ວິທະຍາໄລ ກະສິກຳ ແລະ ປ່າໄມ້ ພາກເໜືອ ຕ້ອນຮັບ ການຢ້ຽມຢາມ ແລະ ແລກປ່ຽນບົດຮຽນ ຂອງ ສະຫະພາບເອີຣົບ (EU)

ໃນຕອນບ່າຍ ຂອງວັນທີ 14 ພຶດສະພາ 2018 ນີ້ ວິທະຍາໄລ ກະສິກຳ ແລະ ປ່າໄມ້ ພາກເໜືອ ໄດ້ໃຫ້ກຽດຕ້ອນຮັບ ຄະນະຜູ້ແທນ ມາຈາກ ສະຫະພາບເອີຣົບ (European Union) ທີ່ມາຢ້ຽມຢາມ-ແລກປ່ຽນບົດຮຽນ, ໂດຍການນຳພາຂອງ ທ່ານ ມາຕິນ ພ້ອມດ້ວຍ ຄະນະ 12 ທ່ານ. ຈຸດປະສົງໃນການມາຢ້ຽມຢາມໃນຄັ້ງນີ້ ເພື່ອຢາກຮູ້ການຈັດຕັ້ງປະຕິບັດຂອງໂຄງການ SURAFCO ທີ່ໄດ້ປະຕິບັດໃນໄລຍະຜ່ານມາ ແລະ ເພື່ອຢ້ຽມຊົມກິດຈະກຳຕ່າງໆຂອງວິທະຍາໄລ. ໃນພິທີ ທ່ານ ປທ. ທອງສະມຸດ ພູມມະສອນ ອຳນວຍການ ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ກ່າວຕ້ອນຮັບ ພ້ອມ ນຳສະເໜີ ປະຫວັດຄວາມເປັນມາ ແລະ ກິດຈະກຳຕ່າງໆຂອງວິທະຍາໄລ. ຈາກນັ້ນ ທ່ານ ນາງ Brieke ຫົວໜ້າໂຄງການ SURAFCO ກໍໄດ້ນຳສະເໜີການຈັດຕັ້ງປະຕິບັດ ແລະ ຜົນສຳເລັດ ຂອງໂຄງການ SURAFCO ໃນໄລຍະທີ່ຜ່ານມາ ແລະ ການປະເມີນນັກສຶກສາທີ່ຮຽນຈົບ ໃນຮຸ່ນທີ 1 ແລະ ທີ່ 2 ຂອງ ວິທະຍາໄລ. ຫຼັງຈາກນັ້ນ ກໍໄດ້ລົງໄປຢ້ຽມຢາມເບິ່ງກິດຈະກຳຟາມແຕ່ລະຟາມ, ຫໍພັກນັກສຶກສາ, ຫ້ອງຈັດລາຍການໂທລະໂຄ່ງຂອງວິທະຍາໄລອີກດ້ວຍ.

=======================================================

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການ ພົວພັນ ແລະ ການຮ່ວມມື, ວິທະຍາໄລ ກະສິກຳ ແລະ ປ່າໄມ້ ພາກເໜືອ

ວິທະຍາໄລ ກະສິກຳ ແລະ ປ່າໄມ້ ພາກເໜືອ ເປີດການສອບເສັງຄັດເລືອກ ເອົາລັດຖະກອນໃໝ່ ສົກປີ 2018

             ໃນວັນທີ່ 4 ພຶດສະພາ 2018 ທີ່ຜ່ານມານີ້ ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ເປີດການສອບເສັງຄັດເລືອກເອົາລັດຖະກອນໃໝ່ຂຶ້ນ ທີ່ ຫ້ອງປະຊຸມຂອງວິທະຍາໄລ, ໂດຍການເປັນປະທານຂອງ ທ່ານ ປທ ທອງສະມຸດ ພູມມະສອນ ອຳນວຍການວິທະຍາໄລ, ມີທ່ານ ວິໄລສັກ ດວງຄຳຊາວ ຕາງໜ້າກົມຈັດຕັ້ງ ແລະ ພະນັກງານ ກະຊວງກະສິກຳ ແລະ ປ່າໄມ້, ມີທ່ານ ພອນສະຫວັດ ສຸກກະເສີມ ຕາງໜ້າພະແນກພາຍໃນ ແຂວງ ຫຼວງພະບາງ, ມີຄະນະກຳມະການສອບເສັງ ແລະ ນັກສອບເສັງເຂົ້າຮ່ວມ. ຈຸດປະສົງໃນການສອບເສັງໃນຄັ້ງນີ້ກໍເພື່ອ ຮັບປະກັນໃຫ້ຖືກຕ້ອງຕາມລະບຽບກົດໝາຍ, ມີຄວາມໂປ່ງໃສ, ເພື່ອຄັດເລືອກໃຫ້ໄດ້ຕາມມາດຖານ ແລະ ວິຊາສະເພາະ.

