ໜ່ວຍຊາວຮາກຖານ ຄະນະວິຊາປ່າໄມ້ ຈັດພິທີປະກາດໜ່ວຍຊາວໜຸ່ມ 4 ບຸກ ຄັ້ງທີ III

ໃນວັນທີ 23 ກໍລະກົດ 2021 ຜ່ານມານີ້ ໜ່ວຍຊາວໜຸ່ມຮາກຖານຄະນະວິຊາປ່າໄມ້ ໄດ້ຈັດພິທີປະກາດໜ່ວຍຊາວໜຸ່ມ 4 ບຸກຄັ້ງທີ III ຢູ່ທີ່ຫ້ອງປະຊຸມຂອງຕົນຂຶ້ນ ໂດຍການໃຫ້ກຽດເຂົ້າຮ່ວມຂອງ ສະຫາຍ ໄຊນະຄອນ ສຸດທິດາ ຄະນະບໍລິຫານງານສູນກາງຊາວໜຸ່ມ ເລຂາຄະນະບໍລິຫານງານຊາວໜຸ່ມແຂວງຫຼວງພະບາງ, ສະຫາຍ ນິກອນ ສຸດທິວົງ ເລຂາໜ່ວຍພັກ ຄະນະວິຊາປ່າໄມ້, ມີແຂກຖືກເຊີນຈາກໜ່ວຍອ້ອມຂ້າງ ແລະ ສະມາຊິກຊາວໜຸ່ມພາຍໃນໜ່ວຍເຂົ້າຮ່ວມຢ່າງພ້ອມພຽງ. ໃນພິທີ ສະຫາຍ ຄຳພຸດ ພົມມະຈັນ ເລຂາໜ່ວຍຊາວໜຸ່ມຮາກຖານຄະນະວິຊາປ່າໄມ້ ໄດ້ຂຶ້ນລາຍງານການຈັດຕັ້ງປະຕິບັດຂໍ້ແຂ່ງຂັນ 4 ບຸກໃນປີ 2020 ແລະ ທິດທາງແຜນການປີ 2021 ໂດຍໃຫ້ຮູ້ວ່າ ໜ່ວຍຊາວໜຸ່ມຄະນະວິຊາປ່າໄມ້ ມີໜ້າທີ່ເປັນເສນາທິການໃຫ້ໜ່ວຍພັກຄະນະວິຊາປ່າໄມ້ ໂດຍປະຕິບັດໜ້າທີ່ວຽກງານຕາມພາລະບົດບາດ, ສິດ, ໜ້າທີ່ຂອງໜ່ວຍຕົນເອງຕາມການມອບໝາຍໜ້າທີ່ ຂອງຄະນະບໍລິຫານງານຊາວໜຸ່ມແຂວງຫຼວງພະບາງ, ມີສະມາຊິກຊາວໜຸ່ມທັງໝົດ 19 ສະຫາຍ, ຍິງ 10 ສະຫາຍ.

ຜ່ານມາການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມລາວ ໜ່ວຍຊາວໜຸ່ມຄະນະວິຊາປ່າໄມ້ໄດ້ຖືເອົາວຽກງານການສຶກສາອົບຮົມການເມືອງແນວຄິດເປັນສິ່ງສໍາຄັນ ໂດຍສະເພາະແມ່ນການເຊື່ອມຊຶມນິຕິກຳຕ່າງໆ ຕາມແນວທາງນະໂຍບາຍຂອງພັກ-ລັດ, ກົດລະບຽບຂອງວິທະຍາໄລ, ກົດລະບຽບຂອງຊາວໜຸ່ມ, ການຄົ້ນຄວ້າຮ່ຳຮຽນ, ສຶກສາອົບຮົມພຶດຕິກຳສະມາຊິກຊາວໜຸ່ມເປັນແຕ່ລະໄລຍະເປັນປົກກະຕິ, ຍົກລະດັບຄວາມຮູ້ດ້ານວິຊາສະເພາະ, ພາສາຕ່າງປະເທດ, ທັກສະໃນການນຳໃຊ້ຄອມພິວເຕີ ໂດຍສະເພາະ ການຍົກລະດັບປະລິນຍາໂທຢູ່ຕ່າງປະເທດ 4 ສະຫາຍ, ປະລິນຍາໂທພາຍໃນປະເທດ 1 ສະຫາຍ ແລະ ຍົກລະດັບພາສາອັງກິດໄລຍະສັ້ນມີ 1 ສະຫາຍ, ນອກຈາກນັ້ນ, ການສ້າງວຽກເຮັດງານທຳສຳລັບພະນັກງານອາຈານ ທີ່ເປັນສະມາຊິກຊາວໜຸ່ມເຫັນໄດ້ວ່າ ມີຄອບຄົວທີ່ດຸໝັ່ນ, ຫ້າວຫັນ, ສຸມຈິດສຸມໃຈໃນການສ້າງເສດຖະກິດຄອບຄົວຈົນສາມາດກາຍເປັນຕົວແບບທີ່ເຂັ້ມແຂງ ກາຍເປັນຄອບຄົວຕົວແບບມີຈຳນວນ 3 ຄອບຄົວ. ອີງໃສ່ຜົນງານການເຄື່ອນໄຫວຕົວຈິງ ທຽບໃສ່ມາດຖານຂອງການແຂ່ງຂັນ ສາມາດຈັດປະເພດໜ່ວຍ 4 ບຸກ ປະເພດແຂງ. ເພື່ອເປັນບ່ອນອີງໃນການຈັດຕັ້ງ 4 ບຸກ ໃຫ້ມີຄວາມໜັກແໜ້ນເຂັ້ມແຂງສ້າງໃຫ້ກາຍເປັນໜ່ວຍ 4 ບຸກໄດ້ຮັບທຸງໄຊໃນປີຕໍ່ໄປ 2021 ໃຫ້ປະກົດຜົນເປັນຈິງ ໜ່ວຍຊາວໜຸ່ມ ຈະຖືເອົາການສຶກສາອົບຮົມການເມືອງແນວຄິດເປັນສຳຄັນ, ເອົາໃຈໃສ່ຢ່າງຕັ້ງໜ້າໃນການສຶກສາຄົ້ນຄວ້າຮ່ຳຮຽນ ເພື່ອສົ່ງພະນັກງານໜຸ່ມນ້ອຍໄປຍົກລະດັບທາງດ້ານທິດສະດີການເມືອງ 1 ສະຫາຍ, ວິຊາສະເພາະ 2 ສະຫາຍ, ຍົກລະດັບຄວາມຮູ້ທາງດ້ານໄອທີ, ພາສາຕ່າງປະເທດ ແລະ ດ້ານອຶ່ນໆໃຫ້ຫຼາຍຂຶ້ນກວ່າເກົ່າ, ສ້າງສະມາຊິກຊາວໜຸ່ມພາຍໃນໜ່ວຍໃຫ້ໄດ້ເຂົ້າເປັນສະມາຊິກພັກສຳຮອງ ໃຫ້ໄດ້ 2 ສະຫາຍ, ສະມາຊິກພັກສົມບູນ 3 ສະຫາຍ ຖືສຳຄັນວຽກງານຮ່ວມຊີວິດໃຫ້ເປັນປົກກະຕິເພື່ອຕຳນິສົ່ງຂ່າວ, ກໍ່ສ້າງເຊິ່ງກັນ ແລະ ກັນເພື່ອພ້ອມກັນໃຫ້ບັນລຸຄາດໝາຍຕອນທ້າຍພິທີກອງປະຊຸມຍັງໄດ້ຮັບຟັງການໂອ້ລົມ ແລະ ໃຫ້ທິດຊີ້ນຳຕໍ່ການຈັດຕັ້ງປະຕິບັດຂໍ້ແຂ່ງຂັນ 4 ບຸກຈາກ ສະຫາຍ ໄຊນະຄອນ ສຸດທິດາ ຄະນະບໍລິຫານງານສູນກາງຊາວໜຸ່ມ ເລຂາຄະນະບໍລິຫານງານຊາວໜຸ່ມແຂວງຫຼວງພະບາງ ໂດຍສະຫາຍໄດ້ສະແດງຄວາມຍ້ອງຍໍຊົມເຊີຍ ແລະ ໄດ້ເນັ້ນໜັກໃຫ້ສະມາຊິກຊາວໜຸ່ມ ຈົ່ງສືບຕໍ່ຕັ້ງໜ້າບຸກບືນເຂົ້າໃນການປະຕິບັດໜ້າທີ່ດ້ວຍຄວາມຮັບຜິດຊອບສູງ, ສຶກສາອົບຮົມການເມືອງແນວຄິດໃຫ້ຊາວໜຸ່ມ-ໄວໜຸ່ມ, ຕ້ອງຫັນປ່ຽນຢ່າງຂາດຕົວ ທາງດ້ານແນວຄິດແບບແຜນວິທີເຮັດວຽກໃຫ້ດີຂຶ້ນກວ່າເກົ່າ ເພື່ອໃຫ້ບັນລຸຕາມເນື້ອໃນທັງ 4 ດ້ານ.

