ຄະນະວິຊາປ່າໄມ້ ຈັດພິທີປ້ອງກັນບົດຈົບຊັ້ນລະບົບຕໍ່ເນື່ອງ ຮຸ່ນທີ VI

ໃນວັນທີ 28 ພຶດສະພາ 2019 ນີ້ ຢູ່ທີ່ຫ້ອງປະຊຸມຄະນະວິຊາປ່າໄມ້ (ວິທະຍາເຂດ ຊຽງເງິນ) ໄດ້ຈັດພິທີປ້ອງກັນບົດໂຄງການຈົບຊັ້ນສຳລັບຫຼັກສູດຊັ້ນສູງ ກະສິກຳ ແລະ ປ່າໄມ້ ເຂດເນີນສູງ, ລະບົບຕໍ່ເນື່ອງ ຮຸ່ນທີ VI ຂຶ້ນ. ພາຍໃຕ້ການເປັນປະທານ ຂອງ ທ່ານ ສົມສີ ຄຳມະນີວົງ ຮອງອຳນວຍການ ວິທະຍາໄລກະສິກຳ ແລະ ປ່າໄມ້ ພາກເໜືອ, ມີພະນັກງານ,ຄູ-ອາຈານພາຍໃນຄະນະວິຊາ, ນັກສຶກສາ ພ້ອມດ້ວຍ ແຂກຖືກເຊີນຈາກຂະແໜງປ່າໄມ້ ແຂວງຫຼວງພະບາງ ຊຶ່ງມີຜູ້ເຂົ້າຮ່ວມທັງໝົດ 16 ທ່ານ, ຍິງ 1 ທ່ານ. ໃນພິທີ ທ່ານ ບຸນກ້ຽງ ສຸລິຍະສັກ ຫົວໜ້າຄະນະວິຊາປ່າໄມ້ ໄດ້ຂຶ້ນຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະກຳມະການຮັບຜິດຊອບການປ້ອງກັນບົດໂຄງການຈົບຊັ້ນ ສົກສຶກສາ 2018 – 2019 ແລະ ຜ່ານລະບຽບການປ້ອງກັນບົດໂຄງການຈົບຊັ້ນ ແລະ ຕໍ່ມາຕາງໜ້າຄະນະກຳມະການໄດ້ຂຶ້ນປະຕິຍານຕົນ ເພື່ອເປັນການຮັບປະກັນຄວາມໂປ່ງໃສ ແລະ ປະຕິບັດຕາມລະບຽບທີ່ວາງອອກ. ຫຼັງຈາກນັ້ນ, ໄດ້ເລີ່ມຕົ້ນດຳເນີນການປ້ອງກັນບົດໂຄງການຈົບຊັ້ນ ສະເພາະສົກສຶກສາ 2018 – 2019 ມີນັກສຶກສາປ້ອງກັນບົດໂຄງການຈົບຊັ້ນສາຂາປ່າໄມ້ ຈຳນວນ 5 ຄົນ, ຍິງ 0 ຄົນ. ໃນການປ້ອງກັນບົດຄັ້ງນີ້ ກໍເພື່ອເປັນການປະຕິບັດຕາມຫຼັກສູດການຮຽນ-ການສອນ ຂອງຄະນະວິຊາປ່າໄມ້ ວາງອອກ, ສໍາລັບຫຼັກສູດລະບົບຕໍ່ເນື່ອງຊັ້ນສູງ ຊຶ່ງເປັນຫຼັກສູດທີ່ຈັດໃຫ້ມີການສິດສອນ 1 ປີ 6 ເດືອນ ຫຼື 3 ພາກຮຽນ, ເນັ້ນສ້າງນັກວິຊາການປ່າໄມ້ ໃຫ້ມີຄວາມຮູ້, ຄວາມສາມາດ ແລະ ຄວາມຊຳນານງານໃຫ້ມີປະສິດທິຜົນສູງ ຊຶ່ງມີບັນດາພະນັກງານຈາກຂະແໜງການ ກະສິກຳ ແລະ ປ່າໄມ້ ໃນບັນດາແຂວງພາກເໜືອ. ໃນຕອນທ້າຍພິທີ ຫົວໜ້າຄະນະວິຊາປ່າໄມ້ ໄດ້ມອບໃບຍ້ອງຍໍໃຫ້ແກ່ນັກສຶກສາຜູ້ທີ່ມີຜົນການຄົ້ນຄວ້າຮ່ຳຮຽນ ແລະ ຜົນງານດີເດັ່ນແຕ່ລະປະເພດ ຊຶ່ງໃນນັ້ນໄດ້ປະເພດ 1 ຈຳນວນ 2 ຄົນ ແລະ ປະເພດ 2 ຈຳນວນ 3 ຄົນ. ຈາກນັ້ນ, ເພື່ອໃຫ້ພິທີດັ່ງກ່າວນີ້ ມີຄວາມໝາຍຄວາມສໍາຄັນ ທ່ານ ສົມສີ ຄໍາມະນີວົງ ຮອງອໍານວຍການ ວິທະຍາໄລກະສິກໍາ ແລະ ປ່າໄມ້ພາກເໜືອ ໄດ້ມີຄໍາເຫັນເນັ້ນໜັກໃຫ້ນັກສຶກສາຈົ່ງສືບຕໍ່ຮັກສາມູນເຊື້ອ ຊອກຮູ້ສຶກສາຮ່ຳຮຽນ ແລະ ນຳເອົາຄວາມຮູ້ ຄວາມສາມາດທີ່ໄດ້ຮັບ ໄປນຳໃຊ້ພັດທະນາໜ້າທີ່ວຽກງານທາງດ້ານວິຊາສະເພາະຂອງຕົນໃຫ້ດີຂຶ້ນ.
—————–

