ກົງສູນໃຫຍ່ ສາທາລະນະລັດ ປະຊາຊົນຈີນ ປະຈຳ ແຂວງຫຼວງພະບາງ ມອບທຶນການສຶກສາໃຫ້ແກ່ຜູ້ທຸກຍາກ ແລະ ດ້ອຍໂອກາດ ທີ ວິທະຍາໄລ ກະສິກຳ ແລະ ປ່າໄມ້ ພາກເໜືອ

ໃນຕອນບ່າຍຂອງ ວັນທີ 31 ສິງຫາ 2018 ທີ່ຜ່ານມານີ້ ຢູ່ທີ່ ຫ້ອງປະຊຸມຂອງ ວິິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ມີພິທີມອບ-ຮັບທຶນການສຶກສາໃຫ້ແກ່ນັກສຶກສາວິທະຍາໄລກະສິກຳ ແລະ ປ່າໄມ້ພາກເໜືອ ຜູ້ທີ່ທຸກຍາກ ແລະ ດ້ອຍໂອກາດ. ໂດຍການເປັນປະທານຂອງທ່ານ ທ່ານ ປທ. ທອງສະມຸດ ພູມມະສອນ ອໍານວຍການວິທະຍາໄລກະສິກຳ ແລະ ປ່າໄມ້ ພາກເໜືອ, ທ່ານ ລີ ບ່າວກວ່າງ ຫົວໜ້າກົງສູນໃຫຍ່ ສາທາລະນະລັດ ປະຊາຊົນຈີນ ປະຈຳ ແຂວງຫຼວງພະບາງ. ມີພະນັກງານ, ຄູ-ອາຈານ ທີ່ກ່ຽວຂ້ອງ ພ້ອມດ້ວຍ ນັກສຶກສາທີ່ໄດ້ຮັບທຶນເຂົ້າຮ່ວມ. ໃນພິທີດັ່ງກ່າວ ທ່ານ ສົມພົງ ຄຳມາລາວົງ ຮອງຫົວໜ້າຫ້ອງການກິດຈະການນັກສຶກສາ ໄດ້ຂຶ້ນລາຍງານການມອບທຶນ ການສຶກສາ ໃຫ້ນັກສຶກສາຜູ້ທຸກຍາກ ແລະ ດ້ອຍໂອກາດ ຈາກກົງສູນໃຫຍ່ ສາທາລະນະລັດ ປະຊາຊົນຈີນ ປະຈຳ ແຂວງຫຼວງພະບາງ ໃຫ້ ນັກສຶກສາຮຸ່ນທີ່ VI ສົກປີ 2016 – 2017 & ນັກສຶກສາຮຸ່ນ VII ສົກປີ 2017 – 2018. ໃນປະຈຸບັນ ວຽກງານການສຶກສາມີບົດບາດ ແລະ ມີຄວາມສໍາຄັນຫລາຍຕໍ່ນັກສຶກສາທຸກຄົນ ກ້າວເຂົ້າສູ່ການພັດທະນາຕົນເອງໃຫ້ມີວຽກເຮັດງານທໍາ ແລະ ການພັດທະນາ ປະເທດຊາດໃຫ້ມີຄວາມກ້າວໜ້າໄປເທື່ອລະດັບ,  ວິທະຍາໄລ ໄດ້ມີການພົວພັນກັບບັນດາອົງການຈັດຕັ້ງ ທາງພາກລັດ ແລະ ພາກເອກະຊົນ ໃນການຊອກຫາແຫຼ່ງທຶນເພື່ອສະໜັບສະໜູນ ນັກສຶກສາ ຜູ້ທີ່ທຸກຍາກ, ເພດ ແລະ ຊົນເຜົ່າໃຫ້ໄດ້ມີໂອກາດໃນການຮັບທຶນການສຶກສາ. ທາງກົງສູນໃຫຍ່ ສປ ຈີນ ປະຈໍາແຂວງຫຼວງພະບາງ ກໍ່ໄດ້ສະໜອງທຶນການສຶກສາໃຫ້ແກ່ນັກສຶກສາຜູ້ດ້ອຍໂອກາດ ທີ່ວິທະຍາໄລກະສິກຳ ແລະ ປ່າໄມ້ ພາກເໜືອ ຈໍານວນ 15 ທຶນ ເປັນມູນຄ່າ 18,000 ໂດລາສະຫະລັດ ຫຼື 144,000,000 ກີບ. ໃນການສະໜັບສະໜູນທຶນເປັນຄັ້ງທີ 3 ຊຶ່ງເລີ່ມແຕ່ ປີ 2016 ເປັນຕົ້ນມາ. ຈາກນັ້ນ ທ່ານ ປທ. ທອງສະມຸດ ພູມມະສອນ ໄດ້ກ່າວຄໍາຂອບໃຈທີ່ທາງ ກົງສູນໃຫຍ່ ສາທາລະນະລັດ ປະຊາຊົນຈີນ ປະຈຳ ແຂວງຫຼວງພະບາງ ໃນການສະໜັບສະໜູນທຶນໃນຄັ້ງນີ້ ທານໄດ້ຮຽກຮ້ອງໃຫ້ຜູ້ສະໜັບສະໜູນທຶນສືບຕໍ່ສະໜັບສະໜູນທຶນໃຫ້ແກ່ນັກສຶກສາໃນຄັ້ງຕໍ່ໆໄປ.         ໃນໂອກາດດັ່ງກ່າວ ທ່ານ ລີ ບ່າວກວ່າງ ໄດ້ມີຄໍາເຫັນ ຕໍ່ກັບນັກສຶກສາທີ່ໄດ້ຮັບທຶນໃນຄັ້ງນີ້ ທ່ານໄດ້ເນັ້ນໜັກໃຫ້ນັກສຶກສາທີ່ໄດ້ຮັບທຶນໃນຄັ້ງນີ້ ຈົ່ງຕັ້ງໃຈສຶກສາຮໍ່າຮຽນ, ຕັ້ງໜ້າຝຶກຝົນຫຼໍ່ຫຼອມຕົນເອງ ໃຫ້ມີຄວາມຮູ້ຄວາມສາມາດ ເພື່ອຈະນໍາເອົາຄວາມຮູ້ດັ່ງກ່າວໄປຜັນຂະຫຍາຍ ຫຼື ໄປພັດທະນາໃນທ້ອງຖິ່ນຂອງຕົນໃຫ້ຈະເລີນຂຶ້ນເລື້ອຍໆ. ໃນຕອນທ້າຍໄດ້ມີການສະແດງສິລະປະວັນນະຄະດີ ຂອງນັກສຶກສາທີ່ໄດ້ຮັບທຶນອີກດ້ວຍ.

