ງຂັນ 4 ບຸກ ປະຈໍາປີ 2019 ແລະ ທິດທາງແຜນການໃນປີ 2020. ຜ່ານການຈັດຕັ້ງປະຕິບັດຂໍ້ແຂ່ງຂັນ 4 ບຸກ ໄດ້ຍົກໃຫ້ເຫັນຜົນງານອັນພົ້ນເດັ່ນຫຼາຍດ້ານເປັນຕົ້ນແມ່ນໄດ້ຖືເອົາວຽກງານການສຶກສາອົບຮົມການເມືອງ-ແນວຄິດເປັນສິ່ງສຳຄັນ, ໂດຍສະເພາະແມ່ນການການເຊື່ອມຊຶມນິຕິກຳຕ່າງໆ ຕາມແນວທາງ ນະໂຍບາຍຂອງພັກ-ລັດ, ການສິດສອນ, ການຂຶ້ນຫ້ອງ, ການຮໍ່າຮຽນ, ການສຶກສາອົບຮົມພືດຕິກໍາສະມາຊິກຊາວໜຸ່ມເປັນແຕ່ລະໄລຍະເປັນປົກກະຕິ, ໄດ້ເອົາໃຈໃສ່ຊອກສະແຫວງຫາຄວາມຮູ້, ຄວາມສາມາດດ້ານວິຊາການຕໍ່ວຽກງານກະສິກໍາ ແລະ ປ່າໄມ້ ເຂດເນີນສູງ ເພື່ອພັດທະນາຕົນເອງໃຫ້ມີຄວາມຮູ້, ສາມາດໄປປະກອບອາຊີບດ້ານກະສິກຳ ແລະ ປ່າໄມ້ ທາງພາກລັດ ແລະ ເອກະຊົນ, ເຮັດທຸລະກິດສ່ວນຕົວໃນທ້ອງຖິ່ນຂອງຕົນເອງ ແລະ ທາງສັງຄົມໄດ້ຢ່າງກ້ວາງຂວາງ, ຄູອາຈານທີ່ເປັນສະມາຊິກຊາວໜຸ່ມໄດ້ສຸມຈິດໃຈເຂົ້າໃນການສ້າງເສດຖະກິດຄອບຄົວຈົນສາມາດກາຍເປັນຄອບຄົວຕົວແບບທີ່ມີຄວາມເຂັ້ມແຂງ. ນອກນັ້ນສະຫາຍຍັງໄດ້ຜ່ານ ທິດທາງແຜນການໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ຂອງໜ່ວຍຊາວໜຸ່ມຄະນະວິຊາປ່າໄມ້ ປີ 2020 ໄດ້ວາງຄາດໝາຍສູ້ຊົນສ້າງໜ່ວຍຊາວໜຸ່ມຄະນະວິຊາປ່າໄມ້ ໃຫ້ກາຍເປັນ ໜ່ວຍຊາວໜຸ່ມ 4 ບຸກ ຕາມເນື້ອໃນທັງ 4 ດ້ານໃຫ້ປະກົດຜົນເປັນຈິງ, ເຮັດໃຫ້ຊາວໜຸ່ມຂອງພວກເຮົາມີຄວາມເຂັ້ມແຂງ ແລະ ໜັກແໜ້ນ ມີຄວາມສາມັກຄີພາຍໃນໃຫ້ແໜ້ນແຟ້ນ, ມີແບບແຜນວິທີການເຮັດວຽກຢ່າງຖືກຕ້ອງ ມີຂະບວນການຟົດຟື້ນ ແລະ ມີປະສິດທິຜົນ.

