ວິທະຍາໄລ ກະສິກຳ ແລະ ປ່າໄມ້ ພາກເໜືອ ເພີ່ມປະຊາກອນປາ ສູ່ທໍາມະຊາດ 20,000 ໂຕ

 

ໃນຕອນເຊົ້າ ວັນທີ 13 ກໍລະກົດ 2018 ນີ້ ທີ່ວິທະຍາໄລ ກະສິກຳ ແລະ ປ່າໄມ້ ພາກເໜືອ ໄດ້ຈັດພິທີສະເຫຼີມສະຫຼອງ ວັນປ່ອບປາ ແລະ ວັນອານຸລັກສັດນ້ຳ-ສັດປ່າແຫ່ງຊາດ  ຄົບຮອບ 21 ປີ (13 ກໍລະກົດ 1997-13 ກໍລະກົດ 2018) ແລະ ວັນຄ້າຍວັນເກີດ ຂອງ ປະທານ ສຸພານຸວົງ ຄົບຮອບ 109 ປີ  ຂຶ້ນ. ທີ່ຟາມປະມົງ ຂອງວິທະຍາໄລ, ໂດຍມີ ທ່ານ ປອ. ອຸໄທ ສຸກຂີ ຮອງອຳນວຍການວິທະຍາໄລ ກະສິກຳ ແລະ ປ່າໄມ້ ພາກເໜືອ, ພ້ອມດ້ວຍຫົວໜ້າຫ້ອງການ, ຫົວໜ້າຄະນະວິຊາ, ພ້ອມດ້ວຍນັກສຶກສາພາຍໃນວິທະຍາໄລເຂົ້າຮ່ວມ.

ໃນພິທີ ທ່ານ ອຸໄທ ສຸກຂີ ໄດ້ຜ່ານປະຫວັດຄວາມເປັນມາ ຂອງວັນອານຸລັກສັດນ້ຳ-ສັດປ່າ ທ່ານກ່າວວ່າ: ວັນປ່ອຍປາ ແລະ ວັນອານຸລັກສັດນໍ້າ-ສັດປ່າ ຖືເປັນວັນທີມີຄວາມໝາຍຄວາມສຳຄັນ ທີ່ທາງລັດຖະບານລາວໄດ້ກຳນົດເປັນວັນ ອານຸລັກສັດນໍ້າສັດປ່າແຫ່ງຊາດ ພ້ອມທັງເປັນວັນ  ຄ້າຍວັນເກີດ ຂອງທ່ານ ປະທານ ສຸພານຸວົງ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ເປັນວັນແຫ່ງການສ້າງຂະບວນການ ໃນການປູກຈິດສຳນຶກໃຫ້ແກ່ສັງຄົມໃຫ້ຮູ້ຈັກ ຮັກສາອານຸລັກສັດນໍ້າ-ສັດປ່າ. ໃນຕອນທ້າຍທ່ານຍັງເນັ້ນ ໃຫພະນັກງານ-ຄູອາຈານ ແລະ ນັກສຶກສາທຸກຄົນໃຫ້ມີຈິດສໍານຶກໃນການຄຸ້ມຄອງ ແລະ ປົກປັກຮັກສາ ສັດນໍ້າ-ສັດປ່າ ເພື່ອເພີ່ມຄວາມອຸດົມສົມບູນ, ເພີ່ມຈໍານວນປະຊາກອນປາ ແລະ ສັດໃຫ້ນັບມື້ນັບຫຼາຍຂຶ້ນ ຢູ່ຄູ່ກັບທຳມະຊາດຕະຫຼອດໄປ. ຈາກນັ້ນ ການນຳວິທະຍາໄລ ພ້ອມດ້ວຍພະນັກງານ-ຄູອາຈານ ແລະ ນັກສຶກສາກໍໄດ້ພ້ອມກັນປ່ອຍປາຢ່າງເປັນທາງການ.