==========================================================

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື, ວິທະຍາໄລກະສິກຳ ແລະ ປ່າ

ວິທະຍາໄລກະສິກຳ ແລະ ປ່າໄມ້ ພາກເໜືອ ຕ້ອນຮັບການມາຢ້ຽມຢາມ ແລະ ຖອດຖອນບົດຮຽນ ຂອງນັກສຶກສາທິດສະດີການເມືອງການປົກຄອງ 45 ວັນ

ໃນຕອນບ່າຍຂອງ ວັນທີ 29 ສິງຫາ 2018 ທີ່ ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ຕ້ອນຮັບ ການມາຢ້ຽມຢາມ ແລະ ແລກປ່ຽນບົດຮຽນ ຂອງ ຄະນະນຳ ແລະ ນັກສຶກສາໂຮງຮຽນທິດສະດີການເມືອງການປົກຄອງ ເຊິ່ງນໍາໂດຍ ທ່ານ ບຸນມີ  ວິໄລວົງ ຄະນະພັກນະຄອນ ຫຼວງພະບາງ ຫົວໜ້າຄະນະໂຄສະນາອົບຮົມນະຄອນ-ຫຼວງພະບາງ ແລະ ທ່ານ ຄຳເພັດ ແສງສຸລັດຕະນະ ຮອງອຳນວຍການໂຮງຮຽນທິດສະດີການເມືອງການປົກຄອງ ພ້ອມດ້ວຍນັກສຶກສາທິດສະດີການເມືອງການປົກຄອງ 45 ວັນ ຊຸດທີ III ຈຳນວນ 80 ຄົນ ເຂົ້າຮ່ວມ. ໃນໂອກາດດັ່ງກ່າວ ທ່ານ ບຸນມີ  ວິໄລວົງ ໄດ້ກ່າວຈຸດປະສົງໃນການມາຢ້ຽມຢາມໃນຄັ້ງນີ້ ແມ່ນເພື່ອການແລກປ່ຽນບົດຮຽນກ່ຽວກັບເຕັກນິກການກະສິກຳທີ່ປະຕິບັດຢູ່ໃນວິທະຍາໄລ ແລະ ທັງເປັນການສ້າງສາຍພົວພັນລະຫວ່າງ ວິທະຍາໄລກະສິກຳ ແລະ ປ່າໄມ້ພາກເໜືອ ກັບ ໂຮງຮຽນທິິດສະດີການເມືອງການປົກຄອງ. ຈາກນັ້ນ ທ່ານ ປທ. ທອງສະມຸດ ພູມມະສອນ ອຳນວຍການວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ກ່າວຕ້ອນຮັບອັນອົບອຸ່ນ ພ້ອມທັງຍົກໃຫ້ເຫັນສະພາບຈຸດພິເສດຂອງ ວິທະຍາໄລກະສິກຳ ແລະ ປ່າໄມ້ ພາກເໜືອ ໃຫ້ແກ່ແຂກທີ່ມາຢ້ຽມຢາມ. ຫຼັງຈາກນັ້ນ ທ່ານ ປອ. ອຸໄທ ສຸຂີ ຮອງອຳນວຍການວິທະຍາໄລ ໄດ້ນໍາສະເໜີສະພາບລວມ ແລະ ປະຫວັດຄວາມເປັນມາຂອງວິທະຍາໄລ ພ້ອມທັງເບິ່ງວີດີໂອກ່ຽວກັບວິທະຍາໄລ. ນອກນັ້ນ ທາງນັກສຶກສາການເມືອງການປົກຄອງໄດ້ແລກປ່ຽນບົດຮຽນກ່ຽວກັບເຕັກນິກການກະສິກຳຢ່າງກົງໄປກົງມາ ແລະ ໃນຕອນທ້າຍທາງນັກສຶກສາທິດສະດີການເມືອງການປົກຄອງ 45 ວັນ ກໍໄດ້ມອບອຸປະກອນກິລາໃຫ້ແກ່ ວິທະຍາໄລກະສິກຳ ແລະ ປ່າໄມ້ ພາກເໜືອ ຊຶ່ງປະກອບມີ ບານເຕະ 2 ໜ່ວຍ, ບານສົ່ງ 2 ໜ່ວຍ ແລະ ກະຕໍ້ 2 ໜ່ວຍ. ໃນການມາຢ້ຽມຢາມໃນຄັ້ງນີ້ເປັນການເສີມຂະຫຍາຍ ສາຍພົວພັນມິດຕະພາບ ອັນດີງາມລະຫວ່າງ ວິທະຍາໄລກະສິກຳ ແລະ ປ່າໄມ້ ພາກເໜືອ ແລະ ໂຮງຮຽນທິດສະດີການເມືອງການປົກຄອງ ເຖິງວ່າຈະເປັນຄັ້ງທໍາອິດກໍຕາມແຕ່ມັນກໍສະແດງໃຫ້ເຫັນເຖິງ ມູນເຊື້ອອັນສະໜິດສະໜົມ, ຄວາມສາມັກຄີໃຫ້ແໜ້ນແຟ້ນຍິ່ງໆຂື້ນ.

==================================================

ພາບ-ຂ່າວໂດຍ: ສີສະຫວາດ ພັນທຸວົງ,

ຫ້ອງການພົວພັນ ແລະ ການຮ່ວມມື, ວິທະຍາໄລກະສິກຳ ແລະ ປ່າໄມ້ ພາກເໜືອ

ໜ່ວຍກຳມະບານຮາກຖານ ວິທະຍາໄລກະສິກຳ ແລະ ປ່າໄມ້ ພາກເໜືອ ຮັບສະມາຊິກກຳມະບານຊຸດໃໝ່ ແລະ ເຊື່ອມຊຶມ 5 ເປັນເຈົ້າຂອງກຳມະບານ