ໃນພິທີ ທ່ານ ບຸນຈັນ ເລັ່ງສະຫວັດ ຫົວໜ້າຫ້ອງການບໍລິຫານ-ຈັດຕັ້ງ ໄດ້ຂຶ້ນ ຜ່ານລະບຽບການສອບເສັງຂອງນັກສອບເສັງ. ຈາກນັ້ນ ທ່ານ ປທ ທອງສະມຸດ ພູມມະສອນ ອໍານວຍການວິທະຍາໄລ ໄດ້ມີຄຳເຫັນໂອ້ລົມ ແລະ ເປີດການສອບເສັງ ທ່ານໄດ້ຮຽກຮ້ອງໃຫ້ຄະນະກຳມະການ ແລະ ນັກສອບເສັງ ຈົ່ງພ້ອມກັນຈັດຕັ້ງປະຕິບັດໃຫ້ໄດ້ຮັບຜົນດີ, ມີປະສິດທິພາບ ເພຶ່ອເຮັດໃຫ້ການສອບເສັງເຂົ້າເປັນພະນັກງານລັດຖະກອນໃໝ່ຂອງໃນວິທະຍາໄລ ດຳເນີນໄປຢ່າງຖືກຕ້ອງຕາມລະບຽບຫຼັກການ, ມີຄວາມໂປ່ງໃສ, ມີຄວາມຍຸດຕິທຳ, ມີຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ມີປະສິດທິຜົນສູງ. ໃນຕອນທ້າຍທ່ານຍັງເນັ້ນໃຫ້ນັກສອບເສັງ ມີຄວາມອຸ່ນອ່ຽງ ທຸ່ນທ່ຽງ ແລະ ປະຕິບັດຕາມກົດລະບຽບສອບເສັງຢ່າງເຂັ້ມງວດ, ເພຶ່ອເຮັດໃຫ້ຜູ້ສະໝັກສອບເສັງເຂົ້າເປັນລັດຖະກອນແຫ່ງ ສ ປປ ລາວ ເຂົ້າໃຈມີຄວາມຮັບຜິດຊອບ ແລະ ປະຕິບັດຕາມລະບຽບການສອບເສັງທີ່ກຳນົດໄວ້. ການສອບເສັງໃນຄັ້ງນີ້ ມີຄະນະກຳມະການ 8 ທ່ານ ແລະ ນັກສອບເສັງທັງໝົດ 8 ທ່ານ, ຍິງ 4 ທ່ານ. ໃນນີ້ມາຈາກ ພາກວິຊາລ້ຽງສັດ 1 ທ່ານ, ຄະນະວິຊາ ປະມົງ 2 ທ່ານ, ຄະນະວິຊາປ່າໄມ້ (ວິທະຍາເຂດ ຊຽງເງິນ) 4 ທ່ານ ແລະ ຫ້ອງການພົວພັນ ແລະ ການຮ່ວມມື 1 ທ່ານ, ໃນການສອບເສັງໄດ້ຈັດແບ່ງອອກເປັນ 2 ຂັ້ນຕອນຄື: ສອບເສັງແບບຂຽນມີ 25 ຂໍ້, ໃນນີ້ ຄວາມຮູ້ທົ່ວໄປ 5 ຂໍ້, ຄວາມຮູ້ວິຊາການ 20 ຂໍ້ ແລະ ພາກສອບເສັງສອບຖາມແບບປາກເປົ່າ ແມ່ນໄດ້ສຳພາດ ກ່ຽວກັບພາກຄວາມຮູ້ທົ່ວໄປ ແລະ ກ່ຽວກັບພາກວິຊາສະເພາະທີ່ນັກສອບເສັງໄດ້ຮຽນຈົບມາ. ເພຶ່ອຄັດເລືອກເອົາ 2 ຄົນ ຕາມຕົວເລກແບ່ງປັນຂອງ ກະຊວງກະສິກຳ ແລະ ປ່າໄມ້.

=============================================================

ຂ່າວໂດຍ: ສີສະຫວາດ ພັນທຸວົງ

ຖ່າຍພາບໂດຍ: ມະນີຈັນ ສີບົວຄຳ

ຫ້ອງການ ພົວພັນ ແລະ ການຮ່ວມມື, ວິທະຍາໄລ ກະສິກຳ ແລະ ປ່າໄມ້ ພາກເໜືອ

ພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ວິທະຍາໄລ ກະສິກຳ ແລະ ປ່າໄມ້ ພາກເໜືອ ກັບ ມະຫາວິທະຍາໄລ ແມ່ໂຈ້ (ປະເທດໄທ)

ໃນຕອນ​ເຊົ້າ ວັນທີ 19 ເມສາ 2018 ນີ້, ​ໄດ້ມີພິທີຮ່ວມກັນ​ເຊັນ​ບົດ​ບັນທຶກ​ຄວາມ​ເຂົ້າ​ໃຈ (MOU) ຂຶ້ນ, ລະຫວ່າງ ວິທະຍາໄລ ກະສິກຳ ແລະ ປ່າໄມ້ ພາກເໜືອ ກັບ ມະຫາວິທະຍາໄລ ແມ່ໂຈ້ (ປະເທດໄທ) ຢູ່ທີ່ຫ້ອງປະຊຸມ ວິທະຍາໄລກະສິກຳ ແລະ ປ່າໄມ້ ພາກເໜືອ. ໂດຍການເຊັນຂອງ ທ່ານ ປທ. ທອງສະມຸດ ພູມມະສອນ ອຳນວຍການ ວິທະຍາໄລກະສິກຳ ແລະ ປ່າໄມ້ ພາກເໜືອ ກັບ ທ່ານ ປອ. ອາດີສັກ ຈຸນວົງ ແລະ  ທ່ານ ປອ. ໄພສານ ການຈະນະວົງ ຕາງໜ້າໃຫ້ແກ່ ມະຫາວິທະຍາໄລ ແມ່ໂຈ້ (ປະເທດໄທ). ເຂົ້າຮ່ວມເປັນສັກຂີພິຍານໂດຍມີບັນດາຮອງອຳນວຍການວິທະຍາໄລ, ມີບັນດາຫົວໜ້າຫ້ອງການ-ຄະນະວິຊາ, ຮອງຫົວໜ້າຫ້ອງການ-ຄະນະວິຊາ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.

           ການ​ເຊັນ​ບົດ​ບັນທຶກ​ຄັ້ງ​ນີ້ ແມ່ນ​ເພື່ອ ເພີ່ມທະວີ ແລະ ສ້າງຄວາມເຂັ້ມແຂງທາງດ້ານການສຶກສາ ໂດຍສະເພາະແມ່ນ ການແລກປ່ຽນບົດຮຽນດ້ານການການຍົກລະດັບ, ການຝຶກອົບຮົມຂອງຄູ-ອາຈານ, ແລກປ່ຽນພະນັກງານ, ຄູ-ອາຈານ ແລະ ນັກສຶກສາ, ການພົວພັນ-ຮ່ວມມືດ້ານວິຊາການ, ການທັດສະນະສຶກສາ ແລະ ອື່ນໆ ທີ່ເປັນປະໂຫຍດແກ່ສະຖາບັນ ແລະ ສັງຄົມ. ໃນບົດບັນທຶກດັ່ງກ່າວ ມີອາຍຸການນຳໃຊ້ທັງໝົດ 5 ປີ ເຊິ່ງເລີິ່ມແຕ່ 19 ເມສາ 2018 – 19 ເມສາ 2023. ນອກນັ້ນທັງສອງຝ່າຍກໍຍັງໄດ້ມອບເຄື່ອງຂອງທີ່ລະນຶກໃຫ້ເຊິ່ງກັນ ແລະ ກັນ.