#ຂ່າວໂດຍ: ພຸດທະຟົງ ເຮີ ນັກຂ່າວຄະນະວິຊາປ່າໄມ້

61342070_651364625309420_6380963470635958272_n

 

 

ພິທີເຊັນບົດບັນທຶກການປະຕິບັດກິດຈະກຳຮ່ວມກັນ (MoA) ລະຫວ່າງ ວິທະຍາໄລ ກະສິກຳ ແລະ ປ່າໄມ້ ພາກເໜືອ ກັບ ມະຫາວິທະຍາໄລ ແມ່ໂຈ້ (ປະເທດໄທ)

ໃນວັນທີ 9 ພຶດສະພາ 2019 ນີ້, ​ຢູ່ທີ່ຫ້ອງປະຊຸມ ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ມີພິທີເຊັນບົດບັນທຶກການປະຕິບັດກິດຈະກຳຮ່ວມກັນ (MoA) ຂຶ້ນ, ລະຫວ່າງ ຄະນະ ວິຊາປະມົງ, ວິທະຍາໄລກະສິກຳ ແລະ ປ່າໄມ້ ພາກເໜືອ ກັບ ຄະນະເຕັກໂນໂລຊີການປະມົງ ແລະ ຊັບພະຍາກອນທາງນໍ້າ, ມະຫາວິທະຍາໄລ ແມ່ໂຈ້ (ປະເທດໄທ). ໂດຍການເຊັນຂອງ ທ່ານ ປທ. ທອງສະມຸດ ພູມມະສອນ ອຳນວຍການ ວິທະຍາໄລກະສິກຳ ແລະ ປ່າໄມ້ ພາກເໜືອ ແລະ ທ່ານ ປອ. ຈົງກົນ ພົມຍະ ຄະນະບໍດີ ຄະນະເຕັກໂນໂລຊີການປະມົງ ແລະ ຊັບພະຍາກອນທາງນໍ້າ ມະຫາວິທະຍາໄລ ແມ່ໂຈ້ (ປະເທດໄທ). ເຂົ້າຮ່ວມເປັນສັກຂີພິຍານໂດຍມີ ທ່ານ ສຈ. ປອ. ເລືອງໄຊ ຈຸວັດຕະນະສໍາລານ ຄະນະບໍດີ ຄະນະຜະລິດຕະກໍາການກະເສດ, ມະຫາວິທະຍາໄລ ແມ່ໂຈ (ປະເທດໄທ), ມີຮອງອຳນວຍການວິທະຍາໄລ, ມີບັນດາຫົວໜ້າຫ້ອງການ-ຄະນະວິຊາ, ຮອງຫົວໜ້າຫ້ອງການ-ຄະນະວິຊາ ພ້ອມດ້ວຍພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ. ໃນການເຊັນບົດບັນທຶກການປະຕິບັດກິດຈະກຳຮ່ວມກັນ ໃນຄັ້ງນີ້ເພື່ອ ຮ່ວມມືໃນການແລກປ່ຽນການຝຶກງານຂອງນັກສຶກສາ, ການເຮັດກິດຈະກຳຮ່ວມກັນ, ແລກປ່ຽນດ້ານວິຊາການ ແລະ ອຸປະກອນການຮຽນ-ການສອນ, ການຄົ້ນຄ້ວາທົດລອງ ແລະ ໂຄສະນາສົ່ງເສີມຄູ່ຮ່ວມງານທາງເວັບໄຊ, ໜັງສືພິມ ຫຼື ສື່ສິ່ງພິມຕ່າງໆ ທີ່ເປັນປະໂຫຍດຮ່ວມກັນ. ໃນບົດບັນທຶກດັ່ງກ່າວ ມີອາຍຸການນຳໃຊ້ທັງໝົດ 5 ປີ ຊຶ່ງເລີ່ມແຕ່ 1 ພຶດສະພາ 2019 – 30 ເມສາ 2024. ຈາກນັ້ນຍັງໄດ້ລົງຢ້ຽມຢາມຟາມ ປະມົງຂອງວິທະຍາໄລຕຶ່ມອີກ.