ໃນວັນທີ 21 ສິງຫາ 2018 ນີ້ ຢູ່ທີ່ສະໂມສອນຂອງວິທະຍາໄລກະສິກຳ ແລະ ປ່າໄມ້ພາກເໜືອ ໜ່ວຍກຳມະບານຮາກຖານວິທະຍາໄລກະສິກຳ ແລະ ປ່າໄມ່ ພາກເໜືອ ໄດຈັດພິທີຮັບສະມາຊິກກຳມະບານໃໝ່ ແລະ ເຊື່ອມຊຶມ 5 ເປັນເຈົ້າຂອງກຳມະບານ ຂຶ້ນ. ໂດຍການເປັນປະທານຂອງ ສະຫາຍ ສົມເພັດ ວັນນະກອນ ຮອງປະທານສະຫະພັນກຳມະບານ ແຂວງຫຼວງພະບາງ, ມີຄະນະພັກຮາກຖານວິິທະຍາໄລ, ມີພະນັກງານຄູອາຈານ ພ້ອມດ້ວຍມະຫາຊົນກ້າວໜ້າເຂົ້າຮ່ວມຢ່າງພ້ອມພຽງ. ໃນພິທີດັ່ງກ່າວ ສະຫາຍ ໄຊຄຳ ສຸກສະນິດ ຮອງປະທານກຳມະບານຮາກຖານວິທະຍາໄລ ຂຶ້ນຜ່ານຂໍ້ຕົກລົງຂອງປະທານກຳມະບານແຂວງຫຼວງພະບາງ ວ່າດ້ວຍການອະນຸມັດຮັບເອົາມະຫາຊົນກ້າວໜ້າເຂົ້າເປັນສະມາຊິກກຳມະບານໃໝ່. ໜ່ວຍກຳມະບານຮາກຖານ ວິທະຍາໄລກະສິກຳ ແລະ ປ່າໄມ້ ພາກເໜືອ ມີສະມາຊິກທັງໝົດ 83 ສະຫາຍ, ຍິງ 27 ສະຫາຍ, ຊຶ່ງແບ່ງອອກເປັນ 4 ຈຸ. ໃນໄລຍະຜ່ານມານັກສຶກສາໄດ້ບຸກໜ້າບືນຕົວຜ່ານຜ່າຄວາມຫຍຸ້ງຍາກ ແລະ ສ້າງຜົນງານ ຈຶ່ງກາຍເປັນມະຫາຊົນກ້າວໜ້າ ຈົນກ້າວເຂົ້າເປັນສະມາຊິກກຳມະບານ. ໃນຊຸດນີ້ມີມະຫາຊົນກ້າວໜ້າ ທັງໝົດ 273 ສະຫາຍ, ຍິງ 128 ສະຫາຍ. ຈາກນັ້ນ ສະຫາຍ ປອ. ບຸນຊູ ໄຊຊະນະ ປະທານກຳມະບານຮາກຖານວິທະຍາໄລ ຂຶ້ນຈັບມີຮັບເອົາສະມາຊິກໃໝ່ພ້ອມທັງມອບບັດໃຫ້ແກ່ສະມາຊິກກຳມະບານຊຸດໃໝ່.

ຕອນທ້າຍ ສະຫາຍ ສົມເພັດ ວັນນະກອນ ໄດ້ມີຄໍາເຫັນໂອ້ລົມກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍທີ່ທາງຄະນະໜ່ວຍກໍາມະບານວິທະຍາໄລສາມາດຍາດມາໄດ້ໃນໄລຍະຜ່ານມາ ການສືກສາອົບຮົມທາງດ້ານການເມືອງແນວຄິດໃຫ້ສະມາຊີກກໍາມະບານ, ເຊື່ອມຊຶມ 5 ເປັນເຈົ້າຂອງກຳມະບານ ແລະໃຫ້ທຸກສະຫາຍເຂົ້າຮ່ວມຂະບວນການຕ່າງໆຂອງວຽກງານກໍາມະບານ, ກອງທຶນຊ່ວຍເຫຼືອເຊິ່ງກັນ ແລະ ກັນ. ຈາກນັ້ນສະຫາຍໄດ້ອະທິບາຍຄວາມໝາຍ ແລະ ຄວາມສຳຄັນຂອງ ກາໝາຍຂອງກຳມະບານ ແລະ ສະຫາຍໄດ້ເນັ້ນໃຫ້ສະມາຊິກທຸກສະຫາຍໃຫ້ເອົາໃຈໃສ່ຝຶກຝົນຫຼໍ່ຫຼອມຕົນເອງໃຫ້ມີຄວາມຮູ້ຄວາມສາມາດສິນທຳປະຕິວັດ, ມີຄວາມໂປ່ງໃສເພື່ອຮັບໜ້າທີ່ການເມືອງຂອງພັກ ແລະ ວຽກງານວິຊາສະເພາະຂອງພັກ-ລັດໃຫ້ມີປະສິດທິຜົນສູງ ແລະ ໃຫ້ໝັ້ນຄົງຕະຫລອດໄປ.

——————————————————————————-

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື, ວິທະຍາໄລກະສິກຳ ແລະ ປ່າໄມ້ ພາກເໜືອ

ພິທີ ປິດຊຸດຝຶກອົບຮົມເຕັກນິກວິຊາຊີບລະດັບ 1 ຮຸ່ນທີ 3

ໃນຕອນບ່າຍ ຂອງວັນທີ 16 ກໍລະກົດ 2018 ນີ້ ຢູ່ທີ່ ຫ້ອງປະຊຸມວິທະຍາໄລກະສິກຳ ແລະ ປ່າໄມ້ພາກເໜືອ ໄດ້ມີພິທີປິດຊຸດຝຶກອົບຮົມລະດັບ 1 ຮຸ່ນທີ 3 ຂຶ້ນ ໂດຍການເປັນປະທານຂອງ ທ່ານ ປອ. ອຸໄທ ສຸກຂີ ຮອງອຳນວຍການວິທະຍາໄລ. ມີບັນດາຄູອາຈານ, ຄູຝຶກ ແລະ ຄະນະຮັບຜິດຊອບ ພ້ອມດ້ວຍນັກສຳມະນາກອນທັງໝົດ 41 ຄົນ, ຍິງ 18 ຄົນ ເຂົ້າຮ່ວມ.​ ໃນພິທີ ທ່ານ ພູທອນ ຈັນທະວົງສາ ຮອງຫົວໜ້າຄະນະວິຊາປູກຝັງ ຂຶ້ນຜ່ານບົດລາຍງານການຈັດຕັ້ງປະຕິບັດຝຶກອົບຮົມຫຼັກສູດລະດັບ 1 ຮຸ່ນທີ 3 ວ່າ: ຫຼັກສູດດັ່ງກ່າວ ເປັນການຮ່ວມມືລະຫວ່າງ ວິທະຍາໄລະສິກຳ ແລະ ປ່າໄມ້ພາກເໜືອ, ໂຄງການ ເຊີຣາບໂກ ໄລຍະທີ່ສອງ (SURAFCO II) ແລະ ໂຄງການ ວີລາ (VELA) ໂດຍການຮັບເອົານັກຮຽນທີ່ຈົບປະຖົມ ຫາ ມໍ 3 ທີ່ດ້ອຍໂອກາດ ແລະ ຢູ່ເຂດຫ່າງໄກສອກຫຼີກເຂົ້າມາຮຽນເພື່ອເປັນການພັດທະນາສີມື, ຄວາມສາມາດ ທາງດ້ານກະສິກຳ ແລະ ນຳເອົາຄວາມຮູ້ທີ່ໄດ້ຝຶກອົບຮົມ ໄປປະກອບເປັນອາຊີບເສີມ, ອາຊີບຫຼັກໃນອະນາຄົດ ສ້າງລາຍຮັບແກ່ຄອບຄົວ ແລະ ພັດທະນາທ້ອງຖິ່ນຂອງເຂົາຕົນເອງ.