ພາບ-ຂ່າວໂດຍ: ພຸດທະຟົງ ເຮີ ນັກຂາວຄະນະວິຊາປ່າໄມ້

ວິທະຍາໄລກະສິກຳ ແລະ ປ່າໄມ້ ພາກເໜືອ ຈັດພິທີລະນຶກເຖິງວັນເກີດຂອງ ທ່ານ ປະທານ ສຸພານຸວົງ ຄົບຮອບ 112 ປີ ແລະ ສະເຫຼີມສະຫຼອງວັນປ່ອຍປາ , ອານຸລັກສັດນໍ້າ-ສັດປ່າ ແຫ່ງຊາດ ຄົບຮອບ 24 ປີ

ໃນຕອນເຊົ້າ ວັນທີ 16 ກໍລະກົດ 2021 ນີ້ ຢູ່ທີ່ສະໂມສອນຂອງ ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ມີພິທີປາຖະກະຖາເລົ່າມູນເຊື້ອ ວັນເກີດຂອງ ທ່ານ ປະທານ ສຸພານຸວົງ ຄົບຮອບ 112 ປີ (13 ກໍລະກົດ 1909 – 13 ກໍລະກົດ 2021) ແລະ ວັນປ່ອຍປາ, ອານຸລັກສັດນໍ້າ-ສັດປ່າ ແຫ່ງຊາດ ຄົບຮອບ 24 ປີ ຂຶ້ນ. ໂດຍການເປັນກຽດເຂົ້າຮ່ວມຂອງ ທ່ານ ທອງສະມຸດ ພູມມະສອນ ອໍານວຍການວິທະຍາໄລ, ມີຮອງອຳນວຍວິທະຍາໄລ, ຫົວໜ້າ-ຮອງຫົວໜ້າຫ້ອງການ, ຫົວໜ້າ-ຮອງຫົວໜ້າຄະນະວິຊາ ພ້ອມດ້ວຍພະນັກງານ, ຄູ-ອາຈານ ແລະ ນັກສຶກສາພາຍວິທະຍາໄລ ເຂົ້າຮ່ວມ. ໃນໂອກາດດັ່ງກ່າວ ທ່ານ ທອງສະມຸດ ພູມມະສອນ ໄດ້ປາຖະກະຖາຫວນຄືນມູນເຊື້ອການເຄື່ອນໄຫວຂອງ ທ່ານ ປະທານ ສຸພານຸວົງ, ຊຶ່ງທ່ານໄດ້ຍົກໃຫ້ເຫັນ: ປະທານ ສຸພານຸວົງ ກຳເນີດຈາກຄອບຄົວເຊື້ອເຈົ້າ ໂດຍເປັນໂອລົດຂອງເຈົ້າມະຫາອຸປະຣາດບຸນຄົງ ແລະ ໝ່ອມຄຳອ້ວນ, ເຖິງວ່າທ່ານຈະກຳເນີດຈາກເຊື້ອກະສັດແຕ່ກໍຕາມ ແຕ່ທ່ານຍອມດໍາລົງຊີວິດແບບລຽບງ່າຍບໍ່ຖືວ່າຕົນເອງມີຖານະສູງສົ່ງແຕ່ຢ່າງໃດ ເປັນຜູ້ທີ່ມີນ້ຳໃຈຮັກຊາດອັນແຮງກ້າ ຍອມເສຍສະຫຼະເລືອດເນື້ອເພື່ອຊາດ, ຄຽງບ່າຄຽງໄລ່ກັບປະຊາຊົນ ດ້ວຍການຕໍ່ສູ້ກັບສັດຕູ ເພື່ອປົດປ່ອຍປະເທດຊາດໃຫ້ໄດ້ຮັບໄຊຊະນະ ແລະ ປະກາດເອກະລາດ ພ້ອມທັງສະຖາປະນາປະເທດລາວ ເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງສົມບູນ ໃນວັນທີ 2 ທັນວາ ປີ 1975, ຈາກນັ້ນທ່ານໄດ້ສືບຕໍ່ ປຸກລະດົມປວງຊົນລາວທັງຊາດ ປະຕິບັດໜ້າທີ່ປົກປັກຮັກສາ ແລະສ້າງສາພັດທະນາປະເທດຊາດ ເຮັດໃຫ້ປະເທດລາວ ມີຄວາມສີວິໄລ ແລະນັບມື້ພັດທະນາຈົນເຖິງທຸກວັນນີ້.