***********************

ພາບ-ຂ່າວ ໂດຍ: ສີສະຫວາດ ພັນທຸວົງ

ກຸ່ມວຽກໂຄສະນາ ແລະ ປະຊາສໍາພັນ, ຫ້ອງການພົວພັນ ແລະ ການຮ່ວມມື

ພິທີ ເຊັນບົດບັນທຶກການຮ່ວມມື ລະຫວ່າງ ວິທະຍາໄລກະສິກຳ ແລະ ປ່າໄມ້ ພາກເໜືອ ກັບ ພະແນກແຮງງານ ແລະ ສະຫວັດດີການສັງຄົມ ແຂວງ ຫຼວງພະບາງ

ໃນຕອນບ່າຍ ວັນທີ 2 ເມສາ 2019 ຢູ່ທີ່ຫ້ອງປະຊຸມ ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ມີພິທີ ເຊັນບົດບັນທຶກການຮ່ວມມື ລະຫວ່າງ ວິທະຍາໄລກະສິກຳ ແລະ ປ່າໄມ້ ພາກເໜືອ ກັບ ພະແນກແຮງງານ ແລະ ສະຫວັດດີການສັງຄົມ ແຂວງ ຫຼວງພະບາງ. ຊຶ່ງຕາງໜ້າເຊັນ ໂດຍ ທ່ານ ທອງສະມຸດ ພູມມະສອນ ອໍານວຍການ ວິທະຍາໄລກະສິກຳ – ປ່າໄມ້ ພາກເໜືອ ແລະ ທ່ານ ສຸລິສັກ ພົມມາລີ ຫົວໜ້າພະແນກແຮງງານ ແລະ ສະຫວັດດີການສັງຄົມ ແຂວງ ຫຼວງພະບາງ. ຊຶ່ງເປັນສັກຂີພິຍານໂດຍມີ ຮອງອໍານວຍການ, ຫົວໜ້າ-ຮອງຫົວໜ້າຫ້ອງການ, ຫົວໜ້າ-ຮອງຫົວໜ້າຄະນະວິຊາ ພ້ອມດ້ວຍ ພະນັກງານຈາກ ພະແນກແຮງານ ແລະ ສະຫວັດດີການສັງຄົມ ແຂວງຫຼວງພະບາງ ເຂົ້າຮ່ວມ. ໃນການເຊັນບົດບັນທຶກການຮ່ວມມືໃນຄັ້ງນີ້ ຊຶຶ່ງມີຈຸດປະສົງ ເພື່ອຮ່ວມມືໃນການອົບຮົມຄວາມຮູ້ຕາມສາຂາວິຊາທີ່ມີພາຍໃນວິທະຍາໄລ ນັບທັງໄລຍະສັ້ນ, ໄລຍະກາງ ແລະ ໄລຍະຍາວ ໃຫ້ແກ່ນັກຮຽນທີ່ຈົບມັດທະຍົມ ຫຼື ຜູ້ທີ່ສົນໃຈໃນການສຶກສາຮໍາຮຽນໃນດ້ານການກະສິກຳ-ປ່າໄມ້, ຮ່ວມກັນຈັດຕະຫຼາດນັດແຮງງານ ໂດຍທາງວິທະຍາໄລກະສິກຳ ແລະ ປ່າໄມ້ ພາກເໜືອ ຈະເປັນຜູ້ສະໜອງນັກສຶກສາທີ່ຈົບຈາກວິທະຍາໄລໃນແຕ່ລະປີ ແລະ ທີ່ຍັງຫວ່າງງານຢູ່ແຕ່ລະທ້ອງຖິ່ນພາຍໃນແຂວງ ຫຼື ບັນດາແຂວງພາກເໜືອ ເພື່ອສ້າງໂອກາດໃຫ້ໄດ້ວຽກເຮັດງານທໍາ, ໂດຍພະແນກແຮງງານ ແລະ ສະຫວັດດີການສັງຄົມ ແຂວງຫຼວງພະບາງ ເປັນຜູ້ຊ່ວຍໃນການຈັດຫາວຽກເຮັດງານທໍາໃຫ້ແກ່ນັກສຶກສາທີ່ຮຽນຈົບ. ນອກນັ້ນ ທັງສອງຝ່າຍຍັງຕົກລົງໃນການພັດທະນາຂີດຄວາມສາມາດໃຫ້ບຸກຄະລາກອນໃນດ້ານຕ່າງໆເຊັ່ນວ່າ: ການເຂົ້າຮ່ວມກອງປະຊຸມສໍາມະນາຕ່າງໆ, ການທັດສະນະສຶກສາແລກປ່ຽນບົດຮຽນຊຶ່ງກັນ ແລະ ກັນ ທີ່ເປັນປະໂຫຍດຮ່ວມກັນ. ໃນບົດບັນທຶກການຮ່ວມມືສະບັບນີ້ ແມ່ນມີອາຍຸການນຳໃຊ້ 5 ປີ (2 ເມສາ(4) 2019 ຫາ 2 ເມສາ(4) 2024). ໃນໂອກາດດັ່ງກ່າວ ທັງສອງຝ່າຍຍັງໄດ້ແລກປ່ຽນຂອງທີ່ລະນຶກເຊິ່ງກັນ ແລະ ກັນອີກຕື່ມ.