==========================================================

ພາບ ແລະ ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື; ວິທະຍາໄລກະສິກຳ ແລະ ປ່າໄມ້ ພາກເໜືອ

ໂທ: 071 219 036; ແຟັກສ໌ : 071 219 034

 

 

ການມາຢ້ຽມຢາມ ແລະ ແລກປ່ຽນບົດຮຽນ ຂອງ ວິທະຍາໄລກະສິກຳ-ປ່າໄມ້ ແຂວງ ເຊິນລາ ,ສາທາລະນະລັດ ສັງຄົມນິຍົມ ຫວຽດນາມ

ວິທະຍາໄລ ກະສິກຳ ແລະ ປ່າໄມ້ ພາກເໜືອ ຕ້ອນຮັບການມາຢ້ຽມຢາມຂອງ ຄະນະນຳ ວິທະຍາໄລກະສິກຳ-ປ່າໄມ້ ແຂວງເຊິນລາ ສສ ຫວຽດນາມ ໃນວັນທີ 4 ເມສາ 2018   ເຊິ່ງນຳໂດຍ ທ່ານ ລິວບິງຄຽມ ອຳນວຍການ ວິທະຍາໄລກະສິກຳ-ປ່າໄມ້ ແຂວງເຊິນລາ. ໃຫ້ກຽດກ່າວຕ້ອນຮັບໂດຍ ທ່ານ ປອ. ອຸໄທ ສຸກຂີ ຮອງອຳນວຍການ ວິທະຍາໄລກະສິກຳ ແລະ ປ່າໄມ້ ພາກເໜືອ ເຊິ່ງຈຸດປະສົງ ຂອງການມາຢ້ຽມຢາມໃນຄັ້ງນີ້ ກໍເພື່ອ ແລກປ່ຽນບົດຮຽນ ແລະ ທັດສະນະສຶກສາ ໃນການຈັດຕັ້ງປະຕິບັດກິດຈະກຳພາຍໃນ ວິທະຍາໄລກະສິກຳ ແລະ ປ່າໄມ້ ພາກເໜືອ. ໃນພິທີ ທ່ານ ປອ. ອຸໄທ ສຸກຂີ ໄດ້ຜ່ານປະຫວັດຄວາມເປັນມາ ຂອງ ວິທະຍາໄລໂດຍຫຍໍ້ ແລະ ກິດຈະກຳຕ່າງໆ ທີ່ໄດ້ປະຕິບັດໃນໄລຍະຜ່ານມາ. ຫຼັງຈາກນັ້ນ ທ່ານ ລິວບິງຄຽມ ກໍໄດ້ຜ່ານປະຫວັດຄວາມເປັນມາຂອງ ວິທະຍາໄລກະສິກຳ – ປ່າໄມ້ ແຂວງ ເຊິນລາ ທ່ານກ່າວວ່າ: ວິທະຍາໄລດັ່ງກ່າວ ເປັນສະຖາບັນອາຊີວະສຶກສາ ທີ່ຂຶ້ນກັບ ແຂວງ ເຊິນລາ ໂດຍກົງ, ເຊິ່ງສິດສອນໃນຫຼັກສູດ ຊັ້ນກາງ, ຊັ້ນສູງ ແລະ ປະລິນຍາຕີ, ໃນປັດຈຸບັນມີນັກສຶກສາທັງໝົດ ໜຶ່ງພັນກ່ວາຄົນ ໃນການສິດສອນນີ້ແມ່ນສິດສອນທັງທິດສະດີ ແລະ ພາກປະຕິບັດ ເຊິ່ງແບ່ງອອກດັ່ງນີ້: ພາກທິດສະດີ 30 ສ່ວນຮ້ອຍ ແລະ ພາກປະຕິບັດຕົວຈິງ 70 ສ່ວນຮ້ອຍ. ໃນພິທີກໍຍັງໄດ້ ສົນທະນາແລກປ່ຽນບົດຮຽນເຊິ່ງກັນ ແລະ ກັນ ເຊັ່ນ: ວິທີການສິດສອນຂອງຄູອາຈານ, ການສະໜອງທຶນໃຫ້ແກ່ນັກສຶກສາ, ການຈ້າງງານຂອງນັກສຶກສາທີ່ຮຽນຈົບ.  ໃນຕອນທ້າຍຄະນະນຳທັງສອງສະຖາບັນ ກໍໄດ້ມອບຂອງຂວັນທີ່ລະນຶກໃຫ້ເຊິ່ງກັນ ແລະ ກັນ. ນອກຈາກນັ້ນ ກໍໄດ້ລົງໄປຢ້ຽມຍາມຟາມ ຂອງວິທະຍາໄລຕື່ມອີກ. ບັນຍາກາດໃນພິທີເຕັມໄປດ້ວຍຄວາມປິຕິຍິນດີ ມີໄມຕີຈິດອັນດີງາມລະຫວ່າງສອງສະຖາບັນ ລາວ – ຫວຽດນາມ.