ຫຼັງຈາກນັ້ນ ທ່ານ ປອ. ອຸໄທ ສຸກຂີ ຮອງອໍານວຍການວິທະຍາໄລ ໄດ້ຂຶ້ນເລົ່າປະຫວັດຄວາມເປັນມາຂອງ ວັນປ່ອຍປາ ແລະ ວັນອານຸລັກສັດນໍ້າ-ສັດປ່າແຫ່ງຊາດ  ໂດຍທ່ານຍົກໃຫ້ເຫັນຄວາມສຳຄັນຂອງ ສັດນໍ້າ ແລະ ສັດປ່າ ຕໍ່ການພັດທະນາເສດຖະກິດ-ສັງຄົມຂອງປະເທດຊາດ, ຕໍ່ການປັບປຸງຊີວິດການເປັນຢູ່, ຫຼຸດຜ່ອນຄວາມທຸກຍາກ ຂອງປະຊາຊົນລາວບັນດາເຜົ່າ ແລະ ເພື່ອເປັນການອານຸລັກ-ປົກປັກຮັກສາຊີວະນາໆພັນໃຫ້ມີຄວາມຍືນຍົງ, ພັກ ແລະ ລັດຖະບານ ໄດ້ກໍານົດເອົາ ວັນທີ 13 ກໍລະກົດ ຂອງທຸກໆປີ ເປັນວັນປ່ອຍປາແຫ່ງຊາດ, ພ້ອມນີ້ທ່ານຍັງໄດ້ຮຽກຮ້ອງມາຍັງ ພະນັກງານ,ຄູ-ອາຈານ ແລະ ນັກສຶກສາທຸກຄົນ ຈົ່ງພ້ອມກັນຮ່ວມແຮງຮ່ວມໃຈຄຸ້ມຄອງປົກປັກຮັກສາ ແລະ ພັດທະນາສັດນໍ້າສັດປ່າໃຫ້ຫຼາຍຂຶ້ນ ເພື່ອເພີ່ມຄວາມອຸດົມສົມບູນທາງດ້ານຊະນິດພັນ ແລະ ຈໍານວນປະຊາກອນຂອງສັດນໍ້າ ແລະ ສັດປ່າ ທີ່ເປັນມໍລະດົກທາງທໍາມະຊາດໃຫ້ໄດ້ຮັບການປົກປັກຮັກສາ, ຊົມໃຊ້ຍືນນານ ແລະ ເປັນມູນມໍລະດົກຕົກທອດເຊັ່ນລູກຫຼານຂອງພວກເຮົາຕະຫຼອດໄປ. ຈາກນັ້ນ ກໍໄດ້ນໍາເນີນການປ່ອຍປາ ຢູ່ທີ່ ຟາມປະມົງ ຂອງວິທະຍາໄລ, ຊຶ່ງປາທີ່ນໍາມາປ່ອຍໃນຄັ້ງນີ້ປະກອບມີ ປາປາກ 8.000 ໂຕ, ປາມາຣິການ 10.000 ໂຕ, ປາໂຣຮູ 10.000 ໂຕ ແລະ ປາໄນ 2.000 ໂຕ, ລວມທັງໝົດ 30.000 ໂຕ, ໃນນີ້ປ່ອຍລົງ ນ້ຳເຊືອງ 2.000 ໂຕ, ປ່ອຍລົງໜອງສາມຂາ 25.000 ໂຕ, ປ່ອຍລົງໜອງສາມອົງການຈັດຕັ້ງ 3.000 ໂຕ.

ພາບໂດຍ: ສອນມະນີ ສີລິວົງ ທີມງານໂທລະໂຄ່ງວິທະຍາໄລ

ຂ່າວໂດຍ: ສີສະຫວາດ ພັນທຸວົງ

ວິທະຍາໄລກະສິກຳ ແລະ ປ່າໄມ້ ພາກເໜືອ ເປີດຮັບສະໝັກນັກສຶກສາໃໝ່ ສົກຮຽນ 2021-2022

ເປີດຮັບສະໝັກນັກສຶກສາໃໝ່ ສົກຮຽນ 2021-2022

ຫຼັກສູດຊັ້ນສູງ ກະສິກໍາ ແລະ ປ່າໄມ້ ເຂດເນີນສູງ (ລະບົບ 3 ປີ)

ມີ 5 ສາຂາວິຊາໃຫ້ເລືອກຮຽນດັ່ງນີ້:

1 ສາຂາ ວິຊາປູກຝັງ

2 ສາຂາ ວິຊາລ້ຽງສັດ

3 ສາຂາ ວິຊາປະມົງ

4 ສາຂາ ວິຊາທຸລະກິດກະສິກຳ

5 ສາຂາ ວິຊາປ່າໄມ້

ເງື່ອນໄຂຂອງຜູ້ເຂົ້າຮຽນ:

1) ເປັນນັກສຶກສາຈົບມໍ 7

2) ມີຄຸນສົມບັດດີ, ບໍ່ເປັນພະຍາດຕິດ ແປດຊໍາເຮື້ອ ຫຼື ບໍ່ເຄີຍຕິດຢາເສບຕິດ, ມີສຸຂະພາບແຂງແຮງ ແລະ ບໍ່ເປັນອຸປະສັກຕໍ່ກັບການຮຽນ, ດຸໝັ່ນ, ສູ້ການ, ສູ້ງານ ເໝາະສົມໃນການຮຽນວິຊາຊີບນີ້

3) ສໍາລັບແມ່ຍິງຊົນເຜົ່າ, ຜູ້ທຸກຍາກ ແລະ ຜູ້ດ້ອຍໂອກາດ ຈະໄດ້ຮັບບູລິມະສິດ ໃນການບັນຈຸເຂົ້າຮຽນກ່ອນໝູ່

ການປະກອບເອກະສານເຂົ້າຮຽນ:

1) ຊີວະປະຫວັດນັກຮຽນ

2) ໃບຢັ້ງຢືນຈົບມໍ 7

3) ໃບຢັ້ງຢືນທ່ີຢູ່  

4) ໃບຢັ້ງຢືນສຸຂະພາບ

5) ໃບແຈ້ງໂທດ

6) ສໍາເນົາສໍາມະໂນຄົວ

7) ຮູບຖ່າຍ (3×4) 2 ໃບ (ບໍ່ກາຍ 3 ເດືອນ)

ກໍານົດເວລາການສະໝັກ:

  • ເປີດຮັບສະໝັກ ເລີ່ມແຕ່ວັນທີ 02 ສິງຫາ (8) 2021 ຫາ ວັນທີ 24 ກັນຍາ (9) 2021
  • ຍຶ່ນເອກະສານ ວັນທີ 27-30 ກັນຍາ (9) 2021
  • ເລີ່່ມເຂົ້າຮຽນ  ວັນທີ 04 ຕຸລາ (10) 2021