ໂອກາດດັ່ງກ່າວ ສະຫາຍ ນາງ ແສງມະນີ ເພັດສະວົງ ຮອງເລຂາຄະນະບໍລິຫານງານຊາວໜຸ່ມ ແຂວງຫຼວງພະບາງ ໄດ້ໃຫ້ກຽດໂອ້ລົມ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງໜ່ວຍຊາວໜຸ່ມ ແລະ ໃຫ້ທິດຊີ້ນໍາໃຫ້ເອົາໃຈໃສ່ຖືເອົາການສຶກສາອົບຮົມການເມືອງ-ແນວຄິດເປັນສຳຄັນ, ໂດຍສະເພາະແມ່ນການຮໍ່າຮຽນ, ເຊື່ອມຊຶມແນວທາງນະໂຍບາຍຂອງພັກ-ລັດ, ລະບຽບຂອງວິທະຍາໄລ, ກົດລະບຽບຊາວໜຸ່ມ, ຝຶກຝົນຫຼໍ່ຫຼອມຕົນເອງ, ຍົກລະດັບຄວາມຮູ້ຄວາມສາມາດທາງດ້ານວິຊາສະເພາະ, ສ້າງຄວາມເຂັ້ມແຂງດ້ວຍຕົນເອງເພິ່ງຕົນເອງ ແລະ ມີຄວາມສາມັກຄີເປັນເອກະພາບ ພ້ອມກັນຈັດຕັ້ງປະຕິບັດບັນດາຄາດໝາຍທີ່ໄດ້ວາງໄວ້ໃຫ້ໄດ້ເປັນໜ່ວຍທຸງໄຊນໍາໜ້າໃນອະນາຄົດ.

ພາບ ແລະ ຂ່າວ: ພຸດທະຟົງ ເຮີ  Afong Phouthafong (ນັກຂ່າວ ຄະນະວິຊາປ່າໄມ້)

ພິທີຮັບມະຫາຊົນກ້າວໜ້າເຂົ້າເປັນສະມາຊິກພັກສຳຮອງ

ພິທີຮັບມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ຂອງໜ່ວຍພັກຄະນະວິຊາປ່າໄມ້ ໄດ້ຈັດຂຶ້ນໃນວັນທີ 19 ມິຖຸນາ 2020 ນີ້ ທີ່ຫ້ອງປະຊຸມຄະນະວິຊາປ່າໄມ້ ໂດຍການເປັນປະທານຂອງ ສະຫາຍ ສົມສີ ຄຳມະນີວົງ ຄະນະພັກຮາກຖານວິທະຍາໄລກະສິກຳ ແລະ ປ່າໄມ້ພາກເໜືອ, ມີສະມາຊິກພັກພາຍໃນໜ່ວຍ ແລະ ເລຂາໜ່ວຍພັກອ້ອມຂ້າງເຂົ້າຮ່ວມ.

ໃນພິທີດັ່ງກ່າວ ຄະນະຈັດຕັ້ງພິທີໄດ້ຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍຮັບເອົາມະຫາຊົນກ້າວໜ້າ ເຂົ້າເປັນສະມາຊິກພັກສໍາຮອງ 3 ສະຫາຍ ຄື: ສະຫາຍ ລີ ຊົ່ງ, ສະຫາຍ ທະນູສອນ ສຸລິຍະສັກ ແລະ ສະຫາຍ ນາງ ເພັດສະໝອນ ຍຸດຕິຂັນ ທັງນີ້ກໍເພື່ອເປັນການປະຕິບັດຕາມກົດລະບຽບຂອງພັກປະຊາຊົນປະຕິວັດລາວວາງອອກ, ຈາກນັ້ນ ສະຫາຍ ນິກອນ ສຸດທິວົງ ເລຂາໜ່ວຍພັກຄະນະວິຊາປ່າໄມ້ ໄດ້ຂຶ້ນມອບມະຕິຕົກລົງຂອງຄະນະປະຈໍາພັກແຂວງວ່າດ້ວຍຮັບເອົາມະຫາຊົນກ້າວໜ້າ ເຂົ້າເປັນສະມາຊິກພັກສໍາຮອງ ພ້ອມທັງຈັບມືຮັບເອົາສະມາຊິກພັກສໍາຮອງເຂົ້າໃນໜ່ວຍຂອງຕົນ.