ໃນການຝຶກອົບຮົມໃນຄັ້ງນີ້ ໄດ້ດຳເນີນເປັນເວລາ 3 ເດືອນ, ເຊິ່ງເລີ່ມ ແຕ່ເດືອນ ເມສາ ຫາ ເດືອນ ມິຖຸນາ, ໂດຍມີນັກຝຶກອົບຮົມມາຈາກ 1 ນະຄອນ ແລະ 4 ເມືອງ ຂອງແຂວງ ຫຼວງພະບາງ ເຊັ່ນ: ນະຄອນ-ຫຼວງພະບາງ, ເມືອງຈອມເພັດ, ເມືອງປາກອູ,​ ເມືອງນໍ້າບາກ, ເມືອງງອຍ ແລະ ເມືອງນານ. ການຝຶກອົບຮົມແມ່ນມີ 3 ສາຂາວິຊາຫຼັກຄື: ວິຊາປູກຝັງ, ວິຊາ ລ້ຽງສັດ-ການປະມົງ ແລະ ວິຊາການປຸງແຕ່ງຜົນຜະລິດກະສິກຳ.

ໃນຕອນທ້າຍ ທ່ານ ປອ. ອຸໄທ ສຸກຂີ ໄດ້ມອບໃບຢັ້ງຢືນ ໃຫ້ແກ່ນັກສໍາມະນາກອນ ພ້ອມທັງມີຄໍາເຫັນຕໍ່ພິທີວ່າ:​ ໃຫ້ແຕ່ລະຄົນນຳເອົາຄວາມຮູ້ໄທີ່ໄດ້ຮຽນມານັ້ນໄປປະຕິບັດຢູ່ທ້ອງຖິ່ນຂອງຕົນໃຫ້ເກີດດອກອອກຜົນ ແລະ ໄປເຜີຍແຜ່ໃຫ້ແກ່ປະຊາຊົນພາຍໃນທ້ອງຖິ່ນ ຂອງຕົນໃຫ້ມີອາຊີບທີ່ໝັ້ນຄົງໃນອະນາຄົດ.

ຮູບພາບເພີ່ມເຕີມ

=================================================================

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື. ວິທະຍາໄລກະສິກຳ ແລະ ປ່າໄມ້ ພາກເໜືອ

 

ພິທີ ເຜີຍແຜ່ເອກະສານ ຂອງຂະແໜງຕິດຕໍ່ທາງເພດສຳພັນ

ໃນຕອນເຊົ້າ ວັນທີ 6 ກໍລະກົດ 2018 ນີ້ ຢູ່ທີ່ ສະໂມສອນ ຂອງວິທະຍາໄລ ກະສິກຳ ແລະ ປ່າໄມ້ ພາກເໜືອ ໄດ້ມີພິທີ ການເຜີຍແຜ່ເອກະສານ ກ່ຽວກັບໂລກຕິດຕໍ່ທາງເພດສຳພັນ, ໂດຍການເປັນປະທານຮ່ວມຂອງ ທ່ານ ສົມສີ ຄຳມະນີວົງ ຮອງອຳນວຍການ ວິທະຍາໄລ ກະສິກຳ ແລະ ປ່າໄມ້ ພາກເໜືອ ແລະ ທ່ານ ດຣ ພິຈິດ ເມກດາລາ ຮອງຫົວໜ້າ ຂະແໜງຄວບຄຸມພະຍາດຕິດຕໍ່ທາງເພດສຳພັນ, ພະແນກສາທາລະນະສຸກ, ແຂວງ ຫຼວງພະບາງ, ມີພະນັກງານ-ຄູອາຈານ ແລະ ນັກສຶກສາພາຍໃນວິທະຍາໄລ ເຂົ້າຮ່ວມຮັບຟັງຢ່າງພ້ອມພຽງ. ໃນພິທີ ທ່ານ ສົມສີ ຄຳມະນີວົງ ໄດ້ຮຽກຮ້ອງໃຫ້ ພະນັກງານ-ຄູອາຈານ ແລະ ນັກສຶກສາ ຈົ່ງພ້ອມພຽງກັນຮັບຟັງ ແລະ ແລກປ່ຽນບົດຮຽນ ກັບຂະແໜງຄວບຄຸມພະຍາດຕິດຕໍ່ທາງເພດສຳພັນ ເພື່ອນໍາເອົາບົດຮຽນດັ່ງກ່າວ ໄປເປັນບົດຮຽນ ໃຫ້ແກ່ຕົນເອງ ແລະ ສັງຄົມ ໃນການເອົາຄວາມຮູ້ດັ່ງກ່າວໄປເຜີຍແຜ່ສູ່ຖິ່ນຖານ ຫຼື ບ້ານຂອງຕົນ ໃຫ້ມີຄວາມຮູ້ໃນການປ້ອງກັນພະຍາດດັ່ງກ່າວ. ຫຼັງຈາກນັ້ນ ຂະແໜງຄວບຄຸມພະຍາດຕິດຕໍ່ທາງເພດສຳພັນ ໄດ້ນຳສະເໜີ ຄວາມເປັນມາ ແລະ ສາເຫດ ຂອງພະຍາດເອດ ຫຼື HIV  ແລະ ບົດຮຽນກ່ຽວກັບ ພະຍາດຕິດຕໍ່ທາງເພດສໍາພັນ ແລະ ວິທີການປ້ອງກັນພະຍາດດັ່ງກ່າວ, ໃນຕອນທ້າຍ ນັກສຶກສາຍັງໄດ້ພັດປ່ຽນກັນຂຶ້ນແລກປ່ຽນບົດຮຽນ ກ່ຽວກັບພະຍາດຕິດຕໍ່ທາງເພດສໍາພັນ ແລະ ພະຍາດເອດ. ໃນການມາບັນຍາຍໃນຄັ້ງນີ້ເພື່ອຈະເຮັດໃຫ້ການຕິດເຊື້ອພະຍາດຕິດຕໍທາງເພດສໍາພັນໃຫ້ຫຼຸດໜ້ອຍຖອຍລົງໃນອານາຄົດ.

————————————————————————————-

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື, ວິທະຍາໄລ ກະສິກຳ ແລະ ປ່າໄມ້ ພາກເໜືອ

ການແລກປ່ຽນບົດຮຽນ ການຂຽນຂ່າວ, ການຈັດລາຍການ ຂອງ ທີມງານອາສາສະໝັກຈັດລາຍການ ໂທລະໂຄ່ງ ວກປໜ

ໃນວັນທີ 29 ມິຖຸນາ 2018 ນີ້ ທີມງານ ອາສາສະໝັກໂທລະໂຄງ ຂອງວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ແລກປ່ຽນບົດຮຽນໃນການຂຽນຂ່າວ, ການຈັດລາຍການ ທີ່ ສະຖານີວິທະຍຸກະຈາຍສຽງ ແຂວງຫຼວງພະບາງ. ເຊິ່ງນໍາພາໂດຍ ທ່ານ ຄໍາເຜີຍ ດວງມາລີ ຮອງຫົວໜ້າຫ້ອງການພົວພັນ ແລະ ການຮ່ວມມື ວິທະຍາໄລກະສິກຳ ແລະ ປ່າໄມ້ ພາກເໜືອ. ຜູ້ເຂົ້າຮ່ວມປະກອບມີ ນັກວິຊາການເຕັກນິກ, ວິຊາການຂ່າວສານ-ບົດ, ວິຊາການຈັດລາຍການທັງ 3 ຊົນເຜົ່າ, ມີ ທ່ານ ພູທອນ ພາມີໄຊ ຕາງໜ້າໂຄງການ SURAFCO, ທ່ານ ສີສະຫວາດ ພັນທຸວົງ ພະນັກງານ ຫ້ອງການພົວພັນ ແລະ ການຮ່ວມມື ພ້ອມດ້ວຍ ອາສາສະໝັກທີມງານໂທລະໂຄ່ງ ທັງໝົດ 30 ຄົນ, ຍິງ 8 ຄົນ.