ພິເສດ:

ບໍ່ມີການສອບເສັງເຂົ້າ ພຽງແຕ່ກຽມເອກະສານໃຫ້ຄົບຖ້ວນ

ມາຍື່ນສະເໜີຕົວຕາມເວລາທີ່ກໍານົດແມ່ນ

ໄດ້ຮັບສິດ ເປັນນັກຮຽນໃນແຜນທັນທີ

ຄຣິກ ຫຼື ສະແກຣນບາໂຄດ ເພື່ອດາວໂຫຼດໃບສະໝັກ

ສົນໃຈຕິດຕໍ່ໄດ້ທີ່

ເບີໂທຕິດຕໍ່ສ່ວນບຸກຄົນ

030 537 2152

020 9708 7002

ວິທະຍາໄລກະສິກຳ ແລະ ປ່າໄມ້ ພາກເໜືອ ເປີດການບໍລິການຝຶກອົບຮົມຫຼັກສູດໄລຍະສັ້ນ ປີ 2021

ຫຼັກສູດການຝຶກອົບຮົມໄລຍະສັ້ນສ້າງຂຶ້ນເພື່ອບໍລິການການຝຶກອົບຮົມເຕັກນິກວິຊາການດ້ານການປູກຝັງ, ລ້ຽງສັດ, ປະມົງ, ທຸລະກິດກະສິກໍາ ແລະ ປ່າໄມ້ ໃຫ້ແກ່ບັນດາຫົວໜ່ວຍທຸລະກິດ, ອົງການຈັດຕັ້ງທັງພັກລັດ, ພາກເອກະຊົນ ແລະ ໄວໜູ່ມຜູ້ທີ່ສົນໃຈທົ່ວໄປ ເພື່ອຍົກສະມັດຕະພາບ ແລະ ຄຸນນະພາບຂອງການຜະລິດໃຫ້ສູງຂຶ້ນກວ່າເກົ່າ, ພາຍຫລັງການຝຶກອົບຮົມຜູ້ເຂົ້າຮ່ວມສາມາດນໍາໄປໃຊ້ໄດ້ໃນຊີວິດຕົວຈິງ, ຮັບປະກັນດ້ານຄຸນນະພາບ, ສາມາດສ້າງເປັນອາຊີບ ແລະ ມີລາຍໄດ້ທີ່ໝັ້ນຄົງໃຫ້ແກ່ຕົນເອງ ແລະ ຄອບຄົວ.  ຫລັກສູດການຝຶກອົບຮົມຂອງພວກກເຮົາແມ່ນເນັ້ນການເຮັດພາກປະຕິບັດຕົວຈິງ 80-90% ແລະ ທິດສະດີພຽງ 10-20% ມີຫົວຂໍ້ລະອຽດດັ່ງນີ້:

ລ/ດຊື່ຫຼັກສູດ/ຫົວຂໍ້ຝຶກອົບຮົມ Course Nameໃຊ້ເວລາ Durationສະຖານທີ່ຝຶກອົບຮົມ Training Locationວັນເວລາຝຶກອົບຮົມ Date of trainingຄ່າຝຶກອົບຮົມ Training price
1ການປູກຜັກອິນຊີ       Organic vegetable production5 ວັນ   5 daysວກປໜ ຫຼື ປຶກສາກັນໄດ້  NAFC campus or can be negotiatedອິງຕາມການເຫັນດີຂອງສອງຝ່າຍ Based on the agreement500 000ກີບ/ຄົນ  
2 ການປູກເຫັດເຟືອງ  Straw Mushroom production5 ວັນ   5 days ວກປໜ ຫຼື ປຶກສາກັນໄດ້  NAFC campus or can be negotiated ອິງຕາມການເຫັນດີຂອງສອງຝ່າຍ  Based on the agreement500 000ກີບ/ຄົນ
3ການປູກເຫັດນາງລົມ Oyster Mushroom production5 ວັນ   5 daysວກປໜ ຫຼື ປຶກສາກັນໄດ້   NAFC campus or can be negotiatedອິງຕາມການເຫັນດີຂອງສອງຝ່າຍ  Based on the agreement500 000ກີບ/ຄົນ
4 ການລ້ຽງສັດປີກ ແລະການປ້ອງກັນພະຍາດສັດປີກ Chicken raising & prevention of poultry diseases5 ວັນ   5 days ວກປໜ ຫຼື ປຶກສາກັນໄດ້ NAFC campus or can be negotiated ອິງຕາມການເຫັນດີຂອງສອງຝ່າຍ  Based on the agreement500 000ກີບ/ຄົນ
5 ເຕັກນິກການລ້ຽງ ແລະ ປະສົມພັນກົບ Frog raising and breeding5 ວັນ   5 days ວກປໜ ຫຼື ປຶກສາກັນໄດ້  NAFC campus or can be negotiated ອິງຕາມການເຫັນດີຂອງສອງຝ່າຍ  Based on the agreement500 000 ກີບ/ຄົນ
6ເຕັກນິກການລ້ຽງ ແລະ ປະສົມພັນປາ Fish raising and breeding5 ວັນ   5 days ວກປໜ ຫຼື ປຶກສາກັນໄດ້  NAFC campus or can be negotiated ອິງຕາມການເຫັນດີຂອງສອງຝ່າຍ  Based on the agreement500 000 ກີບ/ຄົນ
7 ການແປຮູບຜົນຜະລິດກະສິກໍາເພື່ອການເພີ່ມມູນຄ່າ Value-added agricultural production  processing5 ວັນ   5 days ວກປໜ ຫຼື ປຶກສາກັນໄດ້  NAFC campus or can be negotiated ອິງຕາມການເຫັນດີຂອງສອງຝ່າຍ  Based on the agreement500 000 ກີບ/ຄົນ
8 ການແປຮູບຜົນຜະລິດຕະພັນສັດ ເພື່ອການເພີ່ມມູນຄ່າ Value-added meat production  processing5 ວັນ  5 days ວກປໜ ຫຼື ປຶກສາກັນໄດ້  NAFC campus or can be negotiated   ອິງຕາມການເຫັນດີຂອງສອງຝ່າຍ  Based on the agreement500 000 ກີບ/ຄົນ
9ລະບົບກະສິກໍາປ່າໄມ້: ການປູກພືດເຄື່ອງປ່າຂອງດົງໃສ່ສວນໄມ້ໃຫ້ໝາກ/ສວນໄມ້ສັກ Agroforestry systems and intercropping with NTFP in fruit tree/teak plantations5 ວັນ   5 days ວກປໜ ຫຼື ປຶກສາກັນໄດ້   NAFC campus or can be negotiated   ອິງຕາມການເຫັນດີຂອງສອງຝ່າຍ   Based on the agreement400 000 ກີບ/ຄົນ