ຕອນທ້າຍພິທີ ສະຫາຍ ສົມສີ ຄຳມະນີວົງ ຄະນະພັກຮາກຖານວິທະຍາໄລກະສິກຳ ແລະ ປ່າໄມ້ພາກເໜືອ ໄດ້ມີຄຳເຫັນຊຶ່ງສະຫາຍໄດ້ສະແດງຄວາມຍ້ອງຍໍ ຊົມເຊີຍສະມາຊິກພັກສໍາຮອງໃໝ່, ເນັ້ນໜັກໃຫ້ເອົາໃຈໃສ່ຄົ້ນຄວ້າຮໍ່າຮຽນກົດລະບຽບຂອງພັກໃຫ້ເລິກເຊິ່ງ, ສືບຕໍ່ຍົກລະດັບຄວາມຮູ້ຄວາມສາມາດຂອງຕົນ ພ້ອມກັນຫ້າວຫັນປະຕິບັດໜ້າທີ່ວິຊາສະເພາະທີ່ການຈັດຕັ້ງມອບໝາຍດ້ວຍຜົນສຳເລັດ.

#ພາບ_ຂ່າວໂດຍ: ພຸດທະຟົງ ເຮີ Afong Phouthafong (ນັກຂ່າວ ຄະນະວິຊາປ່າໄມ້)

ຄະນະວິຊາປ່າໄມ້ສ້າງຂະບວນການອອກແຮງງານລວມ

ວັນທີ 5 ມິຖຸນາ 2020 ນີ້ ຄະນະວິຊາປ່າໄມ້ ວິທະຍາເຂດຊຽງເງິນ ໄດ້ສ້າງຂະບວນການອອກແຮງງານລວມ ໂດຍການນໍາພາຂອງ ອາຈານ ເຢເຮີ ເລຍເລັຍເຊີ ຮອງຫົວໜ້າຄະນະວິຊາປ່າໄມ້, ມີພະນັກງານຄູອາຈານ ແລະ ນັກສຶກສາເຂົ້າຮ່ວມ 20 ກວ່າຄົນ.

ໃນການສ້າງຂະບວນການອອກແຮງງານໃນຄັ້ງນີ້ ໄດ້ຮ່ວມກັນຕັດຫຍ້າ ແລະ ອະນາໄມບໍລິເວນຫ້ອງການ, ອາຄານຮຽນ, ຫ້ອງປະຊຸມ, ຫໍພັກ ແລະ ບໍລິເວນເສັ້ນທາງໜ້າຄະນະວິຊາ ເພື່ອໃຫ້ມີຄວາມສະອາດຮຽບຮ້ອຍ ທັງນີ້ກໍ່ແມ່ນເພື່ອເປັນການສ້າງຂະບວນການອັນສໍາຄັນເນື່ອງໃນວັນສິ່ງແວດລ້ອມໂລກ ເຮັດໃຫ້ສິ່ງແວດລ້ອມພາຍໃນຄະນະວິຊາເປັນສີຂຽວ, ສະອາດງາມຕາ, ຫຼຸດຜ່ອນ ແລະ ປ້ອງກັນໃຫ້ປາສະຈາກມົນລະພິດ ທີ່ສົ່ງຜົນສະທ້ອນອັນບໍ່ດີຕໍ່ລະບົບນິເວດ ປະກອບສ່ວນເຂົ້າໃນການຫຼຸດຜ່ອນສະພາບໂລກຮ້ອນ.

#ພາບ_ຂ່າວໂດຍ: ພຸດທະຟົງ ເຮີ Afong Phouthafong (ນັກຂ່າວ ຄະນະວິຊາປ່າໄມ້)