ປາທີ່ນຳມາປ່ອຍໃນຄັ້ງນີ້ ທັງໝົດ 20,000 ໂຕ, ໃນນີ້ໄດ້ປ່ອຍລົງ ໜອງສາມຂາ 15,000 ໂຕ,​ ໜອງກໍ່ 3,000 ໂຕ ແລະ ໜອງຫ້ວຍເພ 2,000ໂຕ. ປາທີ່ນຳມາປ່ອຍນີມີ ປາໄນ,​ ປາປາກ, ປານິນ ແລະ ປາອິນເດຍ.

ພາຍຫຼັງພິທີປ່ອຍປາສຳເລັດແລ້ວ ກໍໄດ້ມີກິດຈະກຳ ການແຂ່ງຂັນ ຊ່ວງເຮືອຕື່ມອີກ ຢູ່ທີ່ ໜອງ ສາມຂາ ຂອງວິທະຍາໄລ,​ ເຊິ່ງມີ 4 ສີພາຍ, ມີພະນັກງານ-ຄູອາຈານ ແລະ ນັກສຶກສາເຂົ້າຮ່ວມແຂ່ງຂັນ ທັງໝົດ 10 ທີມ.​ ຜົນປະກົດວ່າ ທີມຊະນະເລີດ ໄດ້ແກ່ ນັກສຶກສາຫ້ອງ ປີ  2 ລ້ຽງສັດ ກໍ ໄດ້ຮັບເງິນສົດ 250,000 ກີບ, ອັນດັບທີ 2 ໄດ້ແກ່ທີມ ນັກສຶກສາຫ້ອງ ປີ 2 ລ້ຽງສັດ ຂໍ ໄດ້ຮັບເງິນສົດຈຳນວນ 200,000 ກີບ ແລະ ທີ່ 3 ໄດ້ແກ່ນັກສຶກສາຫ້ອງ ປີ 1 ຄໍ ໄດ້ຮັບເງິນສົດ 100,000 ກີບ. ໃນງານດັ່ງກ່າວ ມີບັນຍາກາດຝົດຟື້ນ ແລະ ມ່ວນຊື່ນ.

ພາບ-ຂ່າວໂດຍ: ສີສະຫວາດ ພັນທຸວົງ

ວິທະຍາໄລ ກະສິກຳ ແລະ ປ່າໄມ້ ພາກເໜືອ ຈັດພິທີ ປູກຕົ້ນໄມ້ແຫ່ງຊາດ ແລະ ສະເຫຼີມສະຫຼອງວັນເດັກນ້ອຍ ສາກົນ ປະຈຳປີ 2018

ໃນວັນທີ 1 ມິຖຸນາ 2018 ນີ້ ທີ່ ວິທະຍາໄລ ກະສິກຳ ແລະ ປ່າໄມ້ ພາກເໜືອ ໄດ້ຈັດພິທີ ປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ປະຈຳປີ 2018  ຂຶ້ນ. ໂດຍການເປັນປະທານ ຂອງ ທ່ານ ປທ. ທອງສະມຸດ ພູມມະສອນ ອຳນວຍການວິທະຍາໄລ, ມີທ່ານ ນາງ ໂຊກະ ຊ່ຽວຊານຈາກໂຄງການຈັດສັນພູມິທັດ ແຫ່ງປະເທດຍີ່ປູ່ນ, ມີຄະນະອຳນວຍການ, ຫົວໜ້າຫ້ອງການ, ຄະນະວິຊາ, ພ້ອມດ້ວຍພະນັກງານ, ຄູອາຈານ ແລະ ນັກສຶກສາພາຍໃນວິທະຍາໄລເຂົ້າຮ່ວມ. ຈຸດປະສົງ  ກໍເພື່ອເປັນການ ສະເຫຼີມສະຫຼອງວັນປູກຕົ້ນໄມ້ແຫ່ງຊາດ ແລະ ທັງເປັນການ ປູກຈິດສຳນຶກ ໃນການປູກຕົ້ນໄມ້ ໃຫ້ແກ່ ພະນັກງານຄູອາຈານ ແລະ ນັກສຶກສາ.