**********************

ພາບ-ຂ່າວໂດຍ: ສີສະຫວາດ ພັນທຸວົງ,

ຫ້ອງການພົວພັນ ແລະ ການຮ່ວມມື

 

ຕ້ອນຮັບການມາຢ້ຽມຢາມຂອງ ຄະນະທີມງານຜູ້ແທນ ຈາກກົງສູນ ອົດສະຕາລີ ປະຈໍາລາວ

ໃນຕອນບ່າຍຂອງວັນທີ 13 ມີນາ 2019 ວິທະຍາໄລ ກະສິກຳ ແລະ ປ່າໄມ້ ພາກເໜືອ ຕ້ອນຮັບການມາຢ້ຽມຢາມຂອງ ຄະນະທີມງານຜູ້ແທນ ຈາກກົງສູນ ອົດສະຕາລີ ປະຈໍາລາວ. ໂດຍການຕ້ອນຮັບຂອງ ຄະນະອໍານວຍການວິທະຍາໄລ, ມີພະນັກງານ, ຄູ-ອາຈານ ຈໍານວນໜຶ່ງພາຍໃນວິທະຍາໄລ, ພ້ອມດ້ວຍຊາວກະສິກອນບ້ານສົບເຈ້ຍ, ເມືອງໂພນໄຊ ທີເຂົ້າຮ່ວມໂຄງການ ACIAR. ໃນພິທີ ທ່ານ ປອ. ອຸໄທ ສຸກຂີ ໄດ້ສະເໜີສະພາບລວມຂອງວິທະຍາໄລ ແລະ ແລກປ່ຽນບົດຮຽນລະຫວ່າງ ຄະນະຜູ້ແທນຈາກທີມງານທີ່ມາຢ້ຽມຢາມ ກັບ ຊາວກະສິກອນ ຈາກເມືອງໂພນໄຊ ທີ່ເຂົ້າຮ່ວມ ໂຄງການ ACIAR, ຈາກນັ້ນ ໄດ້ລົງໄປຢ້ຽມຢາມ ຟາມພືດເສດຖະກິດ ໃນການອານຸລັກແຂມ ແລະ ຟາມພືດອຸດສາຫະກໍາ ໃນລະບົບການປູກໄມ້ສັກ. ນອກຈາກນັ້ນ ທາງທີມງານທີ່ມາຢ້ຽມຢາມນັ້ນຍັງໄດ້ຮ່ວມປູກຕົ້ນໄມ້ຮ່ວມກັບນັກສຶກສາ ເພື່ອເປັນທີ່ລະນຶກຕື່ມອີກ.

IMG_4553IMG_4573IMG_4368IMG_4335IMG_4352IMG_4359IMG_4346IMG_4341IMG_4338IMG_4376IMG_4380IMG_4383IMG_4387IMG_4388IMG_4396IMG_4413IMG_4423IMG_4425IMG_4427IMG_4429IMG_4445IMG_4463IMG_4466IMG_4472IMG_4476IMG_4485IMG_4509IMG_4514IMG_4517IMG_4525

************

ພາບ-ຂ່າວ: ສີສະຫວາດ ພັນທຸວົງ

ກອງປະຊຸມແລກປ່ຽນວິຊາການ ລະຫວ່າງວິທະຍາໄລກະສິກໍາ ແລະ ປ່າໄມ້ ພາກເໜືອ ກັບ ມະຫາວິທະຍາໄລຊຽງໃໝ່ ປະເທດໄທ

ວັນທີ 6 ມີນາ 2019 ໄດ້ມີກອງປະຊຸມແລກປ່ຽນວິຊາການ ລະຫວ່າງ ຄະນະລ້ຽງສັດ ວິທະຍາໄລກະສິກໍາ ແລະ ປ່າໄມ້ ພາກເໜືອ ກັບ ພາກວິຊາລ້ຽງສັດ ແລະ ສັດນໍ້າ ຄະນະກະເສດສາດ ມະຫາວິທະຍາໄລຊຽງໃໝ່ (ປະເທດໄທ).  ໂດຍ ການນໍາພາຂອງ ທ່ານ ປອ. ວັນນະພອນ ທະພິງແກ ພ້ອມດ້ວຍທີມງານ ມີພະນັກງານຄູອາຈານ ຈາກພາກວິຊາລ້ຽງສັດ ແລະ ສັດນໍ້າ ຄະນະກະເສດສາດ ມະຫາວິທະຍາໄລຊຽງໃໝ່ (ປະເທດໄທ), ໂດຍມີພະນັກງານ, ຄູອາຈານ ພ້ອມດ້ວຍ ນັກສຶກສາຈາກ ວິທະຍາໄລ ກະສິກຳ ແລະ ປ່າໄມ້ ພາກເໜືອ ເຂົ້າຮ່ວມ. ໃນພິທີ ທ່ານ ສົມສີ ຄໍາມະນີວົງ ຮອງອໍານວຍການວິິທະຍາໄລ ໄດ້ກ່າວຕ້ອນຮັບ ແລະ ມີຄໍາເຫັນ, ຈາກນັ້ນ ໄດ້ມີການນໍາສະເໜີສະພາບລວມຂອງທັງສອງສະຖາບັນ. ຈຸດປະສົງຂອງກອງປະຊຸມຄັ້ງນີ້ ກໍເພື່ອແລກປ່ຽນຄວາມຮູ້ທາງດ້ານວິຊາການລ້ຽງສັດໃຫ້ມີການພັດທະນາຂຶ້ນເປັນກ້າວໆ. 