===========================================================

ຂ່າວ-ພາບໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື, ວິທະຍາໄລກະສິກຳ ແລະ ປ່າໄມ້ ພາກເໜືອ

ກອງປະຊຸມ ເຜີຍແຜ່ກົດລະບຽບກອງທຶນ ຊ່ວຍເຫຼືອເຊິ່ງກັນ ແລະ ກັນ ຂອງຮາກຖານຊາວໜຸ່ມ ວກປໜ

ໃນວັນທີ 30 ມີນາ 2018 ທີ່ຜ່ານມານີ້ ຢູ່ທີ່ຫ້ອງປະຊຸມຂອງ ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ຈັດກອງປະຊຸມເຜີຍແຜ່ກົດລະບຽບກອງທຶນຊ່ວຍເຫຼືອເຊິ່ງກັນ ແລະ ກັນ ຂອງ ຊາວໜຸ່ມປະຊາຊົນປະຕິວັດລາວຂຶ້ນ ໂດຍການເປັນປະທານຮ່ວມຂອງ ສະຫາຍ ອຸ່ນຄຳ ສຸວັນນະພັນ ເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ແຂວງ ຫຼວງພະບາງ ແລະ ສະຫາຍ ສົມສີ ຄຳມະນີວົງ ຄະນະພັກຮາກຖານປະທານກວດກາພັກ, ຮອງອຳນວຍການວິທະຍາໄລ. ມີເລຂາ, ຮອງຮອງເລຂາ ແລະ ສະມາຊິກທີ່ເປັນພະນັກງານຄູອາຈານເຂົ້າຮ່ວມ. ໃນພິທີ ສະຫາຍ ຫວາຊົງ ຄຳເຮືອງໄຊລືຊົ່ງ ວິຊາການຂະແຫນງກອງທຶນຊ່ວຍເຫຼືອເຊິ່ງກັນ ແລະ ກັນ ຂອງຄະນະບໍລິຫານງານຊາວຫນຸ່ມ ແຂວງ ຫຼວງພະບາງ ໄດ້ຂຶ້ນເຜີຍແຜ່ກົດລະບຽບກອງທຶນຊ່ວຍເຫຼືອເຊິ່ງກັນ ແລະ ກັນ ສະບັບປັບປຸງໃໝ່ ປະກອບມີ 10 ໝວດ, 26 ມາດຕາ ໃນນີ້ກໍເປັນການສ້າງຈິດສຳນຶກ ເປັນເຈົ້າຕົນເອງ, ເປັນການເຕົ້າໂຮມຄວາມສາມັກຄີ ຂອງສະມາຊິກຊາວໜຸ່ມປະຊາຊົນປະຕິວັດລາວ ທີ່ເປັນພະນັກງານ, ຄູ-ອາຈານພາຍໃນວິທະຍາໄລ, ເປັນການສົ່ງເສີມແນວຄິດປະດິດສ້າງໃນການພັດທະນາຄຽງຄູ່ກັບການຊ່ວຍເຫຼືອເຊິ່ງກັນ ແລະ ກັນ ໃນເວລາຫຍຸ້ງຍາກ, ເຈັບເປັນ ແລະ ເສຍຊີວິດ, ທັງເປັນການທ້ອນໂຮມເງິນ ຄຸ້ມຄອງການນຳໃຊ້ ແລະ ບໍລິຫານງານ. ໃນຕອນທ້າຍ ສະຫາຍ ອຸ່ນຄຳ ສຸວັນນະພັນ ໄດ້ຂຶ້ນໂອລົມ ນອກນັ້ນ ສະຫາຍ ໄດ້ຍົກໃຫ້ເຫັນຄວາມສຳຄັນຂອງກອງທຶນຊ່ວຍເຫຼືອເຊິ່ງກັນ ແລະ ກັນ ທາງດ້ານການເຈັບເປັນ, ຍົກໃຫ້ເຫັນຄວາມສຳຄັນຂອງກອງທຶນ, ໃຫ້ຄຳຄິດເຫັນດ້ານດີ-ດ້ານອ່ອນ ແລະ ສະຫາຍຍັງເນັ້ນໃຫ້ສະມາຊິກຊາວໜຸ່ມ ພາຍໃນວິທະຍາໄລທຸກສະຫາຍ ຫັນມາເປັນສະມາຊິກຂອງກອງທຶນດັ່ງກ່າວ ເພື່ອຈະແກ້ໄຂຄວາມຈຳເປັນ ແລະ ຫຍຸ້ງຍາກໃນຕໍ່ໜ້າ.

====================================================================

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື, ວິທະຍາໄລກະສິກຳ ແລະ ປ່າໄມ້ ພາກເໜືອ

ພິທີເລົ່າມູນເຊື້ອ 2 ວັນປະຫວັດສາດ

ຕອນເຊົ້າຂອງວັນທີ 23 ມີນາ 2018 ທີ່ຜ່ານມານີ້ ຢູ່ທີ່ສະໂມສອນ ຂອງ ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ຈັດພິທີປະຖະກະຖາເລົ່າມູນເຊື້ອ 2 ວັນປະຫວັດສາດ ຂອງຊາດ ແລະ ຂອງພັກ ຄື: ວັນສ້າງຕັ້ງພັກ ປະຊາຊົນປະຕິວັດ​ລາວ ຄົບຮອບ 63 ປີ (22/03/1955-22/03/2018) ​ແລະ ວັນນັກ ຮົບເສຍອົງຄະ ແລະ ສະຫລະຊີບ ເພື່ອປະເທດຊາດ ຄົບຮອບ 72 ປີ (21/03/1946-21/03/2018) ໂດຍ​ໃຫ້ກຽດ​ປະຖະກະຖາ ຂອງ ທ່ານ ສົມສີ ຄຳມະນີວົງ ຮອງອຳນວຍການ ວິທະຍາໄລກະສິກຳ ແລະ ປ່າໄມ້ ພາກເໜືອ. ມີຫົວໜ້າ, ຮອງ ຄະນະວິຊາ ພ້ອມດ້ວຍພະນັກງານ-ຄູອາຈານ ແລະ ນັກສຶກສາ ພາຍໃນວິທະຍາໄລເຂົ້າຮ່ວມ.