#ຄະນະວິຊາປ່າໄມ້ ໄດ້ຕ້ອນຮັບການມາຢ້ຽມຢາມຂອງອາດີດນັກສຶກສາ

ວັນທີ 14 ກຸມພາ 2020 ຢູ່ທີ່ຄະນະວິຊາປ່າໄມ້ ( ວິທະຍາເຂດຊຽງເງິນ ) ອາດີດນັກສຶກສາຄະນະວິຊາປ່າໄມ້ ໄດ້ມາຢ້ຽມຢາມພົບປະນໍາໂດຍ ທ່ານ ຄໍາພຸດ ແກ້ວບຸນມາ ຫົວໜ້າຫ້ອງການກະສິກໍາ ແລະ ປ່າໄມ້ ເມືອງໂພນໄຊ ໂດຍໃຫ້ກຽດຕ້ອນຮັບຂອງ ທ່ານ ນິກອນ ສຸດທິວົງ ຫົວໜ້າຄະນະວິຊາປ່າໄມ້ ພ້ອມດ້ວຍພະນັກງານ, ອາຈານ ແລະ ຕາງໜ້າຈາກຂະແໜງການທີ່ກ່ຽວຂ້ອງເຂົ້າຮ່ວມ.

ຈຸດປະສົງຂອງການຢ້ຽມຢາມໃນຄັ້ງນີ້ ເປັນການພົບປະຂອງບັນດາອາດີດນັກສຶກສາຄະນະວິຊາປ່າໄມ້ ທີ່ໄດ້ສໍາເລັດການສຶກສາ ໃນສົກສຶກສາ 1989 – 1993 ໄດ້ກັບຄືນມາຢ້ຽມຢາມພົບປະກັບຄູອາຈານຕົນຂຶ້ນ, ໃນໂອກາດພົບປະຢ້ຽມຢາມຄັ້ງນີ້ ອາດີດນັກສຶກສາໄດ້ຈັດຊື້ອຸປະກອນຮັບໃຊ້ຈໍານວນໜຶ່ງມອບໃຫ້ແກ່ຄະນະວິຊາປ່າໄມ້ ເຊິ່ງ ທ່ານ ຄໍາພຸດ ແກ້ວບຸນມາ ຫົວໜ້າຫ້ອງການກະສິກໍາ ແລະ ປ່າໄມ້ ເມືອງໂພນໄຊ ໄດ້ຂຶ້ນຕາງໜ້າມອບເຄື່ອງກິລາຈໍານວນ 20 ຊຸດ, ໝາກບານຈໍານວນໜຶ່ງ ແລະ ມອບວັດຖຸປັດໃຈຮັບໃຊ້ໃນງານຄັ້ງນີ້ ລວມມູນຄ່າ 3 ລ້ານກວ່າກີບ.

ໃນໂອກາດດັ່ງກ່າວນີ້ ທ່ານ ນິກອນ ສຸດທິວົງ ຫົວໜ້າຄະນະວິຊາປ່າໄມ້ ໄດ້ຕາງໜ້າສະແດງຄວາມຂອບໃຈຢ່າງສູງ ມາຍັງອາດີດນັກສຶກສາ ທີ່ໄດ້ປະກອບສ່ວນວັດຖຸປັດໃຈ ປະກອບເຂົ້າໃນວຽກງານວິຊາສະເພາະຂອງຄະນະວິຊາ. ຈາກນັ້ນອາຈານ ແລະ ອາດີດນັກສຶກສາຍັງໄດ້ສ້າງຂະບວນການຫຼິ້ນກິລາບານເຕະ ແລະ ເປຕັງ ດ້ວຍຄວາມເບີກບານມ່ວນຊື່ນຕື່ມອີກ.

#ພາບ_ຂ່າວໂດຍ: ພຸດທະຟົງ ເຮີ Afong Phouthafong (ນັກຂ່າວ ຄະນະວິຊາປ່າໄມ້)