ວິທະຍາໄລມີສິ່ງອໍານວຍຄວາມສະດວກໃນການຝຶກອົບຮົມເຊັ່ນ:

   1).  ຫໍພັກສໍາລັບນັກຝຶກອົບຮົມຊາຍ ແລະ ຍິງສາມາດບັນຈຸໄດ້ 60 ຄົນ

   2).  ມີຫ້ອງຝຶກອົບຮົມ 2 ຫ້ອງ ພ້ອມປະກອບອຸປະກອນການຝຶກຄົບຊຸດ

   3).  ມີເຮືອນຄົວສໍາລັບນັກຝຶກອົບຮົມໄວ້ແຕ່ງກິນ

   4).  ມີຟາມດ້ານການປູກຝັງ, ລ້ຽງສັດ, ປະມົງ, ເຮືອນປຸງແຕ່ງຜະລິດຕະພັນພືດ ແລະ ສັດ ເພື່ອໄວ້ຝຶກປະຕິບັດທາງດ້ານເຕັກນິກວິຊາການຕົວຈິງ

      5).  ມີອາຈານທີ່ເປັນຄຸຝຶກຮຽນຈົບມາຈາກພາຍໃນ ແລະ ຕ່າງປະເທດ ມີວຸດທິ, ມີຄວາມຊໍານານ ແລະ ມີປະສົບການຫລາຍປີ

ໝາຍເຫດ: 

–  ຜູ້ເຂົ້າຮ່ວມແຕ່ລະຫົວຂໍ້ໍ່ຕໍ່າສຸດ 5 ຄົນ/ຄັ້ງ ແລະ ສູງສຸດບໍ່ເກີນ 15 ຄົນ/ຄັ້ງ, ຖ້າຈໍານວນຜູ້ຝຶກຫລາຍກວ່າ 10 ຄົນຈະມີສ່ວນລຸດ 50 000 ກີບ/ຄົນ

          –  ຄ່າເດີນທາງ, ທີ່ພັກ ແລະ ອັດຕາກິນແມ່ນພາກສ່ວນມາຝຶກເປັນຜູ້ຮັບຜິດຊອບ

          –  ຄ່າທີ່ພັກ 30 000 ກີບ/ຄົນ/ຄືນ, ຖ້າຫລາຍກວ່າ 10 ຄົນຂຶ້ນໄປ 25 000 ກີບ/ຄົນ/ຄືນ

ທ່ານສາມາດຕິດຕໍ່ກັບທີມງານພວກເຮົາໄດ້ ຄ່າຝຶກບໍ່ແພງ ແລະ ສົມເຫດສົມຜົນ ເພາະທາງວິທະຍາໄລພວກເຮົາແມ່ນສ່ວນໜຶ່ງຂອງການພັດທະນາປະເທດຊາດ ຢາກຖ່າຍທອດຄວາມຮູ້ໃຫ້ແກ່ສັງຄົມຈາກໃຈຈິງ.

ສົນໃຈລາຍລະອຽດ ຕິດຕໍ່ໄດ້ທີ່ ຫ້ອງການບໍລິຫານ ແລະ ຈັດຕັ້ງ ອາຈານ ບຸນຈັນ ເລັ່ງສະຫວັດ ເບີໂທ/ວອດແອບ: 020 5589 4454, ອາຈານ ຄໍາເຜີຍ ດວງມາລີ ເບີໂທ: 020 2200 4244 ອາຈານ ລົງເລົາ ເຍຍນູ: 020 5465 5570 ຫ້ອງການ: 071  219 036, Email: longlao.nyianu@gmail.com

ຂໍຂອບໃຈທີ່ໃຊ້ບໍລິການ

ນັກສຶກສາຫ້ອງປີ 2 ລ້ຽງສັດ ກໍ ລົງພາກປະຕິບັດສັກຢາປ້ອງກັນພະຍາດ ໃຫ້ແກ່ສັດລ້ຽງພາຍໃນວິທະຍາໄລ

ວັນທີ 18 ມິຖຸນາ 2021 ນັກສຶກສາກ້ອງປີ 2 ລ້ຽງສັດ ກໍ ລົງພາກປະຕິບັດຕົວຈິງ ໃນການສັກຢາ Ivermec ໃຫ້ແກ່ສັດລ້ຽງປະເພດ ງົວ-ຄວາຍ, ແກະ, ແບ້. ເພື່ອປ້ອງກັນພະຍາດທີ່ຈະເກີດຕາມລະດູການ ເຊັ່ນພະຍາດປາກເປື່ອຍລົງເລັບ

ວິທະຍາໄລກະສິກຳ ແລະ ປ່າໄມ້ ພາກເໜືອ ເປີດຮຽນເອກະສານອົບຮົມມະຫາຊົນເປົ້າໝາຍຂະຫຍາຍເຂົ້າພັກ

ວັນທີ 24 ພຶດສະພາ 2021 ນີ້ຢູ່ຫ້ອງປະຊຸມວິທະຍາໄລກະສິກໍາ ແລະ ປ່າໄມ້ ພາກເໜືອ. ໄດ້ຈັດໃຫ້ມີພິທີ ຮຽນເອກະສານອົບຮົມໃຫ້ແກ່ບັນດາສະຫາຍມະຫາຊົນຜູ້ທີ່ມີຄວາມກ້າວໜ້າຂະຫຍາຍເຂົ້າເປັນສະມາຊິກພັກໃໝ່. ໂດຍໃຫ້ກຽດບັນຍາຍເອກະສານໂດຍ ສະຫາຍ ສົມສີ ຄໍາມະນີວົງ ປະທານກວດກາພັກ ຮອງອໍານວຍການວິທະຍາໄລກະສິກຳ ແລະ ປ່າໄມ້ ພາກເໜືອ,