ຈຸດປະສົງຂອງການແລກປ່ຽນບົດຮຽນໃນຄັ້ງນີ້ແມ່ນ ເພື່ອເປັນການແລກປ່ຽນປະສົບການ, ແລກປ່ຽນບົດຮຽນເຊິ່ງກັນ ແລະ ກັນ ບໍ່ວ່າຈະເປັນ ການຂຽນຂ່າວ, ທາງດ້ານທັກສະ, ເຕັກນິກ, ຄວາມກ້າຫານໃນການຈັດລາຍການ. ພ້ອມນັ້ນຍັງເປັນການສ້າງສາຍສຳພັນລະຫວ່າງ ວິທະຍາໄລກະສິກຳ ແລະ ປ່າໄມ້ ພາກ  ເໜືອ ກັບ ສະຖານີວິທະຍຸກະຈາຍສຽງ, ແຂວງຫຼວງພະບາງ. ໃນພິທີ ທ່ານ ນາງ ລັດສະນີ ພົງສະຫວັດ ຮອງອຳນວຍການ ສະຖານນີວິທະຍຸກະຈາຍສຽງ ແຂວງ ຫຼວງພະບາງ ໄດ້ລາຍງານສະພາບການລວມຈັດຕັ້ງປະຕິບັດໂດຍຫຍໍ້ສະຖານນີວ່າ: ສະຖານີວິທະຍຸກະຈາຍສຽງ ແຂວງຫຼວງພະບາງ ແມ່ນກອງວິຊາການໜຶ່ງທີ່ຂຶ້ນກັບ ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງ, ມີຂອບເຂດຮັບຜິດຊອບກວມເອົາ 4 ວຽກງານຄື: ວຽກງານບັນນາທິການລາຍການ 3 ເຜົ່າ, ວຽກງານບັນນາທິການຂ່າວ ແລະ ບົດ, ວຽກງານເຕັກນິກ ແລະ ວຽກງານຄຸ້ມຄອງບໍລິຫານ. ມີບົດບາດສຳຄັນ ໃນການນໍາເອົາຂໍ້ມູນຂ່າວສານ, ແນວທາງ-ນະໂຍບາຍຂອງພັກ-ລັດ, ແຜນພັດທະນາເສດຖະກິດ-ສັງຄົມ, ສາລະໜ້າຮູ້, ຄວາມບັນເທີງເຂົ້າສູ່ຊີວິດຕົວຈິງຂອງປະຊາຊົນບັນດາເຜົ່າ. ໃນການກະຈາຍສຽງມື້ໜຶ່ງ ແບ່ງອອກເປັນສອງພາກ, ມີຊົ່ວໂມງອອກອາກາດ 15 ຊົ່ວໂມງຕໍ່ມື້ ແລະ ອອກອາກາດ 29 ລາຍການຕໍ່ມື້, ມີລາຍການພາກສ່ວນຮ່ວມ ຈາກພະແນກການ, ກົມກອງອ້ອມຂ້າງແຂວງ, ເມືອງ ແລະ ສະຖາບັນການສຶກສາອີກ 20 ລາຍການ, ລວມມີ 56 ລາຍການຕໍ່ອາທິດ. ຈາກນັ້ນ ນັກສຶກສາທີມງານໂທລະໂຄ່ງ ໄດ້ຜັດປ່ຽນກັນຂຶ້ນແລກປ່ຽນບົດຮຽນກັບ ວິຊາການຂອງສະຖານີວິທະຍຸກະຈາຍສຽງ ກ່ຽວກັບເຕັກນິກຂອງການຈັດລາຍການທັງສາມເຜົ່າ, ການຂຽນຂ່າວ ແລະ ບັນຫາອື່ນໆທີ່ພົບໃນການຈັດລາຍການທີ່ວິທະຍາໄລ, ເພື່ອເກັບກຳເອົາຂໍ້ມູນຕົວຈິງ ເຂົ້າໃນການຈັດລາຍການ ໃນລະບົບໂທລະໂຄ່ງຂອງວິທະຍາໄລ ແລະ ເພື່ອນຳເອົາຂໍ້ມູນດັ່ງກ່າວໄປຖ່າຍທອດ ຫຼື ເຜີຍແຜ່ໃຫ້ແກ່ 4 ສະຖາບັນທີ່ຂຶ້ນກັບ ກະຊວງກະສິກຳ ແລະ ປ່າໄມ້ ໃນອະນາຄົດ. ພາຍຫຼັງສຳເລັດການແລກປ່ຽນຂໍ້ມູນແລ້ວ, ໄດ້ເຂົ້າທ່ຽວຊົມເບິ່ງຫ້ອງຈັດລາຍການສົດ, ຫ້ອງອັດລາຍການ, ຫ້ອງກະຈາຍສຽງ ແລະ ຫ້ອງເຮັດວຽກຂອງພະນັກງານວິຊາການຕື່ມອີກ.

ບັນຍາກາດໃນການແລກປ່ຽນຄັ້ງນີ້ ເຕັມໄປດ້ວຍຄວາມກະຕືລືລົ້ນຂອງການເກັບກ່ຽວເອົາ ຄວາມຮູ້ ແລະ ປະສົບການທີ່ນັກສຶກສາຈັດລາຍການ ເພື່ອນຳເອົາຄວາມຮູ້ນັ້ນມາພັດທະນາວຽກງານຂ່າວສານໃນສະຖາບັນໃຫ້ມີປະສິດທິພາບຫຼາຍຂຶ້ນກ່ວາເກົ່າ.