ການມາແລກປ່ຽນບົດຮຽນຂອງວິທະຍາໄລກະສິກຳ ແລະ ປ່າໄມ້ ສະຫວັນນະເຂດ ຢູ່ທີ່ຄະນະວິຊາປ່າໄມ້

ພິທີພົບປະແລກປ່ຽນບົດຮຽນລະຫວ່າງ ວິທະຍາໄລກະສິກຳ ແລະ ປ່າໄມ້ ສະຫວັນນະເຂດ ແລະ ຄະນະວິຊາປ່າໄມ້ ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ຈັດຂຶ້ນໃນວັນທີ 30 ພະຈິກ 2019 ນີ້ທີ່ ຄະນະວິຊາປ່າໄມ້ ວິທະຍາເຂດຊຽງເງິນ ໂດຍເຂົ້າຮ່ວມຂອງ ທ່ານ ນິກອນ ສຸດທິວົງ ຫົວໜ້າຄະນະວິຊາປ່າໄມ້ ແລະ ທ່ານ ຈໍາປາທອງ ທໍາມະວົງ ຮອງອໍານວຍການວິທະຍາໄລກະສິກຳ ແລະ ປ່າໄມ້ ສະຫວັນນະເຂດ ມີພະນັກງານ ແລະ ອາຈານ ທັງສອງພາກສ່ວນເຂົ້າຮ່ວມ.

ຈຸດປະສົງຂອງການແລກປ່ຽນບົດຮຽນໃນຄັ້ງນີ້ ກໍ່ເພື່ອເປັນການແລກປ່ຽນທາງດ້ານເຕັກນິກວິຊາການ ໃນການຄຸ້ມຄອງການຮຽນການສອນ, ການພັດທະນາເນື້ອໃນການສອນ, ປັບປຸງ ແລະ ຂະຫຍາຍພັນໄມ້, ການຈັດການດ້ານຟາມສາທິດປ່າໄມ້, ການສ້າງລາຍຮັບ ແລະ ດໍາເນີນການຄົ້ນຄວ້າທົດລອງດ້ານປ່າໄມ້, ຈັດຝຶກອົບຮົມ, ການເຮັດພາກປະຕິບັດຕົວຈິງດ້ານງານຟາມ, ພື້ນຖານວັດຖຸເຕັກນິກ, ການວາງແຜນດໍາເນີນການທົດລອງ, ເກັບກໍາຂໍ້ມູນ, ວິເຄາະຂໍ້ມູນທາງສະຖິຕິ, ການສໍາຫຼວດສ້າງແຕ້ມແຜນທີ່ໃນການວາງແຜນຄຸ້ມຄອງປ່າໄມ້ ແລະ ຂຽນບົດລາຍງານຕ່າງໆ ເພື່ອຮັບໃຊ້ການຮຽນການສອນທັງພາກທິດສະດີ ແລະ ພາກປະຕິບັດຕົວຈິງ. ນອກຈາກນັ້ນຍັງໄດ້ມີການແລກປ່ຽນບົດຮຽນດ້ານວຽກງານບໍລິຫານ ໃນການຕິດຕາມເຄື່ອນໄຫວດ້ານບັນຊີການເງິນ, ການສະຫຼຸບລາຍຮັບ-ລາຍຈ່າຍງົບປະມານໃຫ້ຄົບຖ້ວນ, ສ້າງເອກະສານລາຍງານໃຫ້ຖືກຕ້ອງ ເພື່ອໃຫ້ການຄຸ້ມຄອງນໍາໃຊ້ຖືກຕ້ອງຕາມລະບຽບຫຼັກການ ແນໃສ່ເຮັດໃຫ້ລາຍຮັບ-ລາຍຈ່າຍງົບປະມານມີຄວາມໂປ່ງໃສ, ປະຢັດມັດທະຍັດ, ມີປະສິດທິຜົນ, ຍົກສູງຄວາມຮັບຜິດຊອບໃຫ້ໄດ້ຮັບຜົນຕາມລະດັບຄາດໝາຍ.