ມີບັນດາສະຫາຍມະຫາຊົນກ້າວໜ້າ ທັງໝົດ 13 ສະຫາຍ, ຍິງ 7 ສະຫາຍ ທີ່ມາຈາກ 4 ໜ່ວຍພັກ ຄື ໜ່ວຍພັກຫ້ອງການ, ໜ່ວຍພັກຄະນະວິຊາລ້ຽງສັດ, ໜ່ວຍພັກຄະນະວິຊາປູກຝັງ ແລະ ໜ່ວຍພັກຄະນະວິຊາປ່າໄມ້. ຈຸດປະສົງເພື່ອເຮັດໃຫ້ ບັນດາມະຫາຊົນຜູ້ກ້າວໜ້າ ເປົ້າໝາຍຂະຫຍາຍເຂົ້າເປັນສະມາຊິກພັກ ມີຄວາມຮັບຮູ້ ແລະ ເຂົ້າໃຈເຖິງຄວາມໝາຍ, ຄວາມເປັນມາ, ອຸດົມຄະຕິ, ທາດແທ້ຂອງພັກປະຊາຊົນປະຕິວັດລາວ, ເຂົ້າໃຈກ່ຽວກັບມາດຖານ, ເງື່ອນໄຂຜູ້ທີ່ຈະເຂົ້າເປັນສະມາຊິກພັກ ແລະ ຜົນປະໂຫຍດທີ່ສະມາຊິກພັກໄດ້ຮັບ, ເຮັດໃຫ້ມະຫາຊົນຜູ້ກ້າວໜ້າຕັ້ງໜ້າຝຶກຝົນຫຼໍ່ຫຼອມຕົນເອງ ໃຫ້ມີມາດຖານເງື່ອນໄຂຄົບຖ້ວນ ແລະ ມີຄວາມຕື່ນຕົວສະມັກເຂົ້າເປັນສະມາຊິກພັກປະຊາຊົນປະຕິວັດລາວ ທັງກາຍເປັນບຸກຄົນທີ່ໄວ້ວາງໃຈຈາກສັງຄົມ. ໂອກາດດັ່ງກ່າວ ສະຫາຍ ສົມສີ ຄໍາມະນີວົງ ໄດ້ເນັ້ນໜັກໃຫ້ບັນດາມະຫາຊົນຜູ້ທີ່ໄດ້ເຂົ້າມາຮຽນເອກະສານ ຕ້ອງກຳແໜ້ນບັນດາເນື້ອໃນຈິດໃຈດັ່ງກ່າວ ເພື່ອນຳໄປຈັດຕັ້ງປະຕິບັດໃຫ້ມີປະສິດທິຜົນສູງ ເຮັດໃຫ້ຜູ້ທີ່ເຂົ້າມາຮຽນ ມີຄວາມກະຕືລືລົ້ນ, ມີຄວາມຕື່ນຕົວ, ຕັ້ງໜ້າຝຶກຝົນຫຼໍ່ຫຼອມຕົນເອງ ໃຫ້ມີມາດຖານ, ເງື່ອນໄຂຄົບຖ້ວນ  ແລະ ມີຄວາມຕື່ນຕົວສະໝັກເຂົ້າເປັນສະມາຊິກພັກປະຊາຊົນປະຕິວັດລາວ ເພື່ອເພິ່ມກຳລັງແຮງສູ້ລົບໃຫ້ແກ່ພັກເຮົາ ໃຫ້ນັບມື້ນັບຂະຫຍາຍຕົວຫຼາຍຂຶ້ນເປັນກ້າວໆ.

ພາບ-ຂ່າວ ສີສະຫວາດ ພັນທຸວົງ

ວິທະຍາໄລກະສິກຳ ແລະ ປ່າໄມ້ພາກເໜືອ ສອບເສັງຄັດເລືອກ ເອົາລັດຖະກອນໃໝ່ ປີ 2021

ໃນຕອນເຊົ້າ ວັນທີ 8 ເມສາ 2021 ນີ້ ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ຈັດຕັ້ງການສອບເສັງຄັດເລືອກເອົາລັດຖະກອນໃໝ່ຂຶ້ນ ທີ່ຫ້ອງປະຊຸມຂອງວິທະຍາໄລ, ໂດຍການເປັນປະທານຮ່ວມຂອງ ທ່ານ ປທ ທອງສະມຸດ ພູມມະສອນ ອຳນວຍການວິທະຍາໄລກະສິກຳ ແລະ ປ່າໄມ້ ພາກເໜືອ, ທ່ານ ປອ. ຄໍາຜຸຍ ຈັນທະມາລີ ຮອງຫົວໜ້າຄະນະຈັດຕັ້ງແຂວງ

ມີທ່ານ ວົງຄໍາ ສຸລິພົນ ຫົວໜ້າຂະແໜງລັດຖະກອນ ພະແນກພາຍໃນແຂວງ, ທ່ານ ຂັນຄໍາ ສຸວັນມີໄຊ ວິຊາການຂະແໜງພັກ ຄະນະຈັດຕັ້ງແຂວງ, ມີຄະນະກຳມະການສອບເສັງ ແລະ ນັກສອບເສັງເຂົ້າຮ່ວມ.

ໃນພິທີ ທ່ານ ບຸນຈັນ ເລັ່ງສະຫວັດ ຫົວໜ້າຫ້ອງການບໍລິຫານ-ຈັດຕັ້ງ ໄດ້ຂຶ້ນຜ່ານລະບຽບການສອບເສັງ ເພື່ອເຮັດໃຫ້ຜູ້ເຂົ້າສອບເສັງເຂົ້າໃຈ, ມີຄວາມຮັບຜິດຊອບ ແລະ ປະຕິບັດຕາມລະບຽບການສອບເສັງທີ່ກຳນົດໄວ້. ຈາກນັ້ນ ທ່ານ ທອງສະມຸດ ພູມມະສອນ ອໍານວຍການວິທະຍາໄລ ໄດ້ມີຄຳເຫັນໂອ້ລົມ ພ້ອມທັງກ່າວເປີດການສອບເສັງ, ທ່ານໄດ້ຮຽກຮ້ອງໃຫ້ ນັກສອບເສັງ ຈົ່ງກຽມພ້ອມທາງດ້ານຄວາມຮູ້, ຄວາມສາມາດ, ປະສົບການປະຕິບັດຕົວຈິງ ພ້ອມທັງຮຽກຮ້ອງໃຫ້ປະຕິບັດໂມງເວລາຕາມຄໍາແນະນໍາ ຂອງຄະນະກໍາມະການຍາມຫ້ອງສອບເສັງໃຫ້ຖືກຕ້ອງຕາມຫຼັກການສອບເສັງຢ່າງເຂັ້ມງວດ ແລະ ພ້ອມກັນຈັດຕັ້ງປະຕິບັດໃຫ້ໄດ້ຮັບຜົນດີ, ມີປະສິດທິພາບ ເພື່ອເຮັດໃຫ້ການສອບເສັງເຂົ້າເປັນພະນັກງານລັດຖະກອນໃໝ່ ຂອງວິທະຍາໄລ ດຳເນີນໄປຢ່າງຖືກຕ້ອງຕາມລະບຽບຫຼັກການ, ມີຄວາມໂປ່ງໃສ, ມີຄວາມຍຸຕິທຳ, ຄວາມເປັນລະບຽບຮຽບຮ້ອຍ ແລະ ມີປະສິດທິຜົນສູງ. ການສອບເສັງໃນຄັ້ງນີ້ ໄດ້ມີນັກສອບເສັງທັງໝົດ 14 ຄົນ, ຍິງ 6 ຄົນ. ໃນການສອບເສັງໄດ້ ສອບເສັງແບບຂຽນ ມີທັງໝົດ 25 ຂໍ້, ໃນນີ້ ພາກຄວາມຮູ້ທົ່ວໄປ 5 ຂໍ້ ແລະ ພາກຄວາມຮູ້ທາງດ້ານວິຊາການ 20 ຂໍ້, ເພື່ອຄັດເລືອກເອົາ 1 ຄົນ ຕາມຕົວເລກແບ່ງປັນຂອງ ກະຊວງກະສິກໍາ ແລະ ປ່າໄມ້.

