ອາດິດນັກສຶກສາໂຮງຮຽນວິຊາການປ່າໄມ້ຊັ້ນກາງພາກເໜືອຫວນຄືນສະຖາບັນ

ວັນທີ 27 ມີນາ 2021 ນີ້ ຢູ່ທີ່ຄະນະວິຊາປ່າໄມ້ (ວິທະຍາເຂດຊຽງເງິນ) ອາດີດນັກສຶກສາໂຮງຮຽນວິຊາການປ່າໄມ້ຊັ້ນກາງ ພາກເໜືອ ຮຸ່ນທີ V ສົກສຶກສາປີ 1991-1994 ໄດ້ມາພົບປະແລກປ່ຽນບົດຮຽນນໍາພະນັກງານອາຈານຄະນະວິຊາປ່າໄມ້ ໂດຍການເຂົ້າຮ່ວມຂອງ ທ່ານ ທອງສະມຸດ ພູມມະສອນ ອຳນວຍການວິທະຍາໄລກະສິກໍາ ແລະ ປ່າໄມ້ ພາກເໜືອ, ມີພະນັກງານອາຈານ, ພະນັກງານບໍານານ, ແຂກຖືກເຊີນ ແລະ ອາດີດນັກສຶກສາເຂົ້າຮ່ວມ 110 ກວ່າທ່ານ.

ພາຍຫຼັງຄະນະຈັດຕັ້ງພິທີໄດ້ກ່າວຈຸດປະສົງແລ້ວ ທ່ານ ນິກອນ ສຸດທິວົງ ຫົວໜ້າຄະນະວິຊາປ່າໄມ້ໄດ້ນໍາສະເໜີປະຫວັດຄວາມເປັນມາຂອງຄະນະວິຊາປ່າໄມ້ໃນແຕ່ລະໄລຍະ ຊຶ່ງໃນປີ 1989 ໄດ້ຮັບການສ້າງຕັ້ງເປັນໂຮງຮຽນວິຊາການປ່າໄມ້ຊັ້ນກາງພາກເໜືອ, ຕໍ່ມາໃນປີ 1999 ໄດ້ຮັບການສ້າງຕັ້ງເປັນສູນຝຶກອົບຮົມດ້ານການສົ່ງເສີມກະສິກໍາ ແລະ ປ່າໄມ້ພາກເໜືອ, ປີ 2013 ໄດ້ຮັບການສ້າງຕັ້ງເປັນຄະນະວິຊາປ່າໄມ້ ຂຶ້ນກັບວິທະຍາໄລກະສິກໍາ ແລະ ປ່າໄມ້ພາກເໜືອ ໃນປັດຈຸບັນ. ຈາກນັ້ນ ທ່ານ ສົມບູນ ເລັ່ງສະຫວັດ ຮອງຫົວໜ້າກົມພັດທະນາຊົນນະບົດ ແລະ ສະຫະກອນ, ກະຊວງກະສິກໍາ ແລະ ປ່າໄມ້ ທີ່ເປັນອາດີດນັກສຶກສາໄດ້ຕາງໜ້າຄະນະອາດີດນັກສຶກສາຂຶ້ນລາຍງານຫຍໍ້ການເຄື່ອນໄຫວຂອງນັກສຶກສາ ຊຶ່ງພາຍຫຼັງໄດ້ສຶກສາຈົບສະຖາບັນແຫ່ງນີ້ໃນປີ 1994 ແລ້ວ ນັກສຶກສາໄດ້ມີການປະກອບອາຊີບຕ່າງໆຕາມຄວາມຮູ້ຄວາມສາມາດວິຊາສະເພາະທີ່ສຶກສາຜ່ານມາ ໄດ້ມີການປະກອບອາຊີບຢູ່ນໍາພາກລັດ ເປັນຕົ້ນແມ່ນພະແນກກະສິກໍາ ແລະ ປ່າໄມ້ແຂວງ, ຫ້ອງການກະສິກໍາ ແລະ ປ່າໄມ້ເມືອງ ບັນດາແຂວງພາກເໜືອ, ບໍລິສັດຂອງພາກເອກະຊົນ, ບາງທ່ານທີມີເງື່ອນໄຂກໍ່ໄດ້ເປັນຜູ້ປະກອບການທຸລະກິດ ແລະ ຍັງໄດ້ມີການປູກການລ້ຽງຢູ່ໃນທ້ອງຖິ່ນຂອງຕົນ. ສະນັ້ນ, ເພື່ອສະແດງຄວາມຮູ້ບຸນຄຸນມາຍັງອາຈານທີ່ເຄີຍສິດສອນສົ່ງຄວາມຮູ້ ອາດີດນັກສຶກສາຈຶ່ງໄດ້ເຕົ້າໂຮມປຸກລະດົມຄວາມສາມັກຄີ ຈັດງານພົບປະແລກປ່ຽນບົດຮຽນນຳຄູອາຈານຂຶ້ນ ແລະ ໄດ້ມອບອຸປະກອນເພື່ອນໍາໃຊ້ເຂົ້າໃນວຽກງານການຮຽນການສອນຂອງຄະນະວິຊາຕື່ມອີກ.

ໃນຕອນທ້າຍພິທີ ທ່ານ ທອງສະມຸດ ພູມມະສອນ ອຳນວຍການວິທະຍາໄລກະສິກໍາ ແລະ ປ່າໄມ້ພາກເໜືອ ໄດ້ມີຄໍາເຫັນໂອ້ລົມຕໍ່ພິທີ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍມາຍັງອາດີດນັກສຶກສາໂຮງຮຽນວິຊາການປ່າໄມ້ຊັ້ນກາງພາກເໜືອທີ່ໄດ້ເປັນເຈົ້າການຮ່ວມຈິດຮ່ວມໃຈສ້າງຄວາມສາມັກຄີຈັດງານໃນຄັ້ງນີ້ ແລະ ໄດ້ເນັ້ນໜັກໃຫ້ນັກສຶກສາຈົ່ງໃຫ້ການຮ່ວມມືຊ່ວຍເຫຼືອໃນອະນາຄົດຕໍ່ໜ້າ ເພື່ອພັດທະນາພື້ນຖານໂຄງລ່າງ, ວຽກງານການຮຽນການສອນ ແລະ ເຄື່ອງມືອຸປະກອນທີ່ຈໍາໃຫ້ນັກສຶກສາໄດ້ລົງພາກປະຕິບັດຕົວຈິງຢູ່ໃນບັນດາຟາມ ເວົ້າລວມກໍ່ແມ່ນຮ່ວມກັນພັດທະນາວິທະຍາໄລໃຫ້ດີຍິ່ງຂຶ້ນ.

ພາບ-ຂ່າວ: ພຸດທະຟົງ ເຮີ

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s