​         ໃນໂອກາດ​ດັ່ງກ່າວ, ທ່ານ ສົມສີ ຄຳມະນີວົງ ​ໄດ້ເລົ່າການກຳ​ເນີ​ດ ​ແລະ ​ເຕີບ​ໃຫຍ່​ຂະຫຍາຍຕົວຂອງ​ພັກ, ມູນເຊື້ອທີ່ສະຫງ່າອົງອາດ, ດຸໝັ່ນ ໃນການອອກແຮງງານ, ຄວາມສາມັກຄີ, ຮັກເຊື້ອແພງຊາດ, ມູນເຊື້ອ ວັດທະນະທໍາ ທີ່ ເປັນເອກະລັກອັນດີງາມ ແລະ ອັນທີ່ພົ້ນເດັ່ນກວ່າໝູ່ ແມ່ນມູນເຊື້ອແຫ່ງການຕໍ່ສູ້ ບໍ່ຍອມຈຳນົນ ຕ້ານການຮຸກຮານ ຂອງສັດຕູ ຢ່າງເດັດດ່ຽວໜຽວແໜ້ນ ຂອງ ບັນພະບູລຸດລາວ ໃນການ ທ້ອນໂຮມ, ປົກປັກຮັກສາ ແລະ ສ້າງສາ ປະເທດຊາດ ເພື່ອຄວາມຢູ່ເຢັນເປັນສຸກ ຂອງປະຊາຊົນລາວ ບັນດາເຜົ່າ ໃນ ແຕ່ລະຍຸກແຕ່ລະສະໄໝ. ນັບແຕ່ມື້ສ້າງຕັ້ງພັກ ປະຊາຊົນປະຕິວັດລາວ ໄດ້ກຳນົດອຸດົມການ ຂອງຕົນຢ່າງຈະແຈ້ງ ຄື: ໄດ້ນຳພາປວງຊົນລາວທັງຊາດ ດຳເນີນການ ຕໍ່ສູ້ກູ້ຊາດ ຍາດເອົາເອກະລາດ ແລະ ເສລີພາບມາສູ່ ປະເທດຊາດ ແລະ ສິດເປັນເຈົ້າ ມາສູ່ປະຊາຊົນ, ສ້າງສາປະເທດຊາດ ສູ່ຈຸດໝາຍສັງຄົມນິຍົມ.

ໃນຕອນທ້າຍ, ທ່ານ ສົມສີ ຄຳມະນີວົງ ​ໄດ້​ຍົກ​ໃຫ້​ເຫັນ​​ ເຖິງ​ຄວາມ​ໝາຍ​ຄວາມ​ສຳຄັນ ​ຂອງວັນ​ທີ 21 ມີນາ 1946, ​ເຊິ່ງ ​ເປັນ​ວັນ​ນັກຮົບເສຍອົງຄະ ແລະ ສະຫລະຊີບ ຕໍ່​ພວກ​ລ່າ​ເມືອງ​ຂຶ້ນ​ຝຣັ່ງ ຜູ້​ຮຸກ​ຮານ ​ແລະ ຍັງ​ເປັນ​ວັນ​ສາມັກຄີ​ ຕໍ່ສູ້​ດ້ວຍ​ເລືອດ​ເນື້ອ​ ເປັນຕາ​ຍນຳ​ກັນ ​ລະ​ຫວ່າງ 2 ຊາດ ລາວ-ຫວຽດນາມອ້າ​ຍນ້ອງ, ​ເຊິ່ງບັ້ນຮົບ​ທ່າ​ແຂກ​ເຖິງ​ວ່າ ​ຈະ​ບໍ່​ໄດ້​ຮັບ​ໄຊຊະນະ ​ແລະ ຖືກ​ນອງ​ເລືອດ ​ແຕ່​ເປັນ​ການ ​ປຸກລະດົມນ້ຳ​ໃຈ​ຮັກ​ຊາດ, ຄຽດ​ແຄ້ນ​ສັດຕູ ຕ້ານ​ການ​ຮຸກ​ຮານ ​ຂອງ​ພວກ​ລ່າ​ ເມືອງ​ຂຶ້ນ​ຝຣັ່ງ, ພ້ອມ​ທັງ​ຍັງ​ພິສູດ​ໃຫ້​ເຫັນ ​ເຖິງ​ຄວາມ​ສະຫລາດ, ຄວາມ​ເກັ່ງ​ກ້າ​ສາມາດ ​ແລະ ມີ​ໄຫວ​ພິບ​  ໃນ​ການ​ຊີ້​ນຳ ​ແລະ ບັນຊາ​ຮົບ​ຂອງ​ກຳລັງ ​ປະຕິວັດ​ລາວ.

=======================================================================

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື, ວິທະຍາໄລກະສິກຳ ແລະ ປ່າໄມ້ ພາກເໜືອ

 

ພິທີປິດຊຸດຝຶກອົບຮົມ ຫຼັກສູດເຕັກນິກວິຊາຊີບລະດັບ 1 ຮຸ່ນທີ II

ການຝຶກອົບຮົມເຕັກນິກວິຊາຊີບໄດ້ປິດລົງ ໃນວັນທີ 16 ມີນາ 2018 ນີ້ ທີ່ ຫ້ອງປະຊຸມວິທະຍາໄລກະສິກຳ ແລະ ປ່າໄມ້ ພາກເໜືອ ໂດຍການເປັນປະທານ ຂອງທ່ານ ປທ. ທອງສະມຸດ ພູມມະສອນ ອຳນວຍການວິທະຍາໄລກະສິກຳ ແລະ ປ່າໄມ້ ພາກເໜືອ, ທ່ານ ປອ. ອຸໄທ ສຸກຂີ, ທ່ານ ປທ. ສົມສີ ຄຳມະນີວົງ ຮອງອຳນວຍການວິທະຍາໄລ,​ ມີຄູອາຈານ,  ຄູປະຈຳຫ້ອງ ແລະ ນັກສຶກສາ ທີ່ກ່ຽວຂ້ອງເຂົ້າຮ່ວມ. ໃນພິທີ ທ່ານ ອາຈານ ອຳໄພວັນ ສຸກສັນຕິ ຂຶ້ນຜ່ານສະພາບໃນໄລຍະການຝຶກອົບຮົມ ແລະ ສັງລວມການຝຶກອົບຮົມ ທ່ານກ່າວບາງຕອນວ່າ ການຝຶກອົບຮົມນີ້ ແມ່ນການຮ່ວມມືລະຫວ່າງ ວິທະຍາໄລກະສິກຳ ແລະ ປ່າໄມ້ ພາກເໜືອ ກັບໂຄງການ VELA  ໂດຍການຮັບເອົານັກຮຽນທີ່ຈົບປະຖົມ(ປໍ5) ຫຼື ບໍ່ຈົບມັດທະຍົມ ເຂົ້າມາຝຶກອົບນຮົມໃນຫຼັກສູດເຕັກນິກວິຊາຊີບ ລະດັບ 1 ທີ່ວິທະຍາໄລກະສິກໍາ ແລະ ປ່າໄມ້ ພາກເໜືອ ໃນໄລຍະການຝຶກອົບຮົມ 3 ເດືອນ.