ພາບ ສອນມະນີ ສີລິວົງ ທິມງານໂທລະໂຄ່ງ

ຂ່າວ ສີສະຫວາດ ພັນທຸວົງ

ພິທີປາຖະກະຖາວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 66 ປີ, ວັນຄຽດແຄ້ນຂອງປະຊາຊົນລາວ-ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 75 ປີ

ໃນວັນທີ 6 ເມສາ 2021 ນີ້ ຢູ່ທີ່ ຫ້ອງປະຊຸມຂອງວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ມີພິທີປາຖະກະຖາວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 66 ປີ, ວັນຄຽດແຄ້ນຂອງປະຊາຊົນລາວ-ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 75 ປີ, ໂດຍໃຫ້ກຽດປາຖະກະຖາຂອງ ທ່ານ ປອ. ອຸໄທ ສຸກຂີ ຮອງອໍານວຍການວິທະຍາໄລ, ມີພະນັກງານ, ຄູ-ອາຈານພາຍໃນວິທະຍາໄລ ເຂົ້າຮ່ວມຮັບຟັງ.

ການປາຖະກະຖາໃນຄັ້ງນີ້ ທ່ານ ປອ. ອຸໄທ ສຸກຂີ ໄດ້ຫວນຄືນເຫດການປະຫວັດສາດແຫ່ງການຕໍ່ສູ້ຢ່າງພິລະອາດຫານຂອງນັກຮົບປະຕິວັດ ແລະ ປະຊາຊົນລາວໃນເມື່ອກ່ອນ ໂດຍສະເພາະໃນບັ້ນຮົບປ້ອງກັນຕົວເມືອງທ່າ ແຂກຈາກພວກລ່າເມືອງຂຶ້ນຝຣັ່ງຜູ້ຮຸກຮານ ໃນວັນທີ 21 ມີນາ ປີ 1946 ຊຶ່ງໄດ້ກາຍເປັນກະແສຟອງ ປຸກລະດົມນໍ້າໃຈຮັກຊາດ, ຄຽດແຄ້ນ ສັດຕູຂອງປະຊາຊົນບັນດາເຜົ່າທີ່ໄດ້ພ້ອມກັນລຸກຮື້ຂຶ້ນຢ່າງເປັນຂະບວນຕໍ່ສູ້ຕ້ານການຮຸກຮານທຸກຮູບແບບຂອງພວກລ່າເມືອງຂຶ້ນແບບເກົ່າ.

ຈາກນັ້ນ ທ່ານ ສົມສີ ຄໍາມະນີວົງ ຮອງອໍານວຍການວິທະຍາໄລ ທ່ານໄດ້ຍົກໃຫ້ເຫັນ ໃນຊ່ວງປະຊາຊົນລາວຖືກກົດຂີ່ຂູດຮີດຢ່າງໜັກໜ່ວງ ແລະ ປ່າເຖື່ອນນັບເປັນເວລາຍາວນານ, ປະທານ ໂຮ່ຈີມິນ ຈຶ່ງໄດ້ສ້າງຕັ້ງພັກກອມມູນິດອິນດູຈີນຂຶ້ນໃນປີ 1930 ແລະ ອົງຄະນະພັກແຄວ້ນລາວກໍ່ໄດ້ຮັບການສ້າງຕັ້ງປີ 1934, ປວງຊົນລາວທັງຊາດໄດ້ຢຶດອຳນາດຂອງພວກຟາຊິດຍີ່ປຸ່ນ ແລະ ພວກລ່າເມືອງຂຶ້ນຟຣັ່ງຕາມແບບແຜນການນຳພາຂອງພັກທີ່ໄດ້ກຳນົດໄວ້ ພ້ອມທັງນຳພາຕໍ່ສູ້ຢ່າງກ້າຫານ ສາມາດຮັບໄຊະນະ ທັງໄດ້ປະກາດຄວາມເປັນເອກະລາດຂອງຊາດລາວ ຕໍ່ຊາວໂລກ ວັນທີ 12 ຕຸລາ 1945 ພາຍຫຼັງກອງປະຊຸມໃຫຍ່ຜູ້ດແທນທົ່ວປະເທດໄດ້ປະຕິບັດຕາມມະຕິກອງປະຊຸມໃຫຍ່ຄັ້ງທີ 2 ຕາມຄວາມຮຽກຮ້ອງຕ້ອງການຂອງການປະຕິວັດ ກໍໄດ້ສ້າງຕັ້ງພັກປະຊາຊົນປະຕິວັດລາວ ໃນວັນທີ 22 ມີນາ 1955 ພ້ອມທັງປະເຊີນໜ້າກັບຈັກກະພັດອາເມລິກາທີ່ເຂົາມາຮຸກຮານໃນໄລຍະທັດມາ ຢ່າງດຸເດືອດຂ້ຽວຂາດ ແລະ ສາມາດປົດປ່ອຍປະເທດຊາດໄດ້ຢ່າງສົມບູນ ໃນປີ 1975. ການຈັດປາຖະກະຖາໃນຄັ້ງນີ້ ເພື່ອໃຫ້ ພະນັກງານ, ຄູ-ອາຈານພາຍໃນວິທະຍາໄລໄດ້ມີຄວາມເຂົ້າໃຈ ແລະ ໄດ້ຮູ້ເຖິງວິລະກໍາອັນລໍ້າເລີດ, ທາດແທ້ ແລະ ອຸດົມການຂອງພັກປະຊາຊົນປະຕິວັດລາວ ຕະຫຼອດໄລຍະ 66 ປີ ຜ່ານມາ ແລະ ເຫັນໄດ້ການປະກອບສ່ວນ ເສຍສະຫຼະຂອງນັກຮົບປະຕິວັດ ແລະ ປະຊາຊົນລາວໃນການຕໍ່ສູ້ຢ່າງພິລະອາດຫານຕ້ານພວກຮຸກຮານຕ່າງຊາດເພື່ອຍາດເອົາ ເອກະລາດແຫ່ງຊາດມາໃຫ້ແກ່ປະຊາຊົນລາວເຮົາ.