**************

ພາບ-ຂ່າວ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື

ກອງປະຊຸມທົບທວນການຈັດຕັ້ງປະຕິບັດວຽກງານຂອງທີມງານຄູຝຶກ

ກອງປະຊຸມທົບທວນການຈັດຕັ້ງປະຕິບັດວຽກງານຂອງທີມງານຄູຝຶກໃນໄລຍະທີ່ຜ່ານມາ ຄັ້ງວັນທີ 6-7 ມີນາ 2019, ໂດຍການເປັນປະທານຂອງ ທ່ານ ສົມສີ ຄໍາມະນີວົງ ຮອງອໍານວຍການວິທະຍາໄລ, ໂດມີພະນັກງານຄູອາຈານທີ່ຮັບຜິດຊອບທີມງານຄູຝຶກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

************

ພາບ-ຂ່າວ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື

ພິທີມອບ-ຮັບບັດ ພະນັກງານ-ລັດຖະກອນ ໃຫ້ແກ່ວິທະຍາໄລ ແລະ ສູນທີ່ຂຶ້ນກັບບັນດາກົມອ້ອມຂ້າງກະຊວງກະສິກຳ ແລະ ປ່າໄມ້

ວັນທີ 5 ມີນາ 2019 ນີ້ ຢູ່ທີ່ວິທະຍາໄລ ກະສິກໍາ ແລະ ປ່າໄມ້ ພາກເໜືອ ໄດ້ຈັດພິທີມອບ-ຮັບບັດພະນັກງານ-ລັດຖະກອນ ໃຫ້ແກ່ວິທະຍາໄລ ແລະ ສູນທີ່ຂຶ້ນກັບບັນດາກົມອ້ອມຂ້າງ ກະຊວງກະສິກຳ ແລະ ປ່າໄມ້, ໂດຍມີ ຕາງໜ້າຈາກກະຊວງກະສິກຳ-ປ່າໄມ້ ແລະ ຕາງໜ້າຈາກກະຊວງພາຍໃນ, ໂດ້ຍມີ ພະນັກງານ-ລັດຖະກອນ ຈາກ ວິທະຍາໄລກະສິກຳ – ປ່າໄມ້ ພາກເໜືອ ແລະ ພະນັກງານຈາກສູນຄົ້ນຄ້ວາກະສິກຳ ເຂດເນີນສູງ(ຫ້ວຍໂຄດ) ເຂົ້າຮ່ວມ. ໃນໂອກາດດັ່ງກ່າວ, ຕາງໜ້າຈາກ ກະຊວງພາຍໃນ ໄດ້ມີຄໍາເຫັນ ໂດຍໄດ້ຍົກໃຫ້ເຫັນຄວາມໝາຍ, ຄວາມສໍາຄັນຂອງການມອບບັດ ໃຫ້ພະນັກງານ-ລັດຖະກອນເພາະສະແດງໃຫ້ເຫັນເຖິງການຢັ້ງຢືນ ແລະ ກວດກາ ບັນຊີຈໍານວນພົນພະນັກງານ-ລັດຖະກອນ ຜູ້ມີໜ້າ ຫຼື ບໍ່ມີໜ້າຕົວຈິງ ຂອງບັນດາກະຊວງ, ອົງການຂັ້ນສູນກາງ ແລະ ອົງການປົກຄອງທ້ອງຖິ່ນ. ທັງເປັນການປັບປຸງຂໍ້ມູນປະຫວັດລັດຖະກອນໃຫ້ຖືກຕ້ອງ, ໃຫ້ສອດຄ່ອງກັບລະບຽບການ, ຫັນການຄຸ້ມຄອງພະນັກງານ-ລັດຖະກອນ ຕາມກົດໝາຍ, ລະບຽບການ ແລະ ທັນສະໄໝ ເຮັດໃຫ້ການເບີກຈ່າຍເງິນ ເດືອນ, ເງິນອຸດໜູນ ແລະ ເງິນນະໂຍບາຍຕ່າງໆ ຖືກຕ້ອງຕາມຕົວຈິງ. ທັງນີ້, ບັດພະນັກງານ – ລັດຖະກອນ ຈະເປັນທັງບັດເອທີເອັມ ( ATM ), ບັດປະກັນສັງຄົມ ແລະ ປະຫວັດຂໍ້ມູນລັດຖະກອນຂອງຜູ້ຖືບັດລວມຢູ່ໃນບັດດຽວ.