 

————————————————————————————–

ພາບໂດຍ: ຕຸ້ຍ ຈັນທະບຸນທຳ

ຂ່າວໂດຍ: ນໍ້າຝົນ ກຸນນະວົງ

(ນັກສຶກສາ ອາສາສະໝັກ ຈັດລາຍການໂທລະໂຄ່ງ ຮຸ່ນທີ 5 )

 

4 ວິທະຍາໄລ ແລະ 1 ໂຮງຮຽນ ຖອດຖອນບົດຮຽນກ່ຽວກັບ ວຽກງານສະພາທີ່ປຶກສາ ແລະ ວຽກງານພັດທະນາຄູ່ຮ່ວມງານ ຈາກ ວິທະຍາໄລກະສິກຳ ແລະ ປ່າໄມ້ ພາກເໜືອ

ໃນຕອນເຊົ້າຂອງວັນທີ 19 ມິຖຸນາ 2018 ນີ້ ທີ່ຫ້ອງປະຊຸມ ຂອງໂຮງຮຽນ ຊົນລະປະທານ ຊັ້ນສູງ ທ່າງ່ອນ ໄດ້ມີກອງປະຊຸມຖອດຖອນບົດຮຽນກ່ຽວກັບວຽກງານສະພາທີ່ປຶກສາ ແລະ ການພັດທະນາຄູ່ຮ່ວມງານຂອງ 4 ວິທະຍາໄລ ແລະ ໂຮງຮຽນຊົນລະປະທານຊັ້ນສູງທ່າງ່ອນ ໂດຍການເປັນທານຂອງ ທ່ານ ເພັດສະໝອນ ຖານະສັກ ຮອງຫົວໜ້າ ກົມຈັດຕັ້ງ ແລະ ພະນັກງານ ຂອງກະຊວງກະສິກຳ ແລະ ປ່າໄມ້, ມີຫົວໜ້າຫ້ອງການ, ຫົວໜ້າຄະນະວິຊາ ແລະ ຄູອາຈານທີ່ກ່ຽວຂ້ອງຈາກ 4 ສະຖາບັນການສຶກສາ ທີ່ ຂຶ້ນກັບກະຊວງກະສິກຳ ແລະ ປ່າໄມ້ ຄື: ວິທະຍາໄລກະສິກຳ ແລະ ປ່າໄມ້ ຈຳປາສັກ,​ ສະຫວັນນະເຂດ, ບໍລິຄຳໄຊ ແລະ ໂຮງຮຽນ ຊົນລະປະທານ ຊັ້ນສູງທ່າງ່ອນ ເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ເພັດສະໝອນ ຖານະສັກ ໄດ້ກ່າວເປີດພິທີ, ຈາກນັ້ນ ທ່ານ ທອງສະມຸດ ພູມມະສອນ ໄດ້ຜ່ານລາຍງານຂະບວນການສ້າງຕັ້ງສະພາທີ່ປຶກສາ ຕໍ່ມາ ທ່ານ ບຸນຈັນ ເລັ່ງສະຫວັດ ໄດ້ລາຍງານຜົນສຳເລັດ ຂອງການຈັດຕັ້ງກອງປະຊຸມສະພາທີ່ປຶກສາ ຄັ້ງທີ່ 1-3 ຂອງ ວິທະຍາໄລ ກະສິກຳ ແລະ ປ່າໄມ້ ພາກເໜືອ (ວກປໜ) ແລະ ແລກປ່ຽນບົດຮຽນກ່ຽວກັບຂະບວນການ ສ້າງຕັ້ງສະພາທີ່ປຶກສາ, ບົດຮຽນທີ່ຖອດຖອນໄດ້ ຜົນສຳເລັດ, ຂໍ້ສະດວກ, ຂໍ້ຫຍຸ້ງຍາກ, ສິ່ງທ້າທາຍທີ່ພົບເຫັນ, ວິທີການແກ້ບັນຫາ ແລະ ແຜນງານໃນຕໍ່ໜ້າ. ໃນກອງປະຊຸມດັ່ງກ່າວໄດ້ແບ່ງກຸ່ມການຄົ້ນຄວ້າ, ແລກປ່ຽນຄຳຄິດເຫັນບົດຮຽນຂອງວິທະຍາໄລ ແລະ ໂຮງຮຽນ ທີ່ກ່ຽວຂ້ອງຂອງຕົນກ່ຽວກັບ ການກຳນົດຂັ້ນຕອນ ແລະ ວິທີການ ຂອງການສ້າງຕັ້ງສະພາທີ່ປຶກສາ ຂອງແຕ່ລະສະຖາບັນໃຫ້ມີປະສິດທິພາບສູງຂຶ້ນ.

ໃນພິທີດຽວກັນກໍໄດ້ມີການຖອດຖອນບົດຮຽນ ວຽກງານພັດທະນາຄູ່ຮ່ວມງານຂອງ ວິທະຍາໄລ ກະສິກຳ ແລະ ປ່າໄມ້ ພາກເໜືອ, ໃນກອງປະຊຸມໄດ້ນຳສະເໜີ ບົດລາຍງານ ກອງປະຊຸມປະເມີນຄູ່ຮ່ວມງານພາຍໃນ ວກປໜ ທີ່ໄດ້ປະຕິບັດໃນທີ່ຜ່ານມາ ແລ້ວສະມະຊິກກອງປະຊຸມໄດ້ປະກອບຄຳຄິດເຫັນຕໍ່ບົດລາຍງານດັ່ງກ່າວ. ຫຼັງຈາກນັ້ນ ທາງສະຖາບັນທັງ 4 ສະຖາບັນ ນຳສະເໜີ ຄູ່ຮ່ວມງານ ແລະ ປະເມີນຜົນຂອງຄູ່ຮ່ວມງານ ຂອງຕົນ ປັບປຸງໃຫ້ມີປະສິດທິພາບສູງຂຶ້ນ. ໃນກອງປະຊຸມດັ່ງກ່າວ ມີຜູ້ເຂົ້້າຮ່ວມທັງໝົດ 34 ຄົນ, ຍິງ 8 ຄົນ ແລະ ກອງປະຊຸມດັ່ງກ່າວຈະດຳເນີນໄປເປັນເວລາ 3 ວັນຈຶ່ງສຳເລັດ.

ຂຽນຂ່າວໂດຍ: ທິມງານຫ້ອງກນພົວພັນ ແລະ ການຮ່ວມມື

ພິທີສະເຫຼີມສະຫຼອງ ວັນຜູ້ບໍລິຈາກເລືອດໂລກ ທີ່ ວິທະຍາໄລ ກະສິກຳ ແລະ ປ່າໄມ້ ພາກເໜືອ

ວັນທີ 14 ມິຖຸນາ 2018 ນີ້ ອົງການກາແດງລາວ ແຂວງ ຫຼວງພະບາງ ຮ່ວມກັບ ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ຈັດພິທີສະເຫຼີມສະຫຼອງວັນຜູ້ບໍລິຈາກເລືອດໂລກ ຄົບຮອບ 15 ປີຂຶ້ນ. ຢູ່ທີ່ສະໂມສອນ ວິທະຍາໄລກະສິກຳ ແລະ ປ່າໄມ້ ພາກເໜືອ. ໂດຍການເປັນປະທານຮ່ວມ ຂອງທ່ານ ໄຊຍະສັກ ແກ້ວປັນຍາ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມ, ດຣ. ວຽງສະຫວັນ ກະເສີມສຸກ ຫົວໜ້າອົງການກາແດງລາວ ແຂວງຫຼວງພະບາງ, ທ່ານ ປທ. ທອງສະມຸດ ພູມມະສອນ ອຳນວຍການ ວິທະຍາໄລກະສິກຳ ແລະ ປ່າໄມ້ ພາກເໜືອ, ທ່ານ ດຣ. ທອງພຸດ ສຸກກະເສີມ ອຳນວຍການໂຮງໝໍ ແຂວງ ຫຼວງພະບາງ. ມີອົງການຈັດຕັ້ງຂັ້ນແຂວງພອມດ້ວຍພະນັກງານ, ຄູອາຈານ ແລະ ນັກສຶກສາພາຍໃນ ວິທະຍາໄລກະສິກຳ ແລະ ປ່າໄມ້ ພາກເໜືອເຂົ້າຮ່ວມ.