ການຝຶກອົບຮົມຄັ້ງນີ້ ມີນັກສຳມະນາກອນ ທັງໝົດ 17 ຄົນ, ຍິງ 5 ຄົນ. ໃນນັ້ນ ສາຂາວິຊາລ້ຽງສັດ ແລະ ການປະມົງ 10 ຄົນ, ຍິງ 4 ຄົນ ແລະ ສາຂາວິຊາປູກຝັງ 7 ຄົນ, ຍິງ 3 ຄົນ. ໃນຕອນທ້າຍ ທ່ານ ປທ. ທອງສະມຸດ ພູມມະສອນ ອໍານວຍການວິທະຍາໄລໄດ້ຂຶ້ນມອບໃບຢັ້ງຢືນໃຫ້ແກ່ນັກຮຽນທີ່ຜ່ານການຝຶກອົບຮົມ ແລະ ທ່ານໄດ້ໃຫ້ທິດຊີ້ນຳ ແລະ ປະກອບຄໍາຄິດເຫັນຕໍ່ພິທີ ດັ່ງບາງຕອນທ່ານກ່າວວ່າ: ແນວທາງຂອງພັກ-ລັດ ໃນທີ່ຜ່ານມາ ແລະ ໃນຕໍ່ໜ້າຂະແໜງກະສິກຳ ແລະ ປ່າໄມ້ ເປັນຂະແໜງໜຶ່ງ ທີເປັນຫຼັກ ແລະ ມີຄວາມສຳຄັນຫຼາຍໃນຂົງເຂດເສດຖະກິດຂອງປະເທດເຮົາ ສະນັ້ນ ເພື່ອປະເທດຊາດຫຼຸດພົ້ນ ອອກຈາກຄວາມທຸກຍາກຂອງຄອບຄົວ, ໃນ 80 ສ່ວນຮ້ອຍເປັນຊາວກະສິກອນໄດ້ທຳການປູກ-ການລ້ຽງທາງດ້ານການກະສິກຳ. ໃນຕອນທ້າຍທ່ານໄດ້ເນັ້ນໃຫ້ນັກຮຽນຜູ້ທີ່ຜ່ານການຝຶກອົບຮົມໃຫ້ນຳເອົາຄວາມຮູ້ທີ່ໄດ້ຮຽນມານັ້ນນຳໄປໃຊ້ ແລະ ພັດທະນາທ້ອງຖິ່ນຂອງຕົນໃຫ້ມີຢູ່ມີກິນດີຂຶ້ນເທື່ອລະກ້າວ.

===================================================================

ພາບ ແລະ ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື, ວິທະຍາໄລກະສິກຳ ແລະ ປ່າໄມ້ ພາກເໜືອ

 

ກອງປະຊຸມສະຫລຸບ ຂະບວນການແຂ່ງຂັນ 3 ດີຂອງ ຮາກຖານສະຫະພັນແມ່ຍິງ ວິທະຍາໄລກະສິກຳ ແລະ ປ່າໄມ້ ພາກເໜືອ

 

ຕອນບ່າຍວັນທີ 6 ມີນາ 2018 ຢູ່ທີ່ ສະໂມສອນຂອງ ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ຈັດ ກອງປະຊຸມສະຫຼຸບ ຂະບວນການແຂ່ງຂັນ 3 ດີຂອງ ຮາກຖານສະຫະພັນແມ່ຍິງ ວກປໜ ຂຶ້ນ ໂດຍການເປັນປະທານຮ່ວມ ຂອງ ສະຫາຍ ນາງ ບົວຈັນ ນາມມະວົງ  ຮອງປະທານສະຫະພັນແມ່ຍິງ ແຂວງຫຼວງພະບາງ, ສະຫາຍ ປອ. ອຸໄທ ສຸກຂີ ຮອງເລຂາຄະນະພັກຮາກຖານ ທັງເປັນຮອງອຳນວຍການ ວກປໜ ແລະ ສະຫາຍ ນາງ ເຂັມເພັດ ມະນີຈິດ ປະທານສະຫະພັນແມ່ຍິງ ວກປໜ, ຈຸດປະສົງກໍເພື່ອສະຫຼຸບລາຍງານການຈັດຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງຮາກຖານສະຫະພັນແມ່ຍິງ ວກປໜ ປະຈຳປີ 2017, ແຜນທິດທາງ 2018  ແລະ ເພື່ອຟັງການໂອ້ລົມຂອງຂັ້ນເທິງໃຫ້ຊີທິດເຍືອງທາງ. ໃນພິທີ ກໍໄດ້ຜ່ານໃບອານຸມັດເປີດກອງປະຊຸມສະຫຼຸບຂະບວນການແຂ່ງຂັນ 3 ດີ ຂອງຮາກຖານສະຫະພັນແມ່ຍິງ ວກປໜ ແລະ ຂໍ້ຕົກລົງຍ້ອງຍໍ 3 ດີ ຂອງຮາກຖານ ແລະ ສະມາຊິກສະຫະພັນແມ່ຍິງ ວກປໜ ປະຈຳປີ 2017. ຈາກນັ້ນຕາງໜ້າໜ່ວຍສະຫະພັນແມ່ຍິງແຕ່ລະໜ່ວຍຂຶ້ນຈັບມືແຂ່ງຂັນກັນເພື່ອສືບຕໍ່ໃນການສ້າງຂະບວນການ ແມ່ຍິງ 3 ດີໃນປີຕໍ່ໄປ. ຫຼັງຈາກນັ້ນ ສະຫາຍ ປອ ອຸໄທ ສຸກຂີ ຮອງຄະນະພັກຮາກຖານ ວກປໜ ກໍໄດ້ມອບໃບຍ້ອງຍໍ ໃຫ້ແກ່ສະມາຊິກສະຫະພັນແມ່ຍິງວິທະຍາໄລ ຜູ້ທີ່ມີຜົນງານໃນການຈັດຕັ້ງປະຕິບັດຂໍ້ແຂ່ງຂັນ 3 ດີໃນປີ 2017, ລວມມີ 168 ສະຫາຍ.