 

********************

ພາບ-ຂ່າວ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື, ວິທະຍາໄລກະສິກຳ ແລະ ປ່າມ້ ພາກເໜືອ

ໜ່ວຍຊາວໜຸ່ມ ປປລ ຮາກຖານວິທະຍາໄລ ກະສິກຳ ແລະ ປ່າໄມ້ ພາກເໜືອ ຮັບນາມມະຍົດເປັນໜ່ວຍຊາວໜຸ່ມ 4 ບຸກ ຄັ້ງທີ I

IMG_3869

ໃນວັນທີ 1 ມີນາ 2019 ທີ່ຜ່ານມານີ້ ຄະນະໜ່ວຍຊາວໜຸ່ມ ປປລ ຮາກຖານ ວິທະຍາໄລ ກະສິກຳ ແລະ ປ່າໄມ້ ພາກເໜືອ ໄດ້ຈັດຕັ້ງພິທີປະກາດຮັບຮອງເປັນໜ່ວຍຊາວໜຸ່ມ 4 ບຸກ ຄັ້ງທີ I ຂຶ້ນ ຢູ່ທີ່ສະໂມສອນຂອງວິທະຍາໄລ, ໂດຍການເປັນປະທານຮ່ວມຂອງ ສະຫາຍ ໄຊນະຄອນ ສຸດທິດາ ວ່າການເລຂາບໍລິຫານງານຊາວໜຸ່ມ ແຂວງຫຼວງພະບາງ, ສະຫາຍ ອຸໄທ ສຸກຂີ ຮອງເລຂາຄະນະພັກຮາກຖານ ວິທະຍາໄລ, ສະຫາຍ ສົມພົງ ຄໍາມາລາວົງ ເລຂາຊາວໜຸ່ມ ປປລ ຮາກຖານວິທະຍາໄລ, ມີບັນດາເລຂາຊາວໜຸ່ມໂຮງຮຽນ, ສະຖາບັນການສຶກສາວິທະຍາໄລອ້ອມຂ້າງ, ມີປະທານກໍາມະບານຮາກຖານວິທະຍາໄລ, ປະທານສະຫະພັນແມ່ຍິງວິທະຍາໄລ ພ້ອມດ້ວຍບັນດາສະມາຊິກຊາວໜຸ່ມທີ່ເປັນພະນັກງານ ແລະ ນັກສຶກສາພາຍໃນວິທະຍາໄລ ເຂົ້າຮ່ວມຢ່າງພ້ອມພຽງ.

ໂອກາດດັ່ງກ່າວ ສະຫາຍ ສົມພົງ ຄໍາມາລາວົງ ເລຂາຊາວໜຸ່ມ ປປລ ຮາກຖານວິທະຍາໄລ ໄດ້ຂຶ້ນຜ່ານບົດສະຫຼຸບໃນການສ້າງຂະບວນການແຂ່ງຂັນຊາວໜຸ່ມ 4 ບຸກໃນປີ 2018 ແລະ ທິດທາງແຜນການໃນຕໍ່ໜ້າ 2019, ຊຶ່ງປັດຈຸບັນໜ່ວຍຊາວໜຸ່ມຮາກຖານ ວິທະຍາໄລກະສິກຳ ແລະ ປ່າໄມ້ ພາກເໜືອ ມີສະມາຊິກຊາວໜຸ່ມທັງໝົດ 328 ສະຫາຍ, ຍິງ 170 ສະຫາຍ. ໃນນັ້ນ ມີຄູ-ອາຈານ 52 ສະຫາຍ, ຍິງ 22 ສະຫາຍ, ນັກສຶກສາ 276 ສະຫາຍ, ຍິງ 148 ສະຫາຍ. ຜ່ານການຕີລາຄາ ແລະ ປະເມີນຜົນສາມາດຈັດປະເພດແຂງຮອບດ້ານໄດ້ 138 ສະຫາຍ, ຍິງ 66 ສະຫາຍ ເທົ່າກັບ 42 %, ປະເພດແຂງ 190 ສະຫາຍ, ຍິງ 104 ສະຫາຍ ເທົ່າກັບ 58%, ໂດຍອີງໃສ່ມາດຖານຂໍ້ແຂ່ງຂັນ 4 ບຸກຂອງຊາວໜຸ່ມ ຄື: ບຸກດ້ານການເມືອງແນວຄິດ ກວມເອົາ 93,07%, ບຸກດ້ານການຝຶກຝົນຫຼໍ່ຫຼອມຮ່ຳຮຽນກວມເອົາ 92,59%, ບຸກດ້ານການຈັດຕັ້ງ ກວມເອົາ 93,30% ແລະ ບຸກດ້ານວິຊາຊີບ-ສ້າງວຽກເຮັດງານທໍາ ກວມເອົາ 94,19%, ສໍາລັບທິດທາງໃນຕໍ່ໜ້າ ບຸກດ້ານການເມືອງແນວຄິດໃຫ້ໄດ້ 95% ຂຶ້ນໄປ, ບຸກດ້ານການຝຶກຝົນຫຼໍ່ຫຼອມຮ່ຳຮຽນ ໃຫ້ໄດ້ 93% ຂຶ້ນໄປ, ບຸກດ້ານການຈັດຕັ້ງໃຫ້ໄດ້ 100% ແລະ ບຸກດ້ານວິຊາຊີບ-ສ້າງວຽກເຮັດງານທໍາ ໃຫ້ໄດ້ 95%.