ໃນພິທີ ທ່ານ ປທ. ທອງສະມຸດ ພູມມະສອນ ໄດ້ກ່າວຄຳເຫັນ ແລະ ກ່າວເປີດພິທີວ່າ: ວັນທີ 1 ມິຖຸນາ ເປັນວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ເຊິ່ງເປັນວັນທີ່ມີຄວາມໝາຍ ຄວາມສຳຄັນຢ່າງຍິ່ງເພື່ອເປັນການປູກຈິດສຳນຶກໃຫ້ພວກເຮົາທຸກຮຸ່ນຄົນ ໄດ້ທົບທວນຄືນເຖິງໃນການເອົາໃຈໃສ່ດູແລເບິ່ງແຍງ ແລະ ສຶກສາອົບຮົມຜູ້ເປັນລູກຫຼານ ເພາະວ່າເດັກນ້ອຍກໍບໍ່ຕາງຫຍັງກັບເບ້ຍໄມ້ນ້ອຍໆທີ່ພ້ອມແລ້ວຈະເລີນເຕີບໂຕ ສ້າງຄວາມມັງຄັ່ງເຂັ້ມແຂງ, ມີຄຸນສົມບັດ, ສາມັກຄີຊ່ວຍເຫຼືອເຊິງກັນ ແລະ ກັນ. ໃນປັດຈຸບັນໂລກກຳລັງປະເຊີນໜ້າກັບໄພໂລກຮ້ອນ ອັນເນື່ອງມາຈາກ ການພັດທະນາອຸດສາຫະກຳຂະໜາດໃຫຍ່ທີ່ແຜ່ຫຼາຍໃນທົ່ວໂລກ. ເພື່ອປະກອບສ່ວນເຂົ້າໃນການຈັດຕັ້ງປະຕິບັດ ຍຸດທະສາດຂອງ ກະຊວງກະສິກຳ ແລະ ປ່າໄມ້ ໃນການເພິ່ມພື້ນທີ່ປົກຫຸ້ມຂອງປ່າໄມ້ໃຫ້ໄດ້ 70 ສ່ວນຮ້ອຍ ໃນປີ 2020 ເວົ້າລວມ ເວົ້າສະເພາະກໍເພື່ອເປັນການເສີມສ້າງວິທະຍາໄລແຫ່ງນີ້ ໃຫ້ມີໂສມໜ້າອັນໃໝ່ ກາຍເປັນສະຖາບັນການສຶກສາ ທີ່ໜ້າຢູ່ ໜ້າຮັກ ແລະ ໜ້າຮຽນ ທີ່ມີພື້ນທີ່ສີຂຽວປະສົມປະສານໄປດ້ວຍດອກໄມ້ນາໆຊະນິດ.

ຕົ້ນໄມ້ທີ່ນຳມາປູກໃນຄັ້ງນີ້ມີ ທັງໝົດ 1,138 ຕົ້ນໃນນີ້ມີ ຕົ້ນກ້ວຍ, ຕົ້ນກາລະພຶກ, ຕົ້ນຝາງແດງຫາງນົກຍຸງ, ຕົ້ນກາກະເລົາ, ຕົ້ນກາເຟ ແລະ ຕົ້ນດອກເຂັມ ສະຖານທີ່ປູກກໍແມ່ນບໍລິເວນໜ້າຫ້ອງການ, ຫ້ອງຮຽນ, ລຽບທາງ ແລະ ຟາມເນີນສູງຂອງວິທະຍາໄລ.

=============================================

ພາບ ແລະ ຂ່າວໂດຍ: ພົມພອນ ໜໍ່ບຸນຕາ; ສີສະຫວາດ ພັນທຸວົງ

ຫ້ອງການ ພົວພັນ ແລະ ການຮ່ວມມື, ວິທະຍາໄລກະສິກຳ ແລະ ປ່າໄມ້ ພາກເໜືອ