ໃນຕອນທ້າຍ ທ່ານ ນາງ ບົວຈັນ ນາມມະວົງ ຮອງປະທານສະຫະພັນແມ່ຍິງ ແຂວງຫຼວງພະບາງ ໄດ້ໃຫ້ຄຳຄິດເຫັນ ແລະ ໃຫ້ຄຳໂອວາດ ຕໍ່ກອງປະຊຸມດັ່ງກ່າວວ່າ: ໃນໄລຍະຜ່ານມາເອື້ອຍນ້ອງແມ່ຍິງລາວບັນດາເຜົ່າ ກໍຄືແມ່ຍິງທົ່ວໂລກ ໄດ້ປະເຊີນໜ້າກັບ ສິ່ງທ້າທາຍຫລາຍຢ່າງ ໃນຄວາມພະຍາຍາມ ຮ່ວມມືກັນຕໍ່ສູ້ແກ້ໄຂ ຄວາມທຸກຍາກ, ພ້ອມທັງສູ້ຊົນ ຊອກທຸກວິທີທາງ ແລະ ກາລະໂອກາດ ທີ່ເໝາະສົມ ໃນການສົ່ງເສີມຄວາມກ້າວໜ້າ ໃຫ້ແມ່ຍິງໄດ້ເຂົ້າເຖິງສິດທິ ແລະ ຜົນປະໂຫຍດ ອັນຊອບທຳຢູ່ໃນຂະບວນການ ພັດທະນາຮອບດ້ານ, ການສ້າງເງື່ອນໄຂ ເພື່ອເຮັດໃຫ້ຊີວິດການເປັນຢູ່ໃນຄອບຄົວ ແລະ ສະພາບແວດລ້ອມລວມທັງໃນໜ້າທີ່ ວຽກງານນັບມື້ ນັບດີຂຶ້ນເທື່ອລະກ້າວ, ນອກນັ້ນ ສະຫາຍຍັງເນັ້ນໃຫ້ຮາກຖານສະຫະພັນແມ່ຍິງ ວກປໜ ໃຫ້ເພີ່ມທະວີການແກ້ໄຂບັນຫາຕ່າງໆກ່ຽວກັບແມ່ຍິງໃນທຸກດ້ານທີ່ຍັງດ້ອຍໂອກາດໃຫ້ມີບົດບາດເທົ່າທຽມກັບເພດຊາຍ, ໃນອົງການຈັດຕັ້ງແມ່ຍິງເປັນຜູ້ປົກປ້ອງສິດ ແລະ ໜ້າທີ່ຂອງແມ່ຍິງ ແລະ ເດັກນ້ອຍໃຫ້ຖືເອົາວຽກງານ 3 ດີ ຂອງສູນກາງແມ່ຍິງລາວວາງອອກເປັນຫຼັກ ເຊັ່ນ: ພົນລະເມືອງດີ, ພັດທະນາດີ ແລະ ສ້າງຄອບຄົວດີ, ໃຫ້ເພີມທະວີໃນການສຶກສາອົບຮົມແນວຄິດການເມືອງຂຶ້ນຕື່ມ ແລະ ໃຫ້ເອົາໃຈໃສ່ໃນການສຶກສາອົບຮົມເລື່ອງວັດທະນະທຳ ແລະ ຮິດຄອງປະເພນີຕື່ມອີກ.

==========================================================================

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື, ວິທະຍາໄລກະສິກຳ ແລະ ປ່າໄມ້ ພາກເໜືອ

ພິທີສະເຫຼີມສະຫຼອງວັນແມ່ຍິງສາກົນ ວັນທີ 8 ມີນາ ຄົບຮອບ 108 ປີ ຂອງ ວິທະຍາໄລກະສິກຳ ແລະ ປ່າໄມ້ ພາກເໜືອ