IMG_3900

ຈາກນັ້ນຕາງໜ້າແຕ່ລະຈຸໄດ້ຂຶ້ນຈັບມືແຂ່ງຂັນໃນປີຕໍ່ໄປ. ສະຫາຍ ນາງ ທອງວັນ ບຸນລາວົງ ຂຶ້ນຜ່ານຂໍ້ຕົກລົງວ່າດ້ວຍການຢັ້ງຢຶນ ເອົາວິທະຍາໄລກະສິກຳ ແລະ ປ່າໄມ້ ພາກເໜືອ ເປັນໜ່ວຍຊາວໜຸ່ມ 4 ບຸກ, ຈາກນັ້ນ ກອງປະຊຸມໄດ້ ມອບໃບຢັ້ງຢືນ ໃຫ້ໜ່ວຍຮາກຖານວິທະຍາໄລ ແລະ ສະມາຊິກຊາວໜຸ່ມທີ່ເປັນພະນັກງານ, ຄູ-ອາຈານ ທີ່ຈັດຕັ້ງປະຕິບັດຂໍ້ແຂ່ງຂັນ 4 ບຸກ ທັງໝົດ 52 ສະຫາຍ, ຍິງ 22 ສະຫາຍ.

IMG_3791IMG_3781IMG_3776

ທ້າຍພິທີ ສະຫາຍ ໄຊນະຄອນ ສຸດທິດາ ວ່າການເລຂາບໍລິຫານງານຊາວໜຸ່ມ ແຂວງຫຼວງພະບາງ ໃຫ້ກຽດຂຶ້ນໂອ້ລົມຕໍ່ພິທີໃນຄັ້ງນີ້ ບັນດາສະມາຊິກຊາວໜຸ່ມ ແຕ່ລະສະຫາຍ ຕ້ອງມີຄວາມສາມັກຄີກັນເປັນເອກະພາບທາງດ້ານການເມືອງແນວຄິດ ທາງດ້ານການຈັດຕັ້ງ ແບ່ງຄວາມຮັບຜິດຊອບ ລວມສູນປະຊາທິປະໄຕ ມີຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນ ເຮັດໃຫ້ວຽກງານຊາວໜຸ່ມ 4 ບຸກໃຫ້ມີການພັດທະນາ ແລະ ມີທ່າກ້າວຕະຫຼອດໄປ. ຊາວໜຸ່ມຕ້ອງສືບຕໍ່ສຶກສາອົບຮົມການເມືອງແນວຄິດໃຫ້ບັນດາສະມາຊິກຊາວໜຸ່ມໃຫ້ມີຄວາມໜັກແໜ້ນ ເລິກເຊິ່ງ, ເພີ່ມທະວີຄວາມສາມັກຄີພາຍໃນໝູ່ຄະນະເປັນປຶກແຜ່ນແໜ້ນໜາ, ເພື່ອເຮັດໃຫ້ສະມາຊິກກາຍເປັນຜູ້ສືບທອດທີ່ດີຂອງພັກ ມີຄຸນສົມບັດສິນທຳປະຕິວັດ ແລະ ກາຍເປັນຊາວໜຸ່ມແບບຢ່າງທີ່ດີໃນອານາຄົດ.

IMG_3869

ຕອນທ້າຍ ສະຫາຍຍັງໄດ້ເນັ້ນໜັກຖືເອົາວຽກງານກິດຈະກໍາໃຫ້ເປັນປົກກະຕິ ເພື່ອສຶກສາອົບຮົມການເມືອງແນວຄິດເປັນສິ່ງສໍາຄັນ ສ້າງສະມາຊິກຊາວໜຸ່ມ 4 ບຸກ ເປັນຕົວແບບທີ່ດີເດັ່ນ ເຊັ່ນ: ຕົວແບບສອນດີສອນເກັ່ງຂອງຄູ-ອາຈານ, ຮຽນດີຮຽນເກັ່ງ ຂອງນັກສຶກສາ ແລະ ຊຸກຍູ້ສົ່ງເສີມການໂອບເອື້ອຍອາລີໃນການຊ່ວຍເຫຼືອສັງຄົມກໍຄືການບໍຈາກເລືອດ. ໃນຕອນທ້າຍ ສະຫາຍຍັງໄດ້ຍ້ອງຍໍຊົມເຊີຍໜ່ວຍຊາວໜຸ່ມຮາກຖານ ວິທະຍາໄລ ກະສິກຳ ແລະ ປ່າໄມ້ ພາກເໜືອ ທີ່ສາມາດປະຕິບັດໄດ້ ຂໍ້ແຂ່ງຂັນ 4 ບຸກ ພ້ອມທັງໃຫ້ຮັກສາມູນເຊື້ອອັນດີງາມ ນີ້ໄວ້ໃຫ້ໝັ້ນຄົງຕະຫຼອດໄປ.