#ພາບ_ຂ່າວໂດຍ: ພຸດທະຟົງ ເຮີ Afong Phouthafong (ນັກຂ່າວ ຄະນະວິຊາປ່າໄມ້)

☎️ #ໂທ: 071 219 036; 📠#ແຟກສ໌ 071 219 034
Facebook: ວິທະຍາໄລກະສິກຳ ແລະ ປ່າໄມ້ ພາກເໜືອ
📧Email: nafc.luangprabang@gmail.com
🌎Web: www.nafclao.org

ນັກສຶກສາຄະນະວິຊາປ່າໄມ້ໄດ້ຝຶກອົບຮົມທີ່ແຂວງໄຊຍະບູລີ

ວັນທີ 04-06 ທັນວາ 2019 ນີ້ ນັກສຶກສາຄະນະວິຊາປ່າໄມ້ ປີທີ 3 ໄດ້ຮັບການຝຶກອົບຮົມຫົວຂໍ້: “ເຕັກນິກການປ້ອງກັນໄຟໄໝ້ລາມປ່າ” ທີ່ພະແນກກະສິກໍາ ແລະ ປ່າໄມ້ແຂວງໄຊຍະບູລີ ເຂົ້າຮ່ວມໃນພິທີມີ ທ່ານ ພົງແກ້ວ ບຸນຍາວົງ ຫົວໜ້າຂະແໜງປ່າໄມ້ແຂວງ, ທ່ານ ນິກອນ ສຸດທິວົງ ຫົວໜ້າຄະນະວິຊາປ່າໄມ້ ພ້ອມດ້ວຍຄູຝຶກ, ອາຈານ ແລະ ນັກສຶກສາເຂົ້າຮ່ວມ 20 ກວ່າທ່ານ.

ໃນພິທີ ທ່ານ ພົງແກ້ວ ບຸນຍາວົງ ຫົວໜ້າຂະແໜງປ່າໄມ້ແຂວງ ໄດ້ມີຄໍາເຫັນກ່າວເປີດຊຸກຝຶກອົບຮົມນີ້ວ່າ ການປ້ອງກັນ ແລະ ສະກັດກັ້ນໄຟໄໝ້ລາມປ່າ ເປັນວຽກຍຸດທະສາດທີ່ສໍາຄັນໃນການປົກປັກຮັກສາປ່າໄມ້ ໃຫ້ມີຄວາມອຸດົມສົມບູນ ຊຶ່ງສາເຫດຫຼັກທີ່ພາໃຫ້ເກີດມີໄຟໄໝ້ລາມປ່າມີສາເຫດມາຈາກທໍາມະຊາດ ແລະ ມະນຸດສ້າງຂຶ້ນເຊັ່ນ: ຈາກຜູ້ຄົນທີ່ດໍາລົງຊີວິດທີ່ຕິດພັນກັບປ່າໄມ້, ການຈູດພື້ນທີ່ເພື່ອທຳການຜະລິດ, ຈູດໃຫ້ເກີດຫຍ້າເພື່ອລ້ຽງສັດ, ຈູດເພື່ອລ່າສັດ, ຈູດເພື່ອຄວາມສະດວກໃນການເດີນທາງ, ຈູດໂດຍຄົນເຂົ້າໄປພັກແຮມຄືນຢູ່ໃນປ່າ ແລະ ອຶ່ນໆ. ເຫັນໄດ້ວ່າເຫດການໄຟໄໝ້ລາມປ່າຢູ່ບ້ານເມືອງຂອງພວກເຮົາຍັງບໍ່ເຖິງຂັ້ນຮ້າຍແຮງ ເປັນພຽງໄຟໄໝ້ລາມປ່າຕາມປະເພນີປົກກະຕິຊຶ່ງຜູ້ຄົນໄດ້ກະທໍາຕາມລະດູການ ປະເພດຂອງໄຟໄໝ້ປ່າປະກອບມີ 3 ປະເພດຄື: ໄຟໃຕ້ດິນ, ໄຟໜ້າດິນ ແລະ ໄຟເຮືອນຍອດ, ໃນແຕ່ລະປີ ພື້ນທີ່ປ່າໄມ້ຫຼາຍແສນເຮັກຕາຖືກໄຟໄໝ້ປ່າທຳລາຍ ປ່າໄມ້ຫຼາຍລ້ານຕົ້ນໄດ້ດັບສູນ ຊຶ່ງມີຄວາມຫຍຸ້ງຍາກທີ່ຈະແກ້ໄຂ ໃຫ້ພື້ນທີ່ກັບຄືນສູ່ສະພາບເດີມໄດ້ອີກ.