ໃນພິທີ ທ່ານ ດຣ. ວຽງສະຫວັນ ກະເສີມສຸກ ໄດ້ກ່າວວ່າ: ໃນແຕ່ລະປີ ໄດ້ມີການຈັດຕັ້ງສະເຫຼີມສະຫຼອງວັນຜູ້ບໍລິຈາກເລືອດໂລກຂຶ້ນ ດ້ວຍການເຂົ້າຮ່ວມຂອງຊັ້ນຄົນຕ່າງໆໃນຫຼາຍປະເທດໃນທົ່ວໂລກ ແລະ ເປັນວັນທີ່ສຳຄັນທີ່ສຸດຂອງຜູ້ບໍລິຈາກເລືອດທັງຫຼາຍໃນໂລກເວົ້າລວມ ເວົ້າສະເພາະ ສ ປ ປ ລາວ. ເຊິ່ງວັນບໍລິຈາກເລືອດໂລກ ໄດ້ສ້າງຕັ້ງຂຶ້ນໃນປີ 2004 ໂດຍການເຫັນດີຂອງ ສີ່ອົງການຈັດຕັ້ງສາກົນເຊັ່ນ: ອົງການອະນາໄມໂລກ, ສະຫະພັນກາແດງ-ສິບວົງເດືອນແດງສາກົນ, ສະຫະພັນຜູ້ບໍລິຈາກເລືອດສາກົນ ແລະ ສະມາຄົມສາກົນເພື່ອການສົ່ງເລືອດ. ໃນການເລືອກເອົາວັນທີ 14 ມິຖຸນາ ເປັນວັນບໍລິຈາກເລືອດໂລກແມ່ນເພື່ອລະນຶກເຖິງວັນເກີດຂອງ ທ່ານ ຄາແລນ ສະແຕນເນີ ທີ່ເປັນຄົນຄົ້ນພົບໝວດເລືອດ ລະບົບ A, B, O ຂອງຄົນ ໃນປີ 1900 ແລະ ເຮັດໃຫ້ເກີດມີການສົ່ງເລືອດແກ່ຄົນແຕ່ນັ້ນເປັນຕົ້ນມາ.ໃນປີນີ້ ໂດຍມີຄຳຂວັນທີ່ວ່າ “ ທຸກຊີວິດມີຄວາມໝາຍ ໃຫ້ເລືອດ ໃຫ້ຊີວິດ “.

ໃນຕອນທ້າຍ ທ່ານ ໄຊຍະສັກ ແກ້ວປັນຍາ ໄດ້ມີຄຳເຫັນໂດຍເນັ້ນໃຫ້ທຸກອົງການຈັດຕັ້ງຕ່າງໆ ຈົ່ງສືບຕໍ່ຊຸກຍູ້ສົ່ງເສີມໃຫ້ແກ່ການສະໜັບສະໜູນ ແລະ ປະກອບສ່ວນ ເຂົ້າໃນການໂຄສະນາເຜີຍແຜ່ ໃຫ້ທຸກພາກສ່ວນຈົ່ງຮັບຮູ້ເຂົ້າໃຈໃນການເຂົ້າຮ່ວມໃນການບໍລິຈາກເລືອດ ແລະ ຈົ່ງຫັນປ່ຽນພຶດຕິກຳຊ່ວຍກັນໃນການບໍລິຈາກເລືອດ ດ້ວຍຄວາມສະໝັກໃຈ ແລະ ບໍ່ຫວັງສິ່ງຕອບແທນ.

ໃນພິທີດັ່ງກ່າວ ໄດ້ມີ ພະນັກງານ-ຄູອາຈານ ແລະ ນັກສຶກສາ ພາຍໃນວິທະຍາໄລ ກະສິກຳ ແລະ ປ່າໄມ້ ພາກເໜືອ, ທະຫານ ຈາກ ເມືອງປາອູ, ນັກຮຽນຈາກໂຮງຮຽນນາຍຮ້ອຍ ແກ້ງເບັນ ແລະ ນັກສຶກສາຈາກ ມ.ສ ສຸພານຸວົງ ເຂົ້້າຮ່ວມບໍລິຈາກເລືອດ ເປັນຈຳນວນຫຼວງຫຼາຍ ເຊິ່ງໄດ້ເລືອດທັງໝົດ ປະມານ ໜຶ່ງຮ້ອຍຫ້າສິບກ່ວາຖົງ.

==========================================================

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື,​ ວິທະຍາໄລ ກະສິກຳ ແລະ ປ່າໄມ້ ພາກເໜືອ

ພິທີ ເຊັນບົດບັນທຶກ ການປະຕິບັດກິດຈະກຳ ຮ່ວມກັນ MOA ລະຫວ່າງ ວິທະຍາໄລກະສິກຳ – ປ່າໄມ້ ພາກເໜືອ ແລະ ຄະນະ ຜະລິດຕະພັນກະສິກຳ, ມະຫາວິທະຍາໄລ ແມ່ໂຈ້ ປະເທດໄທ

ໃນວັນທີ 22 ພຶດສະພາ 2018 ນີ້ ຢູ່ທີ່ຫ້ອງປະຊຸມຂອງ ວິທະຍາໄລ ກະສິກຳ ແລະ ປ່າໄມ້ ພາກເໜືອ ໄດ້ມີພິທີ ເຊັນບົດບັນທຶກ ການປະຕິບັດກິດຈະກຳຮ່ວມກັນ MOA, ໂດຍການຮ່ວມມືລະຫວ່າງ ວິທະຍາໄລກະສິກຳ – ປ່າໄມ້ ພາກເໜືອ ແລະ ຄະນະຜະລິດຕະພັນກະສິກຳ, ມະຫາວິທະຍາໄລ ແມ່ໂຈ້ ປະເທດໄທ, ຕາງໜ້າເຊັນໂດຍ ທ່ານ ປອ. ອຸໄທ ສຸກຂີ ຮອງອຳນວຍການ ວິທະຍາໄລກະສິກຳ – ປ່າໄມ້ ພາກເໜືອ ແລະ ທ່ານ ສຈ. ປອ. ເລືອງໄຊ ຈຸວັດຕະນະສໍາລານ ຜູ້ຕາງໜ້າ ຄະນະຜະລິດຕະພັນພືດ, ມະຫາວິທະຍາໄລ ແມ່ໂຈ້ ແລະ ທ່ານ ຊັດຊານ ເອກໄຊພັດທະນະກຸນ ຫົວໜ້າ ຟາມຜະລິດຜັກ ໂອກະຈູ ແຫ່ງປະເທດໄທ. ເປັນສັກຂີພິຍານມີ ຫົວໜ້າຫ້ອງການ ແລະ ຫົວໜ້າຄະນະວິຊາ  ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ. ໃນການເຊັນບົດບັນທຶກໃນຄັ້ງນີ້ເພື່ອ ຮ່ວມມືໃນການແລກປ່ຽນການຝຶກງານຂອງນັກສຶກສາ, ການເຮັດກິດຈະກຳຮ່ວມກັນ, ແລກປ່ຽນດ້ານວິຊາການ ແລະ ອຸປະກອນການຮຽນການສອນ, ການຄົ້ນຄ້ວາທົດລອງ ແລະ ໂຄສະນາສົ່ງເສີມຄູ່ຮ່ວມງານທາງເວັບໄຊ, ໜັງສືພິມ ຫຼື ສື່ສິ່ງພິມຕ່າງໆ ທີ່ເປັນປະໂຫຍດຮ່ວມກັນ. ໃນບົດບັນທຶກຄວາມເຂົ້າໃຈສະບັບນີ້ ແມ່ນມີອາຍຸການນຳໃຊ້ 4 ປີ (22/5/2018 – 22/5/2022) ໃນໂອກາດດັ່ງກ່າວ ທັງສອງຝ່າຍຍັງໄດ້ແລກປ່ຽນຂອງທີ່ລະນຶກເຊິ່ງກັນ ແລະ ກັນອີກດ້ວຍ .