**************

ພາບໂດຍ: ອຈ ພົມພອນ ໜໍ່ບຸນຕາ

ຂ່າວໂດຍ: ສີສະຫວາດ ພັນທຸວົງ

ຫ້ອງການພົວພັນ ແລະ ການຮ່ວມມື

ການຝຶກອົບຮົມ ການຈັດລາຍການ, ການຂຽນຂ່າວ ແລະ ສະປອດລາຍການ ໃຫ້ທີມງານໂທລະໂຄ່ງ ຊຸດໃໝ່

ໃນລະຫວ່າງວັນທີ 26 -27 ກຸມພາ 2019 ທີ່ ວິທະຍາໄລກະສິກໍາ ແລະ ປ່າໄມ້ພາກເໜືອ ໄດ້ອົບຮົມການຈັດລາຍການ, ການຂຽນຂ່າວ ແລະ ສະປອດລາຍການ ໃຫ້ແກ່ອາສາສະໝັກຈັດລາຍການໂທລະໂຄ່ງຊຸດໃໝ່, ໂດຍການເປັນປະທານຂອງ ທ່ານ ປອ. ບຸນຊູ ໄຊຊະນະ ຫົວໜ້າຫ້ອງການພົວພັນ ແລະ ການຮ່ວມມື, ມີພະນັກງານ, ຄູ- ອາຈານ ຫ້ອງການພົວພັນ ແລະ ການຮ່ວມມື, ນັກສຶກສາ ທີມງານໂທລະໂຄ່ງ ຊຸດເກົ່າ ແລະ ຊຸດໃໝ່ເຂົ້າຮ່ວມ ຈໍານວນ 40 ຄົນ, ຍິງ ຄົນ. ໃນພິທີ ດັ່ງກ່າວ ທ່ານ ປອ. ບຸນຊູ ໄຊຊະນະ ໄດ້ມີຄໍາເຫັນ ແລະ ກ່າວເປີດພິທີ ເພື່ອສ້າງຄວາມເຂັ້ມແຂງໃນການເຮັດວຽກງານປະສາຊໍາພັນ ແລະ ໂຄສະນາ ເຜີຍແຜ່ຂໍ້ມູນຂ່າວສານດ້ານຕ່າງໆ ເພື່ອເຮັດໃຫ້ນັກສຶກສາ ອາສາສະໝັກຈັດລາຍການຊຸດໃໝ່ ໃຫ້ມີຄວາມຮູ້, ຄວາມສາມາດໃນການຈັດລາຍການ, ການຂຽນຂ່າວ ແລະ ການເຮັດສະປອດລາຍການ ເພື່ອນໍາເອົາຄວາມຮູ້ດັ່ງກ່າວໄປຈັດຕັ້ງປະຕິບັດຕົວຈິງໃນເວລາຈັດລາຍການໂທລະໂຄ່ງ ຂອງວິທະຍາໄລໃຫ້ມີສີສັນ, ມີເນື້ອໃນທີ່ດີສາມາດດຶງດູດຄວາມສົນໃຈຂອງຜູ້ຟັງຫລາຍຂຶ້ນກວ່າເກົ່າ, ເພື່ອພັດທະນາວຽດງານໂຄສະນາ ແລະ ປະຊາສໍາພັນ ຂອງວິທະຍາໄລໃຫ້ມີໃບໜ້າໃໝ່, ເຮັດໃຫ້ທີມງານໂທລະໂຄ່ງ ວິທະຍາໄລກະສິກໍາ ແລະ ປ່າໄມ້ພາກເໜືອ ມີຄວາມເຂັ້ມແຂງ, ສາມາດຖ່າຍທອດຄວາມຮູ້ ແລະ ບົດຮຽນໃຫ້ວິທະຍາໄລອື່ນໃນອະນາຄົດ, ອີກດ້ານໜຶ່ງກໍເພື່ອເປັນການແລກປ່ຽນບົດຮຽນເຊິ່ງກັນ ແລະ ກັນ ໃນການປະຕິບັດຕົວຈິງກ່ຽວງກັບການຈັດລາຍການ, ການຊອກຫາຂໍ້ມູນໃນການຂຽນຂ່າວ, ການນໍາສະເໜີຂ່າວຜ່ານສື່ໂຄສະນາສັງຄົມໄດ້ຮັບຮູ້. ໃນໄລຍະເຝຶກອົບຮົມດັ່ງກ່າວຜູ້ເຂົ້າຮ່ວມໄດ້ຮຽນຮູ້ເຕັກນິກການຈັດລາຍການ, ຄວາມຮູ້ພື້ນຖ້ານຫຼັກການຂຽນຂ່າວ,  ຄວາມສໍາຄັນຂອງຂ່າວ, ອົງປະກອບຂອງຂ່າວ,  ໂດຍໄດ້ຮຽນຮູ້ພາກທິດສະດີ ແລະ ປະຕິບັດຕົວຈິງ ຂອງການຂຽນຂ່າວ, ການເຝຶກອົບຮົມຄັ້ງນີ້ໄດ້ຮັບທຶນສະໜັບສະໜູນຈາກໂຄງການປັບປຸງວິທະຍາໄລກະສິກໍາ ແລະ ປ່າໄມ້ພາກເໜືອ (SURAFCO).

 

***********

ຂ່າວໂດຍ: ອາຈານ ມະນີຈັນ ສີບົວຄໍາ

ພາບໂດຍ: ທ ອານຸພາບ ແສງເພັດ ນັກສຶກສາ ຈັດລາຍການໂທລະໂຄ່ງຊຸດເກົ່າ