ການຝຶກອົບຮົມຄັ້ງນີ້ໄດ້ຮັບຟັງການບັນຍາຍຫົວຂໍ້ຕ່າງໆເຊັ່ນ: ຄວາມຮູ້ພື້ນຖານກ່ຽວກັບໄຟໄໝ້ປ່າ, ຜົນເສຍຫາຍຂອງໄຟໄໝ້ລາມປ່າ ຕໍ່ສິ່ງແວດລ້ອມ, ວິທີການເຜີຍແຜ່ ການປ້ອງກັນ ແລະ ດັບມອດໄຟໄໝ້ລາມປ່າ, ການຈັດການເຊື້ອໄຟ ການກວດຫາໄຟ ການດັບມອດໄຟ ການນໍາໃຊ້ ແລະ ບໍາລຸງຮັກສາອຸປະກອນດັບມອດໄຟປ່າ, ຄວາມປອດໄພໃນການດັບມອດໄຟປ່າ ແລະ ການນໍາໃຊ້ປະໂຫຍດຈາກໄຟປ່າ. ຜ່ານການຝຶກອົບຮົມໃນຄັ້ງນີເຮັດໃຫ້ນັກສຶກສາໄດ້ມີຄວາມຮັບຮູ້ ແລະ ເຂົ້າໃຈຕໍ່ບັນຫາໄຟໄໝ້ລາມປ່າທີ່ເກີດຕາມລະດູການ ກໍ່ໃຫ້ເກີດຜົນເສຍຫາຍເຮັດໃຫ້ອັດຕາການຈະເລີນເຕີບໂຕ, ເຮັດໃຫ້ຕົ້ນໄມ້ມີບາດແຜ, ຂາດຊ່ວງການສືບພັນທົດແທນ ວັດສະພືດຕ່າງໆໄດ້ຖືກເຜົາໄໝ້, ມີຜົນປ່ຽນແປງໂຄງສ້າງຂອງປ່າ, ດິນເຊື່ອມຄວາມອຸດົມສົມບູນ, ເປັນຜົນເສຍຕໍ່ສັດ ແລະ ສິ່ງທີ່ມີຊີວິດໃນປ່າ ຈຶ່ງເປັນບັນຫາທີ່ສໍາຄັນ ແລະ ຈໍາເປັນຕ້ອງໄດ້ເອົາໃຈໃສ່ປ້ອງກັນໄຟໄໝ້ລາມປ່າ ເຮັດແນວໃດຈະໃຫ້ໄດ້ຮັບຜົນກະທົບໜ້ອຍທີ່ສຸດຕໍ່ກັບປ່າໄມ້.

ນອກຈາກນັ້ນອາຈານ ແລະ ນັກສຶກສາຍັງໄດ້ເຂົ້າທ່ຽວຊົມສູນອະນຸລັກຊ້າງໄຊຍະບູລີ ທີ່ອ່າງນ້ຳຕຽນ ຊຶ່ງໂຄງການດັ່ງກ່າວນີ້ ເປັນໂຄງການທີ່ໃຫ້ການຊ່ວຍເຫຼືອຊ້າງລາວໃນທົ່ວປະເທດ ໂດຍສະເພາະແຂວງໄຊຍະບູລີ ມີຊ້າງກວມເອົາ 70% ຂອງຊ້າງໃນທົ່ວປະເທດ ສູນດັ່ງກ່າວນີ້ໄດ້ສ້າງໂຮງໝໍປິ່ນປົວຊ້າງແຫ່ງທໍາອິດຂອງປະເທດລາວ ປັດຈຸບັນໄດ້ເປີດເປັນແຫຼ່ງທ່ອງທ່ຽວໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດໄດ້ເຂົ້າມາຮຽນຮູ້ກ່ຽວກັບວິຖີຊີວິດຂອງຊ້າງ ທີ່ດໍາລົງຊີວິດຕິດພັນກັບທໍາມະຊາດ.