ຕອນເຊົ້າຂອງ ວັນທີ 6 ມີນາ 2018 ນີ ຢູ່ທີ່ສະໂມສອນຂອງ ວິທະຍາໄລ ກະສິກຳ ແລະ ປ່າໄມ້ ພາກເໜືອ ໄດ້ຈັດພິທີສະເຫຼີມສະຫຼອງ ວັນແມ່ຍິງສາກົນ ທີ 8 ມີນາ ຄົບຮອບ 108 ປີ ຂຶ້ນ ໂດຍການເປັນປະທານຮ່ວມ ຂອງສະຫາຍ ປອ. ອຸໄທ ສຸກຂີ ຮອງຄະນະພັກຮາກຖານ ທັງເປັນຮອງອຳນວຍການ ວິທະຍາໄລ ກະສິກຳ ແລະ ປ່າໄມ້ ພາກເໜືອ  ແລະ ສະຫາຍ ນາງ ເຂັມເພັດ ມະນີຈິດ ປະທານສະຫະພັນແມ່ຍິງ ວກປໜ, ຈຸດປະສົງຂອງກອງປະຊຸມໃນຄັ້ງນີ້ກໍເພື່ອ ເປັນການສະເຫຼີມສະຫຼອງວັນແມ່ຍິງສາກົນ ຄົບຮອບ 108 ປີ  ແລະ ເພື່ອເປັນການທົບທວນປະຫວັດຄວາມເປັນມາຂອງວັນແມ່ຍິງສາກົນໃຫ້ແກ່ສະມາຊິກສະຫະພັນແມ່ຍິງໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງ. ໃນພິທີກໍໄດ້ຜ່ານຂໍ້ຕົກລົງວ່າດ້ວຍການອານຸມັດຈັດກອງປະຊຸມສະເຫຼີມສະຫຼອງວັນແມ່ຍິງສາກົນຄົບຮອບ 108 ປີ ແລະ ຂໍ້ຕົກລົງແຕ່ງຕັ້ງທີມງານສົ່ງເສີມຄວາມກ້ວໜ້າຂອງແມ່ຍິງ, ຫຼັງຈາກນັ້ນ ສະຫາຍ ນາງ ເຂັມເພັດ ມະນີຈິດ ກໍໄດ້ ຂຶ້ນຜ່ານປະຫວັດຄວາມເປັນມາຂອງວັນແມ່ຍິງສາກົນ ສະຫາຍໄດ້ກ່າວວ່າ: ວັນທີ 8 ມີນາ ແມ່ນເຫດການ-ການເມືອງທີ່ສຳຄັນ, ເປັນຂີດໝາຍ ແຫ່ງໄຊຊະນະອັນພື້ນຖານ ຂອງຂະບວນການແມ່ຍິງສາກົນ ໃນການຕໍ່ສູ້ ທວງເອົາສິດຜົນປະໂຫຍດ  ອັນເປັນທຳໃຫ້ແກ່ແມ່ຍິງຊາວຜູ້ອອກແຮງງານ ໃນທົ່ວໂລກ, ເປັນການລະນຶກເຖິງ ການຕໍ່ສູ້ຂອງແມ່ຍິງເພື່ອປົດປ່ອຍຕົນເອງ ແລະ ທວງໃຫ້ ມີສິດສະເໝີພາບ, ປະຊາທິປະໄຕ ຄື ກັນກັບເພດຊາຍ, ທວງໃຫ້ພວກນາຍທຶນແກ້ໄຂຊີວິດການເປັນຢູ່ ພາຍໃຕ້ຄຳຂວັນ “ຜູ້ໜຶ່ງເຮັດວຽກມື້ລະ 8 ຊົ່ວໂມງ, ແມ່ຍິງ ແລະ ຜູ້ຊາຍເຮັດວຽກຄືກັນ ຕ້ອງໄດ້ຮັບເງິນເດືອນເທົ່າກັນ, ຕ້ອງມີລະບົບປ້ອງກັນ ສຸຂະພາບຂອງແມ່ຍິງ ແລະ ເດັກນ້ອຍ, ຕ້ານສົງຄາມຮຸກຮານ, ປົກປັກຮັກສາ ສັນຕິພາບໂລກ”. ນັບແຕ່ນັ້ນມາ ວັນທີ 8 ມີນາ ຈຶ່ງເປັນວັນແມ່ຍິງສາກົນ ແລະ ມາຮອດປີນີ້ ກໍຄົບຮອບ 108 ປີ ຕັ້ງແຕ່ ( 8/3/1910 – 8/3/2018), ພາຍໃຕ້ຄຳຂວັນ ທີ່ວ່າ: “ເຖິງເວລາແລ້ວທີ່ທຸກຄົນ ຮ່ວມມືກັນປັບປຸງຊີວິດການເປັນຢູ່ ຂອງແມ່ຍິງໃນຕົວເມືອງ ແລະ ຊົນນະບົດໃຫ້ດີຂຶ້ນ”.

ຫຼັງຈາກສຳເລັດພິທີແລ້ວກໍໄດ້ຈັດກິດຈະກຳການແຂ່ງຂັນ “ພໍ່ນຸ່ງເຄື່ອງໃຫ້ລູກສາວ”ໃນເມືອເວລາແມ່ບໍ່ຢູ່ວ່າພໍ່ຈະເຮັດໜ້າທີ່ຄືແມ່ຫຼືບໍ່ ແລະ “ແຂ່ງຂັນຕຳໝາກຫຸ່ງ”, ການແຂ່ງຂັນດຳເນີນໄປດ້ວຍບັນຍາກາດອັນເບີກບານມ່ວນຊື່ນ

ຜູ້ເຂົ້າຮວມໃນພິທີດັ່ງກ່າວມີ ສະມາຊິກສະຫະຫະພັນແມ່ຍິງວິທະຍາໄລທີ່ເປັນພະນັກງານ, ຄູອາຈານ ແລະ ນັກສຶກສາ ສອງຮ້ອຍກ່ວາສະຫາຍ


ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື, ວິທະຍາໄລກະສິກຳ ແລະ ປ່າໄມ້ ພາກເໜືອ

ວິທະຍາໄລກະສິກຳ ແລະ ປ ‘າໄມ້ ພາກເໜືອ ສ້າງຂະບວນການຕ້ອນຮັບວັນແມ່ຍິງສາກົນ ທີ 8 ມີນາ ຄົບຮອບ 108 ປີ

ວັນທີ 2 ມີນາ 2018 ນີ້ທີ່ຜ່າມານີ້ ຢູ່ທີ່ເດີ່ນກິລາ ຂອງ ວິທະຍາໄລກະສິກຳ ແລະ ປ່່າໄມ້ ພາກເໜືອ ໄດ້ມີການສ້າງຂະບວນການແຂ່ງຂັນກິລາບານເຕະສາມັກຄີຂຶ້ນ ລະຫວ່າງ ທີມປະສົມຂອງພະນັກງານຄູອາຈານຊາຍ  ພົບກັບ ທີມພະນັກງານຄູອາຈານຍິງ ພາຍໃນວິທະຍາໄລ  ເພື່ອເປັນການສະເຫຼີມສະຫຼອງວັນແມ່ຍິງສາກົນ ທີ 8 ມີນາ ຄົບຮອບ 108 ປີ ແລະ ທັງເປັນການສ້າງຄວາມສາມັກຄີຂອງພະນັກງານ ຄູອາຈານ ຊາຍ ແລະ ຍິງ. ໃນການແຂ່ງຂັນດຳເນີນໄປດ້ວຍບັນຍາກາດອັນຟົດຟື້ນ ແລະ ເບີກບານມ່ວນຊື່ນ. ຜົນຂອງການແຂ່ງຂັນປະກົດວ່າ ທີມພະນັກງານຄູອາຈານ ຍິງ ເປັນຝ່າຍຊະນະ ທີມພະນັກງານຄູອາຈານຊາຍ  5:0

 

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມື, ວິທະຍາໄລກະສິກຳ ແລະ ປ່າໄມ້ ພາກເໜືອ