ພາບ-ຂ່າວ ສີສະຫວາດ ພັນທຸວົງ

ພິທີປິດການຮຽນ-ການສອນ ວິຊາປ້ອງກັນຊາດ-ປ້ອງກັນຄວາມສະຫງົບໃຫ້ນັກສຶກສາ ວິທະຍາໄລກະສິກຳ ແລະ ປ່າໄມ້ ພາກເໜືອ

ວັນທີ 3 ເມສາ 2021 ນີ້ ກອງບັນຊາການທະຫານແຂວງຫຼວງພະບາງ ໄດ້ຈັດພິທີປິດການຮຽນ-ການສອນວິຊາປ້ອງກັນຊາດ-ປ້ອງກັນຄວາມສະຫງົບ ໃຫ້ນັກແກ່ສຶກສາວິທະຍາໄລກະສິກຳ ແລະ ປ່າໄມ້ ພາກເໜືອ ຢູ່ທີ່ສະໂມສອນຂອງວິທະຍາໄລ. ໂດຍການເປັນປະທານຮ່ວມຂອງ ທ່ານ ພັນເອກ ອຸ່ນເຮືອນ ເຮືອງບົວສອນ ຮອງຫົວໜ້າການທະຫານກອງບັນຊາການທະຫານແຂວງ, ທ່ານ ພັທ ສີທອງ ແພງຈັນທີ ຮອງອໍານວຍການ ໂຮງຮຽນ ປກສ ຊັ້ນສູງ ເລກ 2, ທ່ານ ປທ. ທອງສະມຸດ ພູມມະສອນ ອໍານວຍການວິທະຍາໄລ, ມີບັນດາຄູຝຶກ, ພະນັກງານຄູອາຈານ ແລະ ນັກສຶກສາ ເຂົ້າຮ່ວມ.

ໃນພິທີ ໄດ້ຜ່ານບົດສະຫຼຸບການຝຶກອົບຮົມຫັດແອບວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ນັກສຶກສາ ວິທະຍາໄລກະສິກຳ ແລະ ປ່າໄມ້ ພາກເໜືອ ໃຫ້ຮູ້ວ່າ ຜ່ານການຮຽນ-ການສອນ ມາແຕ່ວັນທີ 19 ມີນາ ຈົນເຖິງ ວັນທີ 3 ເມສາ, ໂດຍມີນັກສຶກສາ ປີທີ 1 ແລະ ປີທີ 2 ທັງໝົດ 138 ຄົນ, ຍິງ 65 ຄົນ, ໂດຍໃຊ້ເວລາຮຽນທັງໝົດ 128 ຊົ່ວໂມງ ເທົ່າກັບ 16 ວັນ, ພາກການເມືອງໄດ້ຮຽນຮູ້ກ່ຽວກັບລະບຽບກົດໝາຍຂອງວຽກງານ ປ້ອງກັນຊາດ-ປ້ອງກັນຄວາມສະຫງົບ, ມູນເຊື້ອຂອງກອງທັບປະຊາຊົນລາວ, ກົນອຸບາຍຫັນປຽນໂດຍສັນຕິຂອງສັດຕູ ແລະ ເອກະສານຂໍ້ກຳນົດຕ່າງໆ, ພາກການທະຫານໄດ້ຮຽນຮູ້ສິນລະປະຍຸດປືນລາບ, ສະມັດຕະພາບຂອງປືນ AK, CKC, ຫັດແອບການມ້າງ, ການເລັ່ງ ແລະ ການຍິງລູກປືນແທ້ ບົດເປີດສາກຂອງປືນ AK, CKC ແລະ ດ້ານຍຸດທະວິທີແມ່ນໄດ້ຮຽນຮູ້ຈັງຫວະພື້ນຖານຂອງທະຫານລາບ, ຮຽນໝູ່, ໝວດ.

ພາກວິຊາປ້ອງກັນຄວາມສະຫງົບຮຽນກ່ຽວກັບ ການປ້ອງກັນ ສະກັດກັ້ນຢາເສບຕິດ, ການຕ້ານການຄ້າມະນຸດ ແລະ ການປ້ອງກັນການຕ້ານອັກຄີໄພ.

ຜ່ານການປະເມີນຜົນການຮຽນວິຊາປ້ອງກັນຊາດ-ປ້ອງກັນຄວາມສະຫງົບ ສະເລ່ຍລວມທັງໝົດ 93,32 %. ໃນພິທີຍັງໄດ້ມອບຂອງຂວັນໃຫ້ແກ່ຜູ້ທີ່ຮຽນເກັ່ງ ແລະ ປະຕິບັດກົດລະບຽບໄດ້ດີຕື່ມອີກ. ໂອກາດດັ່ງກ່າວ ທ່ານ ທອງສະມຸດ ພູມມະສອນ ອໍານວຍການວິທະຍາໄລ ໄດ້ມີຄໍາເຫັນໂອລົມຕໍ່ກັບນັກສຶກສາ,

ຫຼັງຈາກນັ້ນ ທ່ານ ພັນເອກ ອຸ່ນເຮືອນ ເຮືອງບົວສອນ ຮອງຫົວໜ້າການທະຫານກອງບັນຊາການທະຫານແຂວງມີຄໍາເຫັນ ພ້ອມທັງກ່າວມອບນັກສຶກສາໃຫ້ວິທະຍາໄລ ທ່ານໄດ້ສະແດງຄວາມຍ້ອງຍໍ-ຊົມເຊີຍ ມາຍັງຄູຝຶກທີ່ໄດ້ໃກ້ຊິດຕິດແທດ, ມີຄວາມຮັບຜິດຊອບສູງ ແລະ ນັກສຶກສາ ກໍພ້ອມກັນຕັດສິນໃຈເຂົ້າໃນການຮໍ່າຮຽນ, ປະຕິບັດຕາມໂມງເວລາ, ຕັ້ງໃຈຮັບຟັງຄໍາອະທິບາຍຂອງຄູຝຶກ, ທ່ານເນັ້ນໃຫ້ນັກສຶກສາ ຕ້ອງມີສະຕິລະວັງຕົວຕໍ່ກົນອຸບາຍ ຍຸດທະສາດຕ້ານການຫັນປ່ຽນໂດຍສັນຕິຂອງສັດຕູ, ພ້ອມຮັບໃຊ້ຊາດ, ມີນໍ້າໃຈຮັກຊາດ, ຮັກບ້ານເກີດເມືອງນອນ ມີລະບຽບວິໄນ, ຮູ້ກວດກາຄວາມປອດໄພ ເພື່ອເຮັດໃຫ້ວິທະຍາໄລ ແລະ ສັງຄົມມີຄວາມສະຫງົບດີ.

ກົດທີ່ນີ້ເພື່ອເບິ່ງພາບບັນຍາກາດເພີ່ມເຕີມ

ພາບ-ຂ່າວ ສີສະຫວາດ ພັນທຸວົງ