ພາຍຫຼັງສໍາເລັດການເຊັນບົດບັນທຶກຄວາມເຂົ້າໃຈແລ້ວ ທ່ານ ຊັດຊານ ເອກໄຊພັດທະນະກຸນ  ຫົວໜ້າ ຟາມ ປູກຜັກ ໂອກະຈູ ແຫ່ງປະເທດໄທ ໄດ້ນຳສະເໜີ ຄວາມການປະຕິບັດຂອງ ຟາມດັ່ງກ່າວ. ຟາມປູກຜັກ ໂອກະຈູ ເປັນຟາມ ປູກຜັກແບບອິນຊີ ຫຼື ຜັກປອດສານພິດ ໂດຍການໃຊ້ປຸ໋ຍຈາກເສດພືດຜັກທີ່ ມາຈາກເສດອາຫານ ແລະ ໃບໄມ້ຕ່າງໆ ນຳມາໝັກເປັນປຸ໋ຍ ແລ້ວມາໃຊ້ປູກ ຜັກໃນຟາມດັ່ງກ່າວ. ໃນຕອນທ້າຍ ທ່ານຍັງໄດ້ແນະນຳ ຂັ້ນຕອນ ແລະ ວິທີການ ການສະໝັກທີ່ຈະໄປຝຶກງານໃຫ້ແກ່ນັກສຶກສາທີ່ມີຄວາມສົນໃຈ.

————————————————————————————————–

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການ ພົວພັນ ແລະ ການຮ່ວມມື, ວິທະຍາໄລ ກະສິກຳ ແລະ ປ່າໄມ້ ພາກເໜືອ

ການມາທັດສະນະສຶກສາ ແລະ ແລກ ປ່ຽນບົດຮຽນ ຂອງ ຫ້ອງການ ກະສິກຳ ແລະ ປ່າໄມ້ ເມືອງ ຈອມເພັດ ທີ່ ວິທະຍາໄລ ກະສິກຳ ແລະ ປ່າໄມ້ ພາກເໜືອ

ໃນວັນທີ 18 ພຶດສະພາ 2018 ນີ້ ວິທະຍາໄລ ກະສິກຳ ແລະ ປ່າໄມ້ ພາກເໜືອ ໄດ້ໃຫ້ການຕ້ອນຮັບການມາຢ້ຽມຢາມ ຂອງ ຫ້ອງການກະສິກຳ ແລະ ປ່າໄມ້ ເມືອງ ຈອມເພັດ ແຂວງ ຫຼວງພະບາງ. ນຳພາໂດຍ ທ່ານ ຂວັນເຮືອນ ວັນນະລາດ ຫົວໜ້າຫ້ອງການກະສິກຳ ແລະ ປ່າໄມ້ ເມືອງຈອມເພັດ ພ້ອມດ້ວຍພະນັກງານ. ໃຫ້ກຽດກ່ວຕ້ອນຮັບໂດຍ ທ່ານ ປທ. ທອງສະມຸດ ພູມມະສອນ ອຳນວຍການວິທະຍາໄລ. ຈຸດປະສົງການມາຢ້ຽມຢາມໃນຄັ້ງນີ້ກໍເພື່ອ ທັດສະນະສຶກສາ ແລະ ແລກປ່ຽນປົດຮຽນ ທາງດ້ານກະສິກຳ ແລະ ປ່າໄມ້ ແລະ ເພື່ອສ້າງຄວາມສາມັກຄີລະຫວ່າງວິທະຍາໄລ ກະສິກຳ ແລະ ປ່າໄມ້ ພາກເໜືອ ກັບ ຫ້ອງການ ກະສິກຳ ແລະ ປ່າໄມ້ ເມືອງ ຈອມເພັດ.

ໃນພິທີ ທ່ານ ປອ. ອຸໄທ ສຸກຂີ ຮອງອຳນວຍການວິທະຍາໄລ ໄດ້ນຳສະເໜີປະຫວັດຄວາມເປັນມາ ແລະ ກິດຈະກຳຕ່າງໆ ຂອງວິທະຍາໄລ ໂດຍຫຍໍ້, ຫຼັງຈາກນັ້ນ ທັງສອງຝ່າຍກໍໄດ້ແລກປ່ຽນບົດຮຽນ ກ່ຽວກັບວິທີການປູກໝາກແໜ່ງ, ການປູກຜັກຫວານປ່າ ແລະ ຂໍ້ມູນກ່ຽວກັບການເຮັດກ້ອນແຮ່ທາດ, ຈາກນັ້ນ ຫ້ອງການກະສິກຳ ແລະ ປ່າໄມ້ ເມືອງຈອມເພັດ ກໍໄດ້ມອບຂອງຂວັນທີ່ລະນຶກ ໃຫຫແກ່ ວິທະຍາໄລ. ຫຼັງຈາກນັ້ນທັງສອງຝ່າຍກໍໄດ້ລົງເບິ່ງກິດຈະກຳຕ່າງໆຟາມຂອງວິທະຍາໄລ ແລະ ແຂ່ງຂັນກິລາບານເຕະມິດຕະພາບອີກດ້ວຍ. ການມາທັດສະນະໃນຄັ້ງນີ້ ແມ່ນເຕັມໄປດ້ວຍຄວາມໝາຍ,​ ຄວາມສາມັກຄີ ແລະ ມິດໄມຕີອັນດີງາມ.

————————————————————————————

ພາບ-ຂ່າວໂດຍ: ສີສະຫວາດ ພັນທຸວົງ

ຫ້ອງການ ພົວພັນ ແລະ ການຮ່ວມມື, ວິທະຍາໄລ ກະສິກຳ ແລະ ປ່າໄມ້ ພາກເໜືອ